FINENE’NA NA TINAITAI Nm 11, 25-29
Un tinaitai ginin i Lepblun Numiru
Tumunuk påpa’ i Saina gi halum mapagåhis ya Ha kuentusi si Moises. Anai Ha chuli’ dididi’ na espiritu ni iståba giya guiya, Ha nå’i i sitenta na manamku’; ya anai tumohgi i espiritu gi hilu’-ñiha matutuhun masångan håfa siha para u fanmasusedi.
Låo dos låhi ni na’an-ñiha si Eldad yan Medad manaigui gi inetnun sa’ maniståba gi kåmpu. Siha lokkui’ esti i dos esta gaigi gi lista, låo ti humuyung guatu para i palapåla; låo tumohgi ha’ lokkui’ i espiritu gi hilu’-ñiha ya matutuhun masångan gi kåmpu put håfa para u fanmasusedi. Pues anai un hobin na låhi ha sangåni insigidas si Moises, “Si Eldad yan Medad masåsangan gi kåmpu put i håfa siha para u fanmasusedi,” si Joshua, i lahin Num ni desdi i pinatgonña ayudåntin Moises ilek-ña, “Saina-hu, Moises, na’påra i dos.” Låo ineppi as Moises, “Kåo hohosguan håo put guåhu? Pat put i mamprufeta todu i taotåo i Saina! Pat put i mannina’i todu siha ni Saina na u fanmama’prufeta!”
I finu’ i Saina.
INEPPIN I SÅTMU Ps 19, 8. 10. 12-13. 14
R. I TINAGU’ YU’US NUMÅNA’I MINAGUF I KURASON.
Sen måolik i lai i Saina,
ha na’freresku i anti!
Angokkuyun i tinagu’ i Saina,
ha nåna’i tinemtum i mansinsiyu.
INEPPI…..
Gåsgas i mina’åñao gi Saina,
ya mesngun para todu i tiempu;
I otdin i Saina manmagåhit,
manunas interamenti.
INEPPI…..
Ginin siha nai manunungu’ i tentago’-mu;
bula premiu yanggin manmakumpli esti siha.
Håyi siña lumi’i’ i linachi-ta?
Ginin i ti hu håsngun na applachá-hu na’gåsgas yu’.
INEPPI…..
Susteni i tentago-mu ginin i isao banidå;
cha’-mu na’ginibebetna yu’ ni esti siha.
Pues ennåo ha’ nai siña yu’ tai achaki yan gåsgas
ginin i mandångkulu na isao.
INEPPI…..
SIGUNDU NA TINAITAI Jas 5, 1-6
Un tinaitai ginin i Kattan Santiago
Pues på’gu, hamyu ni manriku, ékkunguk yu! Fangåti yan fangasao put i minaså’pit ni mamamaila’ para hamyu! I rikesan-miyu esta manlamas, ya i magagun-miyu esta manggina’ga’. I oru yan i salåppi’-miyu esta mambinalutan ni tinaki’, ya esti na tinaki’ u tistigu kontra hamyu ya u kinannu’ i sensin-miyu kalang guåfi. Esta en na’fanmunton rikesa guini gi uttimu na ha’åni siha. Ti en apåsi ni håfa na suetdun i taotåo siha ni manmacho’chu’ gi gualu’-miyu. Ekkunguk ha’ i inigung-ñiñiha! Esta Ha hunguk si Yu’us, i todu Ha na’siña na Saina, i essalåo atyu siha i manmango’ku’. Bula ginefsaga yan minaguf i lina’la’-miyu guini gi tanu’. Esta en na’fanyommuk hamyu para i ha’åni anai para en fanmakonni’ para i sagan mamunu’. Esta en kundena yan en pinu’ i tåya’ isao-ñiha na tåotåo, ya ti maninimbesti hamyu.
I finu’ i Saina.
IBANGHELIU Mk 9, 38-43. 45. 47-48
ÅLELUIA Jn 17, 17
R. Åleluia. I FINO’-MU, O ASAINA, MINAGÅHIT;
NA’FAÑÅNTUS HAM GI MINAGÅHIT.
R. Åleluia.
+ Un tinaitai ginin i såntu Ibangheliu sigun i tinigi’ San Marcos
Ilek-ña si Juan as Jesus, “Ma’estru, in li’i’ un tåotåo ni ha u’usa i na’ån-mu para u fandulalak aniti ya in na’képara gui’ sa’ ti såsaonåo guini gi inetnon-ta.” Manoppi si Jesus, “Cha’-miyu na’kékepara gui’. Tåya’ tåotåo ni umu’usa i na’ån-hu para u fama’tinas milågru ya etmismu tiempu båba sinangångan-ña put Guåhu. Maseha håyi ni ti kumokontra hit pues manhihita. Åmen, bai Hu asigura hamyu na måseha håyi ni muna’fangimin hamyu hånum gi na’ån-hu put i manåotåo i Kristo hamyu ti u måhñao na u fanmanå’i ni premiun-ñiha.
“Låo maseha håyi ni muna’fanabak esti siha na famagu’un gi hinenggin-ñiha, måolekña na u magoddi un ruedan åtchu’ gi agå’ga’-ñiha ya u fanmayuti’ gi halum tåsi. Yanggin i kannai-mu muna’i’isao håo, utut! Måolekña humålum gi langit sin un kånnai ki humålum sasalåguan gi ti papara na guåfi yan dos kånnai. Yanggin i addeng-mu muna’i’isao håo, utut! Måolekña na un hålum gi langit kohu ki un mayoggua sasalåguan yan dos ådding. Yanggin i atadok-mu muna’popoddung håo, laknus huyung! Måolekña humålum gi langit yan un åtaduk ki un mayoggua sasalåguan yan dos åtaduk anai ‘ti manmåmatai i ilu’ yan i guafi taihinekkuk.”
I Ibangheliun i Saina.
