FINE’NA NA TINAITAI Ez 18, 25-28
Un tinaitai ginin i Lepblun i Prufeta as Ezekiel
Taiguini ilek-ña i Saina:
Ilik-miyu na, “Ti tunas i bidan i Saina!” Ekkunguk Yu’ på’gu, hamyu ni taotåo Israhet: Kåo i bidå-hu ti tunas, osino, i bidan-miyu ti tunas? Yanggin i tinas na tåotåo ha bira gui’ ginin i tininas ya para u cho’gui i tailayi ya måtai, pues put i tailayi ni ha kumeti na debidi u måtai. Låo yanggin i tailayi na tåotåo, ha bira gui’ ginin i tailayi ni ha kumeti, ya ha cho’gui i tinas yan hustisia, siempri ha na’såfu i lina’lå’-ña; sa’ ha bira gui’ ginin todu i isåo siha ni ha kumeti, siguru na siempri u lå’la’, ti u måtai gui’.
I finu’ i Saina.
INEPPIN I SÅTMU Ps 25, 4-5. 6-7. 8-9
- (6) HASSU I MINA’ASE’-MU, O ASAINA.
Na’tungu’ yu’ ni chalån-mu, Asaina;
fa’nå’gui yu’ ni pinekkåt-mu.
Pipit yu’ gi minagahet-mu yan fa’nå’gui yu’,
sa’ Hågu Yu’us yan satbadot-tu.
INEPPI…..
Hahassu i mina’ase’-mu yan i guinaiyam-mu, O Asaina;
ni Un få’nu’i yu’ desdi åntis na tiempu.
Båsta mahassu i isao gi pinatgon-hu;
låo hahassu yu’ solu gi guinaiyam-mu.
INEPPI…..
Måolik yan tunas i Saina;
Ha fa’nunu’i i mani’isåo ni chalan.
Ha pipipit i manhumitdi gi dinanchi na chålan,
yan Ha fa’nåna’gui i manhumitdi ni chalån-ña.
INEPPI…..
SIGUNDU NA TINAITAI Phil 2, 1-5
Un tinaitai ginin i Kattan San Pablo para i taotåo ‘Philippi’
Hafañe’lus:
I lina’la’-miyu gi Kristo muna’fanmetgut hamyu, ya i ginifli’e’-ña kumunsuesuela hamyu. Mandadanña’ hamyu yan i Espiritu, ya gaigi giya hamyu i kariñu yan i mina’åsi’ para unu yan ottru. Hu fafaisin hamyu para en na’kabålis i minagof-fu yanggin mamparehu i hinassun-miyu yan i ginifli’i’-miyu, ya manunu gi ispiritu yan hinassu. Cha’-miyu cheche’gui ni håfa ginin i hambentirihas osino para en fambanidosu låo, na’fanhumitdi hamyu gi unu yan ottru, todu i tiempu kunsidera na måolekña i pumalu ki hamyu. Fana’ayuda umispiha i nisisidåt kada unu giya hamyu, ya mungnga na i nisisidåt-miyu ha’.
I sensiåm-mu debidi u parehu yan i Kristo Jesus.
I finu’ i Saina.
IBANGHELIU Mt 21, 28-32
ÅLELUIA Jn 10, 27
- Åleluia. ILEK-ÑA I SAINA, I GA’-HU KINILU MA’E’EKKUNGUK
I BOS-SU;
HU TUNGU’ SIHA, YAN MADALALALAKI YU’.
- Åleluia.
+ Un tinaitai ginin i såntu Ibangheliu sigun gi tinigi’ San Mateo
Ilek-ña si Jesus nu i manmå’gas mamåli’ yan i manåmku’ i taotåo siha:
“Håfa hinassun-miyu ni esti na kåosa? Guaha un tåotåo ni gai lahi dos. Malak guatu gi amku’ ya ilek-ña, ‘Ihu, hånåo huyung ya un facho’chu’ gi gualu’ på’gu na ha’åni.’
Manoppi i lahi-ña, ‘Mungnga yu’,’ Låo dispues ha tulaika hinasson-ña ya humånåo.
Dispues malak guatu i taotåo gi sigundu na lahi-ña ya ha faisin gui’ parehu ha’. Esti na lahi-ña ilek-ña, ‘Hunggan, siñot,’ låo ti humånåo. Håyi gi dos chumo’gui håfa minalago’-ña i tata?” Ilik-ñiha, “I amku’.” Ilek-ña si Jesus nu siha, “Åmen, maila’ ya bai Hu na’klåru na i taotåo kontribusion yan i famalåo’an benta manhåhalum gi rainun Yu’us åntis di hamyu. Anai måttu si Juan ya sumetmun put i chalan sinantusan na lina’la’, ti en henggi gui’; låo i taotåo kontribusion yan i famalåo’an benta manmanhonggi giya guiya. Låo achukka’ en li’i’ ennåo ti manmañotsut yan ti manmanhonggi hamyu.”
I Ibangheliun i Saina.
