II DAMENGGUN ADBIENTU

FINE’NA NA TINAITAI                                                                               Bar 5, 1-9

Un tinaitai ginin i Lepblun i Prufeta as Baruch 

Pula’ i magagu-mu lutu, Hirusalen, yan i pinadesi-mu;

ya un minagagu ni mina’lak yan i glorian Yu’us para

todu i tiempu:

Balutan håo ni magågun hustisia ni ginin as Yu’us,

ya un tinihung gi ilu-mu

ni muna’a’annuk i glorian i taihinekkuk na nå’an.

Sa’ si Yu’us u na’mali’i’ ni todu i tanu’ i mina’lak-mu:

si Yu’us un finana’an para todu i tiempu

i pås yan hustisia, i glorian i ma’adoran Yu’us.

Kahulu’, Hirusalen!  Tohgi gi yahululu’;

atan i sanhaya ya un li’i’ i famagu’on-mu

Manetnun ginin i sanhaya yan i sanlagu

ginin i sinangan i Uniku ni Såntus,

manmamaguf sa’ manhinahassu as Yu’us.

Mampinipit siha ni maninimigun-ñiha ya mayuti’ håo:

låo siempri mangkinenni’ siha as Yu’us guatu giya hamyu:

manma’u’uma gi gloria kalang manggaigi gi tronun i manrai.

Sa’ manmånda si Yu’us

na todu i takkilu’ na sabåna u mana’takpapa’,

I manantigu siha na kantit yan fina’lupuk

u fanmatåtni astaki mambula,

kosaki siña siguru iya Israhet i hinanåo-ña mo’na gi

glorian Yu’us.

I halum tånu’ yan todu i mampåopåo na trongkun håyu

u mahommi iya Israhet ginin i tinagu’ Yu’us;

Sa’ si Yu’us ha pipipit iya Israhet gi minaguf

ginin i ininan i gloriå-ña,

gina’chuchungi ni mina’ase’-ña yan i hustisiån-ña.

I finu’ i Saina.

INEPPIN I SÅTMU                                                               Ps 126, 1-2. 2-3. 4-5. 6

1. (3) MANDÅNGKULU SIHA FINA’TINÅS-ÑA I SAINA PARA HITA;

YA MAMBULA HIT MINAGUF.

Anai Ha konni’ tåtti i Saina atyu siha i manmapreresu giya Sion,

kalang hit atyu siha na tåotåo i manmangguiguifi.

Atyu nai bula chålik gi pachot-ta;

yan mangånta minagof i hila’-ta.

INEPPI…..

Pues masångan gi entri i nasion siha,

“Mandångkulu siha fina’tinås-ña i Saina para siha.”

Mandångkulu siha fina’tinås-ña i Saina para hita;

Mansen maguf hit magåhit!

INEPPI…..

Na’ta’lu tåtti i suettin-måmi, Asaina,

kalang i anglu’ na fondun sadduk giya Negeb.

Atyu siha i manmanånanum gi trinisti

u fanessalåo minaguf yanggin manmango’ku’.

INEPPI…..

Maskiseha mangåkati mientras manhåhanåo mo’na,

makikilili i kestat simiya,

U fana’lu tåtti mane’essalåo minaguf,

ma’u’uma i manohun kusetcha.

INEPPI…..

SIGUNDU NA TINAITAI                                                                 Phil 1, 4-6, 8-11

Un tinaitai ginin i Kattan San Pablo para i taotåo Philippi 

Hafañe’lus:

Kada biåhi na manåyuyut yu’ para hamyu, manånayuyut yu’ maguf sa’ put i en ayuda yu’ gi che’chu’ i ibangheliu desdi i primet ha’åni asta på’gu.  Pues siguru yu’ na si Yu’us ni Guiya tumutuhun esti i maolik na cho’chu’ giya hamyu, Guiya u kuntinuha astaki munhåyan gi Ha’ånin i Kristo Jesus.  Guiya si Yu’us tistigu-hu na hu såsangan i minagåhit anai ilek-ku na i taddung na sinientek-ku nu hamyu måfattu ginin i kurason i Kristo Jesus mismu.  Manånayuyut yu’ na u sigi ha’ ma’umenta mås i ginefli’i’-miyu, yan i magåhit na tiningu’ yan måolik na disision, kosaki para en atyik atyu i mås måolik.  Ennåo na siempri mana’fanggåsgas hamyu ginin todu i inapplacha’ yan akusasion gi Ha’ånin i Kristo.  I lina’la’-miyu siempri bula ni mansen måolik na kualidåt ni si Jesukristo ha’ siña prumudusi, para i gloria yan matunan Yu’us.

I finu’ i Saina.

IBANGHELIU                                                                                               Lk 3, 1-6

ÅLELUIA    Lk 3, 4-6

1. Åleluia.   NA’LISTU I CHALAN I SAINA, NA’TUNÅSI GUI’

UN CHÅLAN NI PARA U PUKKÅTI:

TODU I TAOTÅO SIHA U MALI’I’ I SATBASION NI

GININ AS YU’US.

1. Åleluia.

+  Un tinaitai ginin i såntu Ibangheliu sigun i tinigi’ San Lucas

Gi mina’kinsi åñus desdi ki umemperadot si Tiberius; si Ponsio Pilåto iståba gubetnun Hudeha, si Hirodes iståba må’gas giya Galileha yan i che’lu-ña as Felipe må’gas Ituraea yan Trachonitis; si Lysanias må’gas Abilene, ya si Annas yan Caiaphas ManMå’gas Mamåli’. Durånti esti na tiempu nai måttu i finu’ Yu’us as Juan i lahin Zechariah gi disiettu. Put esti na humånåo si Juan para todu i lugåt siha ni manggaigi gi uriyan Hotdån. Sumetmun gui’ ilelek-ña, “Fanmañotsut ni isao-miyu ya en fanmatakpångi sa’ si Yu’us siempri en faninasi’i.”  Taimanu ha’ i tinigi’ i prufeta as Isaias gi lepblu:

“Guaha ume’essalåo gi halumtånu’;

Na’listu i chalan i Saina,

Na’tunåsi Gui’ un chålan ni para u pukkåti!

Todu i kannat siha u fanmatåtni,

Todu oksu’ yan sabåna u mana’fanmåhlus,

I manetchung u mana’fanunas

I barångka siha u mana’famfinu;

Ya todu i taotåo u mali’i’ i satbasion ginin as Yu’us!”

I Ibangheliun i Saina.