FINE’NA NA TINAITAI Dt 30, 10-14
Un tinaitai ginin i Lepblun ‘Deuteronomy’
Ilek-ña si Moises nu i taotåo siha: “I mohun ya en ekkunguk i bos i Saina, i Yi’us-miyu ya en che’gui i tinago’-ña yan i areklamenton-ña ni manmatugi’ guini na lepblun lai, anai en bira hamyu tåtti gi Saina, i Yi’us-miyu, yan todu i kurason yan i antin-miyu.
“Sa’ esti na tinagu’ i hu fafaisin hamyu para en kimpli på’gu na ha’åni ti mistiriosu yan ti chågu’ ginin hamyu. Taigui guihi hulu’ gi langit na para en aluk, ‘Håyi para u falak hulu’ gi langit ya para u chuli’i’ hit, kosaki siña ta kumpli?’ Osino gaigi gi ottru båndan tåsi, ya para en aluk, ‘Håyi para u hånåo gi tasi ya para u chuli’i’ hit, kosaki siña ta kumpli?’ Åhi’ ti taiguennao, sinoki gof hihut giya hamyu, esta gaigi gi pachut yan gi kurason-miyu; hokkuk ha’ para en che’gui i para en kimpli.”
I finu’ i Saina.
INEPPIN I SÅTMU Ps 69, 14. 17. 30-31. 33-34. 36. 37
R. (33) ISPIHA I SAINA GI NISISIDÅT-MIYU, YA SIEMPRI EN FANLÅ’LA’.
Lao hu tåtayuyut Håo, Asaina,
para Un ékkunguk i ginagågåo-hu.
O Yu’us, gi dangkulun kariñu-mu ékkunguk yu’
ni siguru na ayudu-mu.
Oppi yu’, Asaina, sa’ geftao i guinaiyam-mu;
gi dangkulun mina’ase’-mu bira Håo mågi giya guåhu.
INEPPI…..
Låo malångu yan puti yu’;
prutehi yu’ ni ayudu-mu, O Yu’us.
Ya bai hu tuna gi kanta i na’an Yu’us,
yan bai hu tuna Gui’ ginin i agradisimentok-ku.
INEPPI…..
“Hamyu ni manakpapa’, atan, ya en fanmaguf;
hamyu ni umispipiha si Yu’us, u fanmaguf kurason-miyu!
Sa’ i Saina Ha huhunguk i pepbli,
ya ti malelefa ni manmapreresu.”
INEPPI…..
Sa’ si Yu’us para u såtba iya Sion
ya u kåhat di nuebu i siudå siha giya ‘Judah’.
I disindensian i tentago’-ña siha u inirensia,
ya atyu siha i gumuaiya i na’ån-ña u fañåga guennao.
INEPPI…..
SIGUNDU NA TINAITAI Col 1, 15-20
Un tinaitai ginin i Kattan San Pablo para i taotåo ‘Colossae’
I Kristo Guiya i a’annuk na imåhin i ti a’annuk na Yu’us.
Guiya i primirisa na Patgun Låhi, ni takkilo’ña ki todu i manmafa’tinas siha.
Ginin Guiya na si Yu’us Ha fa’tinas todu i kosas siha gi langit yan gi tånu’,
i mana’annuk yan i ti mana’annuk na kosas siha, kuntodu i espirituhåt na fuetsa,
i saina siha, i manmå’gas yan i åoturidåt siha.
Ha fa’tinas si Yu’us interu i tanu’ yan i langit ginin Guiya yan para Guiya.
Mo’na i Kristo gaigi ki todu i kosas siha,
ya gi dinanña’ yan Guiya todu i kosas siha guaha sagan-ñiha.
Guiya i kabesan i tataotåo-ña, era i Gima’Yu’us;
ya ginin Guiguiya i lina’la’ i tataotåo.
Guiya i primirisa na Patgun Låhi, ni mana’lå’la’ ginin i finatai,
kosaki Guiya ha’ na maisa u primeru gi todu i nina’huyung siha.
Ginin i disision Yu’us ha’ mismu na gaigi gi Lahi-ña i kabålis na naturåt Yu’us.
Ennåo na si Yu’us Ha disidi para u na’ta’lu tåtti giya Guiya interu i tånu’ yan i langit
ginin i Lahi-ña.
Ha na’fåttu si Yu’us i pås ginin i sakrifision i finatai i Lahi-ña gi kilu’us,
ya ginin esti na Ha na’ta’lu tåtti giya Guiya interu i kosas siha, gi tanu’ yan kuntodu gi langit.
I finu’ i Saina.
IBANGHELIU Lk 10, 25-37
ÅLELUIA Jn 6, 64, 69
R. Åleluia. ASAINA, I FINO’-MU ESPIRITU YAN LINA’LA’,
GAIGI GIYA HÅGU I FINU’ I TAIHINEKKUK NA LINA’LA’.
R. Åleluia.
+ Un tinaitai ginin i såntu Ibangheliu sigun i tinigi’ San Lucas
Un abugåo måttu guatu para u chagi muna’kegoddun si Jesus. Ilek-ña, “Ma’estru, håfa debidi bai hu cho’gui para bai hu gånna i taihinekkuk na lina’la’?” Ineppi gui’ as Jesus, “Håfa matugi’ gi lai? Håfa kinemprendem-mu?” Manoppi i taotåo: ” ‘Debidi un gofli’i’ i Saina i Yi’os-mu yan todu i kurason-mu, yan todu i anti-mu, yan todu i fuetsåm-mu, yan todu i hinassom-mu; yan i prohimu-mu taiguihi i ginefli’e’-mu nu hågu mismu.’ ” Ilek-ña si Jesus, “Dinanchi i ineppem-mu, cho’gui esti ya siempri un lå’la’.”
Låo malagu’ i abugåo na u matungu’ na tutunas ha’ i bidå-ña put ennåo na ha faisin si Jesus, “Låo håyi i prohimu-hu?” Manoppi si Jesus, “Un tåotåo humåhanåo påpa’ ginin Hirusalen para ‘Jericho’, anai ma’atåka gui’ nu i mansakki, mana’sin magågu yan ma’anña gui’, dispues masotta gui’ kumekematai. Umafakcha’ na tototunuk lokkui’ gi chalan un påli’ i ManHudihos; anai ha li’i’ gui’ umisgin i ottru båndan chålan ya humåhnanåo. Taiguennåo ha’ lokkui’ bidå-ña i Ayudåntin i Templu, humånåo guatu ya ha atan i taotåo, dispues malak i ottru båndan chålan ya humåhnanåo. Låo un Samaritånu ni pumasesehu maloffan lokkui’ guennao ya anai ha li’i’ gui’ nina’piniti kurason-ña. Malak guatu ya ha palala’i låña yan binu i chetnot-ña ya ha be’i; dispues ha na’ma’udai i taotåo gi ga’-ña gå’ga’ ya kinenni’ gui’ guatu gi fina’guma’, ya inasisti gui’. Gi sigenti diha ha laknus dos pidåsun salåppi’ ya ha nå’i i gai gima’, ya ilek-ña, ‘Asisti esti na tåotåo ya gi biradå-hu bai hu apåsi håo ni gastom-mu nu guiya.’ ” Putlus uttimu ilek-ña si Jesus, “Håyi guini gi tres muna’annuk na prohimu-ña esti na tåotåo ni ma’anña ni mansakki?” Manoppi i abugåo, “Atyu i muma’åsi’ nu guiya.” Manoppi si Jesus, “Pues hånåo ya un cho’gui taiguennao lokkui’.”
I Ibangheliun i Saina.
