FINE’NA NA TINAITAI Is 45:1, 4-6
Un tinaitai ginin i Lepblun i Prufeta as Isaias
Taiguini ilek-ña i Saina as Cyrus, guiya ni Ha olius,
ni Ha go’ti i agapa’ na kannai-ña,
para u gånna i nasion siha gi me’nå-ña,
yan para u tågu’ i rai siha gi sitbision-ña,
para u fanmababa i petta siha gi me’nå-ña,
yan ti para u fanmakandålu i trångka siha:
Put si Jacob, i tentago’-hu,
tåotåo Israhet, i inatyek-ku,
Esta Hu ågang håo ni na’ån-mu,
Hu nå’i håo un titulu, maseha ti un tungu’ Yu’.
Guåhu i Saina ya tåya’ ottru,
tåya’ Yu’us fuera di Guåhu.
Guåhu numå’i håo åtmas, maseha ti un tungu’ Yu’,
kosaki desdi i kinahulu’ i atdao astaki måtchum
u matungu’ ni taotåo siha na tåya’ ottru fuera di Guåhu.
Guåhu i Saina, tåya’ ottru.
I finu’ i Saina.
INEPPIN I SÅTMU Ps 96:1, 3, 4-5, 7-8, 9-10
- (7b) NÅ’I I SAINA GLORIA YAN ONRU.
Kantåyi i Saina nuebu na kånta;
kantåyi i Saina, todus i tanu’.
Sångan i gloriå-ña gi entalu’ i nasion siha;
gi entalu’ i taotåo siha, i manna’manman na fina’tinås-ña.
INEPPI…..
Sa’ må’gas i Saina yan takkilu’ i matunå-ña,
Guiya para u mama’a’ñågui gi hilu’ todu i yi’us siha.
Sa’ tåya’ bidan-ñiñiha i yi’us i nasion siha,
låo i Saina Guiya fuma’tinas i langit.
INEPPI…..
Nå’i i Saina, hamyu ni familian nasion siha,
nå’i i Saina gloria yan i minetgut;
nå’i i Saina ni Ha miresi i na’ån-ña na gloria!
Fanmañuli’ guatu rigålu, ya fanhålum gi templon-ña.
INEPPI…..
Saluda i Saina, gåtbu i sinantos-ña.
Fanlåolåo gi me’nan Yu’us, todus hamyu ni manggaigi gi tanu’;
sångan gi entri i nasion siha: I Saina rai Gui’.
Si Yu’us Ha gubebetna i taotåo, Ha trårata parehu.
INEPPI…..
SIGUNDU NA TINAITAI 1 Thes 1:1-5b
Un tinaitai ginin i finene’na na Kattan San Pablo para i taotåo ‘Thessalonica’
Ginin as Pablo, yan ‘Silas’, yan Timoteo–Para i taotåo siha gi Gima’Yu’us ‘Thessalonica’, ni manggaigi gi as Yu’us Tåta yan i Saina as Jesukristo: I gråsia yan i pås u iyun-miyu.
Todu i tiempu in nana’i gråsia si Yu’us put hamyu todus yan todu i tiempu in mensiosiona hamyu gi tinayuyut-måmi. In hahassu gi me’nan i Yi’os-ta yan Tatå-ta na en praktitika i hinenggin-miyu, yan ginin i ginefli’i’-miyu na duru hamyu manmacho’chu’, yan fitmi i inangokkun-miyu gi Saina as Jesukristo. Mañe’lu-hu, in tingu’ ha’ na mangguinaiya hamyu as Yu’us ya esta maninatyik hamyu para iyon-ña. Anai in chili’i hamyu ni Maolik na Nutisia åhi’ ti gi palåbra ha’ låo kuntodu minetgut yan kuntodu gi Espiritu Såntu, yan kuntodu i kabålis na siguridåt na manmagåhit atyu siha.
I finu’ i Saina.
IBANGHELIU Mt 22, 15-21
ÅLELUIA Phil 2:15d-16a
- Åleluia. FANMAÑILA’ GI TANU’ KALANG MANMA’LAK NA ISTREYAS,
SA’ EN UFRERISI SIHA NI FINU’ LINA’LA’.
- Åleluia.
+ Un tinaitai ginin i såntu Ibangheliu sigun gi tinigi’ San Mateo
Manhånåo i MamFarisehu ya matutuhun maplanuyi taimanu nai para u mana’goddun si Jesus ginin i fino’-ña. Mana’fanhånåo i disipulun-ñiha yan atyu siha i dumalalalaki si Hirodes guatu gi as Jesus ya mafaisin Gui’, “Ma’estru, in tingu’ na i minagåhit ha’ Un såsangan yan mama’nåna’gui Håo ni chachalan Yu’us sinseramenti. Ti ume’eklasi Håo yan ti ma’å’ñåo Håo håfa para u masångan ni taotåo. Pues sangåni ham fan ni upiñon-mu put esti na kåosa: Kåo kumbeni na u ma’apåsi i kuntribusion para i imperadot pat åhi’?” Ha ripåra si Jesus i baba na hinassun-ñiha ya ilek-ña nu siha, “Sa’ håfa na en na’kekegoddun Yu’, hamyu ni manhipokritu? Fanu’i Yu’ nu i salåppi’ ni ma’u’usa para i kuntribusion.” Anai manå’i Gui’ un pidåsun salåppi’ i Romånu, Ha faisin siha, “Håyi gái ímahen yan håyi gai na’an esti?” Manmanoppi siha, “Iyun Caesar.”
Pues ennåo na ilek-ña nu siha, “Intonsis, apåsi si Caesar ni iyun Caesar yan apåsi si Yu’us ni iyun Yu’us.”
I Ibangheliun i Saina.
