FINE’NA NA TINAITAI Gn 18, 1-10a
Un tinaitai ginin i Lepblun ‘Genesis’
Finatoigui si Abrahan nu i Saina gi fi’un i trongkun ‘terebinth’ giya Mamre, mientras matåta’chung gi intrådan i gimå’-ña palapåla, anai esta mamaipi i ha’åni. Anai tumalak hilu’, ha li’i’ tres na lalåhi manotohgi gi uriyå-ña. Anai ha li’i’ esti siha, malågu ginin i intrådan i gimå’-ña palapåla para u fantinaggam siha; ya anai mañaluda påpa’ ilek-ña: “Siñoris, sedi yu’ ya bai hu faisin hamyu ni esti na fabot, cha’-miyu fanhåhahnanåo. U machuli’ mågi dididi’ hånum ya en fa’gåsi i adding-miyu, yan dispues fandiskånsa gi papa’ esti na trongkun håyu. Yåki esta manmåttu hamyu bai hu chuli’ mågi dididi’ nengkannu’, ya en na’fanfresku hamyu; ya dispues nai en fanhånåo gi hinanao-miyu.” Manmanoppi i tres, “Måolik ennao, cho’gui håfa ilek-mu.”
Humålum insigidas si Abrahan gi palapåla ya ha sangåni si Sarah, “Såhyåo, fañuli’ tres mididan harina! Yaka’ ya un fama’tinas pån.” Malågu si Abrahan para i katdumin guaka ya ha atyik i mañaña’ sinsen-ña na tatneru ya ha nå’i i sitbinten-ña ya ha na’lågu insigidas. Dispues ha chuli’ i letchi yan nåtas letchi, yan i katni ni mapripåra, ya ha plånta esti gi me’nan-ñiha; ya ha setbi siha gi papa’ i trongkun håyu mientras mañochotchu.
Mafaisin gui’, “Månggi i asaguå-mu as Sarah?” Manoppi, “Gaigi gi halum palapåla.” Unu gi entri siha ilek-ña, “Siempri måttu yu’ ta’lu guini gi ottru såkkan, ya siempri esta gai lahi si Sarah.”
I finu’ i Saina.
INEPPIN I SÅTMU Ps 15, 2-3. 3-4. 5
R. ATYU I CHUMOCHO’GUI I TINAS U LÅ’LA’ GI ME’NAN I SAINA.
Atyu i mamomokkat sin isao yan ha chocho’gui i tininas;
ni sumåsangan i minagåhit gi kurason-ña;
Yan ti ha na’måmancha i ottru tåotåo siha ni hila’-ña.
INEPPI…..
Ti ha na’lålamin i prohimu-ña,
ni ti ha sånganñañaihun siha;
Ginin guiya na manmachatlili’i’ i manailayi,
mientras ha o’onra atyu siha i manma’åñao nu i Saina.
INEPPI…..
Ti mama’ganånansia ni salappe’-ña
ya ti manaksesepta salåppi’ kontra i manunas.
Atyu i chumocho’gui esti siha
ni ngai’an nai u ma’istotba.
INEPPI…..
SIGUNDU NA TINAITAI Col 1, 24-28
Un tinaitai ginin i Kattan San Pablo para i taotåo ‘Colossae’
Hafañe’lus:
På’gu maguf yu’ put i pinadisi-hu put hamyu, sa’ ginin esti na pinadesi hu ayuyuda muna’kabålis håfa tetehnan gi pinadesin i Kristo put i tataotåo-ña, era i Gima’Yu’us. Esta yu’ mafa’tentågu’ i Iklesian Yu’us, ni guiya numå’i yu’ ni esti na cho’chu’ para bai hu cho’gui para minaolik-miyu. Guiya esti na cho’chu’ atyu i para u mapruklåma kabålis i minsåhi, guiya esti atyu na sikretu i Ha nå’na’ ginin todu i taotåo siha desdi i manmaloffan na tiempu ya på’gu nai Ha na’matutungu’ ni taotåo-ña. I plånun Yu’us era i para u na’matungu’ ni taotåo-ña i sikritu-ña, esti i riku yan gloriosu na sikretu ni gaigi giya Guiya para todu i taotåo siha. Esti na sikretu era i Kristo ni gaigi giya hamyu, ni kumeke’ilekña na para en fañåonåo gi glorian Yu’us. Pues in setmunñañaihun i Kristo para todu. In i’isa todu klåsin tinemtum para in akunseha yan para in fa’nå’gui siha para ki siña in kenni’ todu siha guatu gi me’nan Yu’us kumu mano’a na tåotåo mandadaña’ yan i Kristo.
I finu’ i Saina.
IBANGHELIU Lk 10, 38-42
ÅLELUIA Lk 8. 15
R. Åleluia. MANMAGUF ATYU SIHA I MANSÅTTUN KURASON-ÑIHA
KUMUMPLI I FINIHU’,
YAN MANMANGUSETCHA GININ I MINESNGUN-ÑIHA.
R. Åleluia.
+ Un tinaitai ginin i såntu Ibangheliu sigun i tinigi’ San Lucas
Måttu si Jesus gi un songsung ya tinaggam Gui’ ni un palåo’an ni na’ån-ña si Martha. Gai che’lu gui’ Maria ni matå’chung påpa’ gi adding i Saina para u ékkunguk i fina’na’guen-ña. Nina’båba si Martha sinienteñ-ña sa’ guiya ha’ todu i che’chu’; pues malak guatu ya ilek-ña, “Asaina, kåo ti inistototba håo ni ennao i che’lu-hu sa’ ha sotta todu i che’chu’ para guåhu? Sangåni gui’ fan ya u mamaila’ ya u ayuda yu’!” Ineppi gui’ nu i Saina, “Martha, Martha! Meggai chathinassoso-mu yan inistototba håo ni meggai siha na kosas, låo una kosa ha’ prisisu. Dinanchi inayek-ña si Maria, ya ti u ma’åmut ni ennao.”
I Ibangheliun i Saina.
