FINE’NA NA TINAITAI Is 55, 1-3
Un tinaitai ginin i Lepblun i Prufeta as Isaias
Ilek-ña i Saina:
Todu hamyu ni manmå’hu,
fanmamaila’ para i hanum!
Todu hamyu ni manaisalappi’,
fanmamaila’, risibi i grånun trigu yan en kannu’;
Fanmamaila’, sin en fanmanapåsi yan sin gåstu,
fanggimin binu yan letchi!
Sa’ håfa na para en gasta i salåppi’-miyu gi atyu i ti pån;
i suetdun-miyu gi atyu i ti siña numa’haspuk?
Ekkunguk Yu’, ya siempri mañotchu hamyu måolik,
siempri manmaguf hamyu gi rikesa.
Fanmamaila’ giya Guåhu ya en gef ripåra,
ekkunguk, kosa ki en fanggai lina’la’.
Bai Hu rinueba yan hamyu i taihinekkuk na kuntråta,
i minaolik ni ma’asigura si David.
I finu’ i Saina.
INEPPIN I SÅTMU Ps 145, 8-9. 15-16. 17-18
R. (16) I KANNAI I SAINA MUNA’FAÑOCHOTCHU HIT;
HA O’OPPI TODU I NISISIDÅT-TA.
I Saina kariñosu yan yo’asi’,
ñating lalålu’ yan misin ginefli’i.
Måolik i Saina para todu
ya Ha ma’asisi’i todu i fina’tinås-ña.
INEPPI…..
I matan todu ma’a’atan Håo kun inangokku;
ya Un nåna’i siha nengkannu’-ñiha gi ma’apunta na tiempu.
Un baba i kannai-mu
ya Un na’satisfetchu i minalagu’ todu i manlåla’la’ na kosas.
INEPPI …
Tunas Håo Asaina gi todu i bidå-mu,
fiet Håo gi todu i che’cho’-mu.
Hihut Håo, Asaina, para atyu siha i umå’agang Håo,
para atyu siha i umå’agang Håo gi minagåhit.
INEPPI…..
SIGUNDU NA TINAITAI Rom 8, 35. 37-39
Un tinaitai ginin i Kattan San Pablo para i taotåo Roma
Hafañe’lus:
Intonsis håyi para u sipåra hit ginin i ginifli’i’ i Kristo? Kåo i prublema, pat i chinatsaga, osino yanggin manmapetsigi hit, pat i niñalang osino i pinepbli pat i piniligru osino i finatai?
Låo gi todu esti siha, hita manmanggånna ginin Guiya ni gumufli’i’ hit! Siguru yu’ na tåya’ siña sumipåra hit ginin i ginifli’e’-ña: ni i finatai osino i lina’la’, ni i manånghit osino ottru manmå’gas i langit, osino pudet, ni i prisenti osino i mamamaila’ na tiempu, ni i sanhilu’ na tånu’ osino i sampapa’ na tånu’–ni håfa gi todu i nina’huyung siha u siña sumipåra hit ginin i ginifli’i’ Yu’us ni manmanå’i hit para iyot-ta ginin i Kristo Jesus i Saina-ta.
I finu’ i Saina.
IBANGHELIU Mt 14, 13-21
ÅLELUIA
R. Åleluia. TÅYA’ LÅLA’LA’ GININ I PÅN HA’,
LÅO GININ I FINIHU’ NI MÅFATTU GININ I PACHUT YU’US.
R. Åleluia.
+ Un tinaitai ginin i såntu Ibangheliu sigun gi tinigi’ San Mateo
Anai Ha hunguk si Jesus put i finatai Juan i manakpåpangi, ma’udai gi boti ya humånåo
Guiguiya ha’ na maisa para un lugåt ni tåya’ tåotåo. Mahunguk ni linahyan esti, pues manmamokkat ya madalalaki Gui’ ginin i sengsung siha. Anai tumunuk si Jesus ginin i boti ya Ha li’i’ i linahyan tåotåo, nina’ma’åsi’ i kurason-ña, ya Ha na’fanhomlu’ i manmalångun-ñiha.
Anai kumekehomhum, manmåttu i mandisipulu-ña ya masangåni Gui’, “Tåya’ sumåsaga guini na lugåt ya esta kalang atrasåo. Sotta i taotåo siha ya u fanhånåo para i sengsung ya u fanmamåhan na’-ñiha.”
Mansinangåni siha as Jesus, “Ti prisisu na u fanmachalapun. Hamyu mismu nå’i siha na’ñiha.”
Manmanoppi siha, “Tåya’ guini sino ki ennåo ha’ i singku pidåsun pån yan dos guihan.”
Ilek-ña si Jesus nu siha, “Chuli’ mågi ennåo.” Dispues Ha tågu’ i linahyan tåotåo para u fanmatå’chung gi cha’guan. Ha chuli’ i singku na pidåsun pån yan dos guihan, ya tumalakhilu’ gi langit, Ha bendisi ya Ha ipi’ i pån ya Ha nå’i i mandisipulu-ña ya siha pumåtti i taotåo siha. Todu atyu siha i maniståba mañotchu asta ki manhåspuk. I ngatnan anai marikohi bula ha’ dossi na kanåstra. Atyu siha i maniståba guihi mås ki singku mit fuera di i famalåo’an yan famagu’un.
I Ibangheliun i Saina.
