FINENE’NA NA TINAITAI Wis 6, 12-
Un tinaitai ginin i Lepblun Tinemtum
Låmlam yan ti u maya’ i Tinemtum,
yan ti mapput mali’i’ ni atyu siha i gumuaiya gui’,
yan ti mapput masodda’ ni atyu siha i umispipiha gui’.
Listu ha na’matungu’ gui’ kun tiempu nu atyu siha i umispipiha gui’;
atyu i numanangga gui’ gi chatangmak ti u dimålas,
sa’ siempri ha sodda’ gui’ matåta’chung gi trangkån-ña;
Sa’ maseha un hassu ha’ gui’, kabålis ennåo na kinimprendi,
ya atyu i bumebela put guiya siempri tåya’ chathinasson-ña;
Sa’ lumililiku’ gui’ ha ispipiha atyu siha i mandiknu nu guiya,
yan sen maguf ha na’a’annuk gui’ nu siha mientras manhåhanåo,
yan mafåttu gui’ para u fanali’i’ gi todu i hinassun-ñiha.
I finu’ i Saina.
INEPPIN I SÅTMU Ps 63, 2. 3-4. 5-6. 7-8
R. (2) I ANTI-HU MÅMA’HU NU HÅGU, O ASAINA YU’OS-SU.
O Yu’us, Hågu Yu’os-su– Hågu hu aliligåo!
I sinsen-hu mahåhalang nu Hågu; ya i anti-hu måma’hu,
Kalang i tanu’ ni anglu’, tai lina’la’, yan tai hanum.
INEPPI…..
Pues hu ispiha Håo gi halum i santuåriu
para bai hu li’i’ i minetgot-mu yan i gloriå-mu.
Sa’ mås dångkulu na minaolik i mina’ase’-mu ki i lina’la’;
i labios-su siempri un tinina!
INEPPI…..
Siempri taiguini para tunå-hu nu Hågu mientras yu’ låla’la’;
bai hu håtsa hulu’ i kannai-hu, ya siempri bai hu ågang i na’ån-mu.
Siempri satisfetchu i anti-hu taiguihi yanggin gumuput yu’,
ya u maguf i labios-su ya i pachot-tu un tinina.
INEPPI…..
Bai hu hahassu Håo gi hilu’ kattrek-ku,
yan durånti i puengi Hågu bai hu hahassu
Na Hågu magåhit i ayudantek-ku,
ya umessalåo yu’ maguf gi papa’ i ánining i pappam-mu.
INEPPI…..
SIGUNDU NA TINAITAI 1 Thes 4. 13-18
Un tinaitai ginin i fine’na na kåttan San Pablo para i taotåo ‘Thessalonica’
Håfañe’lus, manmalagu’ ham na en tingu’ i minagåhit put atyu siha i esta manmåtai, para mungnga na en fantristi, taiguihi i taotåo siha ni tåya’ inangokkun-ñiha. Hita ta honggi na måtai yan lumå’la’ ta’lu si Jesus, ya put ennåo na ta honggi na si Yu’us siempri Ha konni’ tåtti yan si Jesus atyu siha i manmåtai ni manmanhonggi giya Guiya. Esti i in fanå’na’gui hamyu på’gu era fina’nå’guin Yu’us: hita ni manlåla’la’ gi finattun i Saina ti u fanmo’nåña ki atyu siha i esta manmåtai. Siempri måttu i a’gang na otdin, i bos i atkånghit, i sunidun i kutnetan Yu’us, ya siemrpi i Saina mismu u tunuk på’pa’ ginin i langit. Atyu i manmåtai na manmanhonggi gi Kristo u fangahulu’ fine’na; dispues hita ni manlåla’la’ guihi na tiempu siempri mana’fandanña’ yan siha gi mapagåhis para ta fanali’i’ yan i Saina gi airi. Gi taiguini na siempri todu i tiempu manhihita ha’ yan i Saina. Intonsis, fanakunsuela unu yan ottru ni esti siha na palåbra.
I finu’ i Saina.
IBANGHELIU Mt 25, 1-13
ÅLELUIA Mt 24:42a, 44
R. Åleluia. CHA’-MIYU FANMAMAIGU’ YAN NA’FANLISTU HAMYU:
TI EN TINGU’ NGAI’AN PARA FATTON-ÑA I LAHIN I TAOTÅO.
R. Åleluia.
+ Un tinaitai ginin i såntu Ibangheliu sigun gi tinigi’ San Mateo
Ha sangåni si Jesus i mandisipulu-ña ni esti na fina’akumparasion:
“Atyu na ha’åni siña ta akumpåra i Rainun i langit yan i dies na famalåo’an ni machuli’ i fallut-ñiha ya manhånåo para u mataggam i nobiu. Singku giya siha mamfrihona yan singku manomtum. I mamfrihona machuli’ i fallut-ñiha låo ti manmañuli’ mås låña, ya i manomtum manmañuli’ mås låña fuera di i gaigi gi fallut-ñiha. Umatrasåo fatton-ña i nobiu ya matutuhun mansikat i famalåo’an astaki manmaigu’. “Gi tatalu’ puengi guaha umessalao hulu’ ilelek-ña, ‘Estigui’ i nobiu! Fanmamaila’ ya en kenni’!’ Manmakmåta dies na famalåo’an ya ma’arekla i fallut-ñiha. I mamfrihona na famalåo’an ilik-ñiha ni manomtum, ‘Nå’i ham dididi’ lañan-miyu sa’ mangekematai i kandit-måmi.’ Manmanoppi i manomtum na famalåo’an, ‘Mungnga, put fabot, sa’ siempri ni hami ti mannahung. Måolekña, en fanhånåo para i tenda ya en fanmamåhan dididi’.’ Pues manhånåo para i tenda i singku na mamfrihona, ya mientras manggagaigi gi tenda måttu i nobiu. I singku na manomtum mancháhalum yan i nobiu gi fandånggu, dispues makandålu i petta. “Ti åpmam, manmåttu i pumalu na famalåo’an. Manessalåo gi sanhiyung, ‘Siñot, siñot! Na’fanhålum ham!’ Manoppi i nobiu, ilek-ña, ‘Åmen, hekkua’ adai, ti hu tungu’ håyi hamyu.’ ” Ha na’fåkpu’ si Jesus i leksion ya ilek-ña, “Gof adahi hamyu, sa’ ti en tingu’ ngai’an i ha’åni osino håfa i ora.”
I Ibangheliun i Saina.
