FINENE’NA NA TINAITAI Rv 11:19a; 12:1-6a.10ab
Un tinaitai ginin i Lepblun Ribilasion
Mababa i templun Yu’us gi langit, ya mali’i’ i Kahun Kuntråta guihi.
Dispues umannuk un dångkulu yan mistiriosu gi langit. Iståba un palåo’an, minagågagu ni atdao ya iståba i pilan gi papa’ i addeng-ña yan kinirorona ilu-ña ni dossi na puti’un. Esta para u fañågu ha’, ya nina’kåti ni piti yan pinadesin para mañågu. Umannuk ottru mistiriosu gi langit. Iståba un dångkulu yan agaga’ na higånti ni sietti ilu-ña yan dies kanghilon-ña ni kinirorona kada unu gi ilu-ña. Ha båtsala ni dadalåk-ña un tetset påtti na puti’un ginin i langit ya ha yuti’ påpa’ gi tanu’. Tumohgi gi me’nan i palåo’an, put i para u tuchu’ i patgon-ña gigun mafañågu. Dispues ha fañågu un patgun låhi, ni para u gubetna ni bariya todu i nasion siha. Låo mahabåo i patgun ya makonni’ para as Yu’us yan para i tronu-ña. Malågu i palåo’an para i disiettu, para atyu na lugåt i Ha pripåra si Yu’us para guiya.
Dispues hu hunguk un a’gang na bos gi langit ilelek-ña, “På’gu nai måttu i satbasion Yu’us! På’gu nai Ha na’annuk i fuetsån-ña si Yu’us kumu Rai! På’gu nai Ha na’annuk i Misihås-ña ni åoturidåt-ña!”
I finu’ i Saina.
INEPPIN I SÅTMU Ps 45, 10bc. 11. 12ab. 16
R. I RARAINA TUMOTOHGI GI AGAPA’-MU, MINAGÅGAGU ORU.
I raraina matåchung gi agapa’-mu,
minagågagun oru ginin Ophir.
INEPPI…..
Ekkunguk, hagå-hu, ya un kumprendi; atituyi ya un dalalaki.
Maleffanñaihun ni taotåo-mu yan i gima’ tatå-mu.
INEPPI…..
Pues siempri u fangguaiya i rai ni bunitå-mu.
Guiya i ma’gås-mu.
INEPPI…..
Manmaguf manmakonni’ hålum;
para i palåsyun i rai.
INEPPI…..
SIGUNDU NA TINAITAI 1 Cor 15, 20-27
Un tinaitai ginin i primet na Kattan San Pablo para i taotåo ‘Corinth’
Hafañe’lus:
Låo estigui’ i minagåhit na esta i Kristo mana’lå’la’ ginin i finatai, ya Guiya esti gumarentitiha na atyu siha i manmamaigu’ gi finatai u mana’fanlå’la’ lokkui’. Taimanu ha’ na måttu i finatai ginin un låhi, pues taiguennåo ha’ lokkui’ na u fåttu i lina’la’ ginin i finatai un låhi. Taimanu ha’ na todu i taotåo manmåtai put i mandanña’-ñiha yan si Adan, pues taiguennåo ha’ lokkui’ na todu u mana’fanlå’la’ ginin i finatai put i mandanña-ñiha gi Kristo. Låo kada unu u mana’lå’la’ sigun gi tarihå-ña: I Kristo, fine’na; dispues, gi ha’anin i finatto-ña, todu atyu siha i taotåo-ña. Dispues di ennåo u fåttu i uttimu; siempri i Kristo Ha gånna todu i ispirituhåt na manmå’gas, åoturidåt, yan fuetsa, ya u intrega i Rainu guatu gi as Yu’us Tåta. Debidi u fanggubetna i Kristo astaki Ha gånna si Yu’us todu i inimigu ya Ha po’lu siha gi papa’ i addeng-na. I uttimu na inimigu ni para u magånna era i finatai. Ilek-ña i iskritura, “Ha po’lu si Yu’us todu siha gi papa’ i addeng-na.” Klåru magåhit na i palåbras “todu siha” ti såsaonåo guini si Yu’us mismu, Guiya pumo’lu todu siha gi papa’ i Kristo.
I finu’ i Saina.
IBANGHELIU Lk 1, 39-56
ÅLELUIA
R. Åleluia. MANA’KAHULU’ SI MARIA GI LANGIT,
YA MANESSALÅO I MANÅNGHIT YU’US PUT I MINAGUF-ÑIHA.
R. Åleluia.
+ Un tinaitai ginin i såntu Ibangheliu sigun gi tinigi’ San Lucas
Chumaddik si Maria guatu gi sengsung giya Hudeha ni gaigi gi eksu’. Humålum gi gima’ ‘Zechariah’ ya ilek-ña as Isabel, “Håfa dai che’lu-hu.” Anai hininguk i bos-ña as Isabel manggaloppi i patgun gi halum tiyån-ña. Inina si Isabel ni Espiritu Såntu ya kumuentus a’gágang, “Matuna håo entri todu i famalåo’an! Matuna i patgun ni para un fañågu! Håfa i rason na u fåttu giya guåhu esti na dångkulun onru, na i nanan i Saina-hu u fåttu mågi para u bisita yu’? Gigun hu hunguk i bos-mu, manggaloppi i patgun gi halum tiyån-hu ni minagof-ña. U matuna håo sa’ un honggi na u ma kumpli giya hågu i sinangan i Saina.”
Dispues ilek-ña si Maria:
“I kurason-hu ha tutuna i tinakhilu’ i Saina,
I anti-hu mañodda’ minaguf gi as Yu’us i satbadot-hu.
Ha hassu yu’, i humitdi na tentago’-ña;
ya desdi på’gu todu i taotåo u ma’ågang yu’ dichosa.
Si Yu’us, i todu Ha na’siña mandångkulu siha fina’tinås-ña para guåhu,
ya såntus i na’ån’-ña;
Ha ma’asisi’i todu siha i muma’añåñagui Gui’,
disdi un kinahulu’ tåotåo asta ottru.
Ha istitira huyung i metgut na kannai-ña;
ya Ha chalalapun i taotåo siha ni mambanidosu hinassun-ñiha.
Ha såsaggui’ påpa’ i manmetgut siha na rai ginin i tronun-ñiha,
ya Ha na’fanakkilu’ i manakpapa’.
Ha na’fanhåhaspuk i manñålang ni manmåolik siha na kosas,
ya i manriku Ha rititira sin håfa.
Ha kumpli i prumeså-ña ni mañaina-ta,
måttu Gui’ para u ayuda i tentago’-ña as Israhet;
Ya ti maleffa Ha na’annuk i mina’ase’-ña as Abrahan
yan i famagu’on-ña para todu i tiempu.”
Sumåga si Maria gi as Isabel tres mesis, dispues humånåo tåtti para i gimå’-ña.
I Ibangheliun i Saina.
