XXI DAMENGGU GI UTDINÅRIU NA TIEMPU

34 0

FINE’NA NA TINAITAI                                                                                  Dt 6, 2-6

Un tinaitai ginin i Lepblun Deuteronomy

Ha sangåni si Moises i taotåo siha:  Ma’añågui i Saina, i Yi’us-miyu, yan kimpli i areklamentu yan i tinago’-ña ni hu tåtagu’ hamyu, ya siempri mananåkku’ ha’anin-miyu.  Pues fanekkunguk, hamyu ni ManIsrailitas, yan na’siguru na en kimpli esti siha, kosaki siña manlåhyan yan manggefsaga hamyu, taimanu ha’ i prinimetin i Saina i Yi’us i tatan-miyu, ni para en fannina’i un tånu’ ni mimilalak letchi yan miet.  “Ekkunguk, hamyu ni ManIsrailitas!  I Saina, Guiya Yu’os-ta, yan Guiya ha’ na maisa!  Put ennåo na debidi en gofli’i’ i Saina, i Yi’us-miyu, yan todu i kurason-miyu, yan todu i antin-miyu, yan todu i nina’siñan-miyu.  Gef ekkunguk esti siha na finihu’ ni hu sangångani hamyu på’gu na ha’åni.

 

I finu’ i Saina.

 

INEPPIN I SÅTMU                                                                  Ps 18, 2-3. 3-4. 47. 51

  1. HU GUFLI’I’ HÅO, ASAINA, HÅGU I MINETGOT-TU.

 

Hu gofli’i’ Håo, O Asaina, Hågu i fuetsåk-ku,

O Asaina, Hågu i atcho’-hu, i fanliheng-hu yan i nana’librek-ku.

INEPPI…..

 

Yu’os-su, Hågu muna’a’attuk yu’ na åtchu’,

Hågu i pattang-hu, i sumåtba yu’ na kånghilun, i fanatok-ku!

Umessalåo yu’, u matuna i Saina,

esta mana’såfu yu’ ginin i maninimigu-hu.

INEPPI…..

 

Låla’la’ i Saina!  Yan u matuna i atcho’-hu!

U mana’takkilu’ si Yu’us i nana’librek-ku!

Hågu muna’fanggånna mandångkulu na gera i rai,

ya kariñosu Håo ni atyu i Un olius.

INEPPI…..

 

SIGUNDU NA TINAITAI                                                                               Heb 7, 23-28

 

Un tinaitai ginin i Katta para i ManHibrehu   

Estigui’ ottru difirensia: bula ni atyu i ottru klasin mamåli’ sa’ manmåmatai siha ya ti siña makuntenuha i che’chu’-ñiha. Låo si Jesus låla’la’ para todu i tiempu, ya i che’cho’-ña kumu  påli’ åhi’ ti humåhanåo para guatu gi ottru tåotåo. Put ennåo na siña Gui’ på’gu yan todu i tiempu, Ha såtba atyu siha i manmåfattu as Yu’us ni manisgin iya Guiguiya, sa’ låla’la’ Gui’ para todu i tiempu para u bensi si Yu’us put siha.
Intonsis, Guiya si Jesus i Takkilu’ na Påli’ anai gaigi atyu siha i ta nisisita. Såntus Gui’; tåya’ difektu osino isao giya Guiya; mana’sahngi Gui’ ginin i mani’isao ya ma kåhat Gui’ gi hilu’ i langit siha. Ti parehu Gui’ yan i pumalu na takkilu’ påli’; ti ha nisisita na u fanufresi sakrifisiu kada diha fine’na para i isåo-ña mismu ya dispues para i isao tåotåo siha. Manufresi Gui’ unu na sakrifisiu, un biåhi ha’ para todu i tiempu, anai Ha ufresin maisa Gui’. I Lai Moises ha apupunta lalåhi siha ni guaha difektun-ñiha para takkilu’ na påli’; låo i prumesan Yu’us ni Ha fa’tinas gi botu, ni måttu dispues di i Lai, Ha apunta i Lahi-ña, ni hagas ha’ tåya’ difikton-ña desdi i manaihinekkuk na tiempu.

I finu’ i Saina.

 

IBANGHELIU                                                                                     Mk 12, 28-34

ÅLELUIA    Jn 14, 23

  1. Åleluia. HÅYI GUMUFLI’I’ YU’, PUES SIEMPRI HA KUMPLI I FINO’-HU,

YA U GINIFLI’I’ AS TATÅ-HU, YA SIEMPRI BAI

IN FÅTTU GIYA GUIYA.

  1. Åleluia.

+  Un tinaitai ginin i såntu Ibangheliu sigun i tinigi’ San Marcos

Unu gi eskribas nu i humunguk si Jesus mannåna’i manmåolek na ineppi malak guatu, ya ha faisin Gui’, “Håfa na tinagu’ i mås imputtånti gi entri todu?”
Ilek-ña si Jesus, “Estigui’ i mås imputtånti.

Fanékkunguk, ManIsrailitas!

I Saina i Yu’os-ta Guiya ha’ na maisa Saina.
Debidi un gofli’i’ i Saina i Yu’os-mu

yan todu i kurason-mu,

yan todu i anti-mu,

yan todu i hinassom-mu,

yan todu i fuetsåm-mu.

Estigui’ i mina’dos mås imputtånti na tinagu’:

Debidi un gofli’i’ i prohimu-mu taiguihi i un gofli’i’ håo.

Tåya’ ottru tinagu’ mås imputtånti ki esti i dos.”

 

Ilek-ña i eskribas as Jesus, “Måolik bidå-mu, Ma’estru! Mågahit, taimanu ha’ i ilek-mu, na i Saina ha’ Guiya Yu’us, ya tåya’ ottru yu’us fuera ki Guiya. Ya debi i taotåo di u gofli’i’ si Yu’us yan todu i kurason-ña, yan todu i hinasson-ña, yan todu i fuetsån-ña, yan debidi u gofli’i’ i prohimu-ña taiguihi i ginifli’e’-ña nu guiya. Måolek-ña ha’ makumpli esti i dos na tinagu’ ki u makonni’ i ga’ga’ para u måsonggi gi attat pat u ma’ufresi ottru klåsin sakrifisiu para si Yu’us.” Ha ripåra si Jesus na tomtum ineppen-ña, put ennåo na sinangåni gui’, “Ti chågu’ håo ginin i Rainun Yu’us.” Dispues di esti tåya’ umatotga fumaisin si Jesus mås kuestion.

 

I Ibangheliun i Saina

 

Related Post

XX DAMENGGU GI UTDINÅRIU NA TIEMPU

Posted by - August 18, 2017 0
FINE’NA NA TINAITAI                                                                              Is 56, 1. 6-7 Un tinaitai ginin i Lepblun i Prufeta as Isaias Intonsis ilek-ña i…

XXI DAMENGGU GI UTDINÅRIU NA TIEMPU

Posted by - August 25, 2017 0
FINE’NA NA TINAITAI                                                                              Is 22, 19-23 Un tinaitai ginin i Lepblun i Prufeta as Isaias Taiguini ilek-ña i Saina…

IV DAMENGGU GI UTDINÅRIU NA TIEMPU

Posted by - January 27, 2018 0
FINE’NA NA TINAITAI                                                                              Dt 18, 15-20 Un tinaitai ginin i Lepblun Deuteronomy Ha kuentusi si Moises i taotåo siha,…

IV DAMENGGUN KUARESMA

Posted by - March 11, 2018 0
FINE’NA NA TINAITAI                                                                  2 Chr 36, 14-16. 19-23 Un tinaitai ginin i sigundu na Lepblun ‘Chronicles’ Todu i prinsipi…

XVI DAMENGGU GI UTDINÅRIU NA TIEMPU

Posted by - July 22, 2017 0
FINE’NA NA TINAITAI                                                                     Wis 12, 13. 16-19 Un tinaitai ginin i Lepblun Tinemtum Tåya’ Yu’us fuera di Hågu ni…