FINE’NA NA TINAITAI Neh 8, 2-4. 5-6. 8-10
Un tinaitai ginin i Lepblun Nehemiah
I pali’ as Ezra ha chuli’ i lai guatu gi me’nan i inetnun, ni manggaigi i lalåhi, famalåo’an, yan atyu siha na famagu’un i manggai’idåd esta para u fanmangumprendi. Anai tumohgi gui’ gi un punta ni tåya’ humohomi gi me’nan i Trangkan-Hånum, ha taitai håfa gaigi gi lepblu desdi i chatanmak asta i talu’åni, gi me’nan i lalåhi, famalåo’an, yan atyu siha na famagu’un i manggai’idåd esta para u fanmangumprendi; ya todu i taotåo siha mágof atituyi i lepblun i lai. Tumotohgi si Ezra gi hilu’ un oddas ni mafa’tinas para esti na ukasion. Si Ezra ha baba i royun påppit kosaki siña todu i taotåo siha u lini’i’ (sa’ takkilo’ña gui’ nai tumotohgi ki i taotåo siha); ya anai ha bababa i finalulun påppit manohgi i taotåo siha. Si Ezra ha tuna i Saina, i takkilu’ na Yu’us, yan todu i taotåo, mahåtsa hulu’ takkilu’ i kannai-ñiha, ya manmanoppi, “Åmen, åmen!” Dispues manmañaluda påpa’ ya manoppup gi me’nan i Saina, i matan-ñiha gi edda’. Ha gof taitai si Ezra i lepblun i lai Yu’us, ya ha isplilika måolik kosaki siña todus u kinimprendi håfa matataitai. Dispues [si Nehemiah ni kumeke’ilekña MÅ’GAS NA SIÑOT, yan] i pali’ as Ezra [yan si Levites ni fuma’nåna’gui i taotåo] ilek-ña nu todu i taotåo: “Pågu na ha’åni såntus para i Saina i Yi’us-miyu. Cha’-miyu fantriristi, pat en fangasao” — sa’ mangåkati todu i taotåo mientras mahuhunguk i finu’ i lai. Ilekña ta’lu: “Fanhånåo ya en fañotchu mansustånsia na nengkannu’ yan manmamis na gimin, ya po’luyi dididi’ atyu siha i tåya’ prinipåran-ñiha; sa’ på’gu na ha’åni såntus para i Saina-ta. Mungnga mantristi på’gu na ha’åni sa’ i minetgut-miyu debidi ginin i minaguf-miyu gi Saina!”
I finu’ i Saina.
INEPPIN I SÅTMU Ps 19, 8. 9. 10. 15
R. I FINO’-MU, ASAINA, ESPIRITU YAN LINA’LA’.
Sen måolik i lai i Saina,
ha na’freresku i anti;
Angokkuyun i tinagu’ i Saina,
Ha nåna’i tinemtum i mansinsiyu.
INEPPI…..
Manunas i tinagu’ i Saina,
ha na’mamaguf i kurason;
Klåru i minandan i Saina,
Ha na’lele’an i áttaduk.
INEPPI…..
Gåsgas i mina’åñåo gi Saina,
ya mesngun para todu i tiempu;
I etdin i Saina manmagåhit
manunas interamenti.
INEPPI…..
Puedi i finu’ i pachot-tu u akseptåpbli para Hågu,
ya u gaigi i hinassun i kurason-hu gi me’nå-mu,
Asaina, Hågu i atcho’-hu yan nana’librek-ku.
INEPPI…..
SIGUNDU NA TINAITAI 1 Cor 12, 12-30
Un tinaitai ginin i fine’na na Kattan San Pablo para i taotåo Corinth
Hafañe’lus:
I Kristo kalang un tåtaotåo ni meggai na påtti; låo un tåtaotåo ha’, atchukka’ manggaigi meggai difirentis na påtti. Gi etmismu manera, todus hit, maseha ManHudihos siha patsino MamPagånu, måseha manisklåbu patsino manlibri, manmatakpångi hit gi un tataotåo ginin i etmismu Espiritu, ya todus hit manmanå’i ni esti i uniku na Espiritu para ta gimin.
I tataotåo mismu ti mafa’tinas kumu un påtti ha’, låo meggai na påtti. Yanggin para u åluk i adding, “Put i ti kånnai yu’, ti såsaonåo yu’ gi tataotåo,” ti kumekke’ilekña ennåo na ti påtti gui’ gi tataotåo. Ya yanggin para u åluk i talanga, “Put i måta yu’, ti såsaonåo yu’ gi tataotåo,” ti kumekke’ilekña ennåo na ti påtti gui’ gi tataotåo. Yanggin interu i tataotåo måta ha’, taimanu manhunguk? Ya yanggin talanga ha’, taimanu manngingi’? Låo gi magåhit si Yu’us Ha nå’yi difirentis påtti siha i tataotåo taimanu ha’ i malago’-ña. Tåya’ siempri tåtaotåo yanggin unu ha’ na påtti guaha-ña! Låo gi magåhit, guaha meggai na påtti siha låo unu ha’ na tåtaotåo. Intonsis i mata ti siña ha sangåni i kannai, “Ti hu nisisita håo!” Ni ti siña i ilu para u åluk ni adding, “Ti hu nisista håo!” Inlugåt di esti, ti siña hit manlå’la’ sin atyu na påtti i kalang mohun ti gof prisisu; ya atyu na påtti siha i hinassot-ta na ti manggof prisisu, esti siha mås ta prikukura umasisti; ya atyu na påtti siha gi tataotåo i ti manggof atanun espisiåt na inadahi manmatråtan-ñiñiha, sa’ atyu i manggåtbu na påtti ti manisisita espisiåt na inadahi. Si Yu’us mismu fuma’tinas i tataotåo gi manera ni para u nina’i mås onru atyu na påtti siha i numisisita. Pues intonsis ti madibibidi i tataotåo, låo todu i difirentis na påtti parehu ha’ intires-ñiha para kada unu. Yanggin mamadesi un påtti gi tataotåo, kuntodu i pumalu na påtti manchamamadesi; yanggin ma’onra un påtti, kuntodu i pumalu na påtti manchámaguf.
Todus hamyu tataotåo i Kristo, ya kada unu giya hamyu påtti guennåo na tåtaotåo. Esta si Yu’us Ha arekla gi Gima’Yu’us kadakuåt sagå-ña: imprimet lugåt i manapostulis, sigundu i mamprufeta, yan tetset i manma’estru; dispues atyu siha i chumocho’gui i milågru, dispues tinattitiyi ni atyu siha i manmanå’i fuetsa para u fanna’homlu’, osino para u fanmanayuda yan dinirihi ottru tåotåo siha, osino para u fanguentus ni manna’manman na lingguåhi. Ti todu siha manapostulis osino mamprufeta patsino manma’estru. Ti todu siha siña manggái fuetsa para u fanmama’tinas milågru osino para u fanna’homlu’ manmalångu. Ti todu siña manguentus ni manna’manman na lingguåhi osino para u ma’isplika atyu i masångan.
I finu’ i Saina.
IBANGHELIU Lk 1, 1-4; 4, 14-21
ÅLELUIA Lk 4, 18-19
R. Åleluia. I SAINA MUNA’HÅNÅO YU’ PARA BAI HU CHULI’I’ I
MAMOPBLI NI MAOLIK NA NUTISIA,
YAN LINIBRI PARA I MANMAPRERESU. R. Åleluia.
+ Un tinaitai ginin i såntu Ibangheliu sigun i tinigi’ San Lucas
Meggai manmacho’chu’ para u matugi’ i sinisedi siha ni esta manmakumpli gi entalo’-ta, atyu siha na sinisedi manmasangåni hit taimanu ha’ i lini’i’ atyu siha i fine’na ni manmanli’i’ yan manministrun i finu’ i Saina. Guåhu lokkui’ esta hu gof atituyi lumastreha todu siha i difirentis na sinisedi desdi i tutuhun ya hu disidi tumugi’ påpa’ para hågu, ‘Theophilus’, kosaki Hågu i Ma’gas na Siñot siña un li’i’ na angokuyun i fina’nå’gui ni un risibi.
Tuma’lu tåtti si Jesus giya Galileha gi fuetsan i Espiritu, ya machalapun i maolik masangån-ña gi todu i lugåt. Mama’nåna’gui Gui’ gi sinagogan-ñiha, ya mansen a’gang i tininan-ñiha nu Guiya.
Måttu giya Nasaret anai dumångkulu Gui’, ya anai humålum gi sinagoga gi Sabaf kumu Ha chocho’gui kalang kustumbri, tumohgi hulu’ para Guiya u fanaitai. Anai manå’i Gui’ ni Lepblun i Prufeta as Isaias, Ha baba i royun påppit ya Ha sodda’ i sinangan anai matugi’:
“I Espiritun i Saina gaigi gi hilo’-hu;
put ennåo na esta Ha olius Yu’ ni laña.
Ha na’hånåo Yu’ para bai Hu chuli’i na’maguf na nutisia i mamopbli,
para bai Hu pruklåma i linibri para i manmaditeteni,
Para u fanmanli’i’ ta’lu i mambåtchit,
para u fanmasotta i manmapreresu,
yan para bai Hu anunsia un åñu na gråsia para i Saina.”
Anai Ha falulun si Jesus tåtti i royun påppit, Ha nå’i i ayudånti ya matå’chung Gui’. Todu i manggaigi gi sinagoga mandotchun i inatan-ñiha giya Guiya. Pues Ha tutuhun sumångani siha, “På’gu na ha’åni nai makumpli esti na sinangan i en hinguk.”
I Ibangheliun i Saina.
