FINE’NA NA TINAITAI 1 Kgs 19, 9a . 11-13a
Un tinaitai ginin i primet na Lepblun i Manrai
Måttu si Elijah gi liyang giya ‘Horeb’, i sabånan Yu’us, ya ennåo nai sumåga. Dispues ilek-ña i Saina, “Hånåo huyung ya un tohgi gi sabåna gi me’nan i Saina; para u faloffan i Saina.” Un metgut yan makkat na månglu’ yumayamak i sabåna siha yan umi’ipi’ i atchu’ gi me’nan i Saina—låo taigui i Saina gi halum i manglu’. Dispues di i manglu’ i linåo—låo taigui i Saina gi linåo. Dispues di i linåo måttu i guafi—låo taigui i Saina gi guafi. Dispues di i guafi måttu un suåbi na guinaifin månglu’. Anai ha hunguk esti si Elijah ha tåmpi i matå-ña gi halum i kapå-ña ya humånåo ya tumohgi gi intrådan i liyang.
I finu’ i Saina.
INEPPIN I SÅTMU Ps 85, 9. 10. 1l-12, 13-14
R. (7) ASAINA, NA’LI’I’ HAM NU I YINE’ASE’-MU,
YAN NÅ’I HAM NU I SATBASION-MU.
Bai hu ékkunguk håfa Ha pruklåma si Yu’us;
sa’ i Saina Ha pruklåma pås para i taotåo-ña.
Hihut esta i satbasion para i mamfiet;
u bula rikesa gi tano’-ta.
INEPPI…..
U asudda’ i guinaiya yan i minagåhit;
u áchiku i hustisia yan i pås.
U petsan huyung i minagåhit ginin i tanu’;
ya u talakpapa’ ginin i langit i hustisia.
INEPPI…..
I Saina u chuda’ påpa’ i bendision-ña;
ya u bula kusetchån-ña i tano’-ta.
U fofo’na i rikesa gi me’nån i Saina,
yan u giniha gi uriyan i pinikåt-ña.
INEPPI…..
SIGUNDU NA TINAITAI Rom 9, 1-5
Un tinaitai ginin i Kattan San Pablo para i taotåo Roma
Hafañe’lus:
I minagåhit hu såsangan, iyun i Kristo yu’ ya ti mandadagi yu’. I kunsensiåk-ku lokkui’, ni ginigiha ni Espiritu Såntu, ha asigugura yu’ na ti mandadagi yu’ anai hu sångan na mandångkulu siha i piniti-hu, na tåya’ finakpu’-ñiha i pinadesin i kurason-hu para i taotåo-hu siha, era atyu siha sinsen-hu yan hagå’-hu! Put siha na hu diseha na guåhu mohun u matdisi si Yu’us ya bai hu ma’apåtta ginin i Kristo. Tåotåo Yu’us siha; Ha na’famagu’on-ña ya Ha na’matungu’ nu siha i gloriå-ña; Ha fa’tinas i kuntratå-ña nu siha ya Ha nå’i ni Lai; siha gumogo’ti i magåhit na adorasion; esta marisibi i prumesan Yu’us siha; manmafañågu siha ginin i mamfamosu na Hibrehu; ya i Kristo, kumu tåotåo Gui’, såsaonåo Gui’ gi rasan-ñiha. Puedi si Yu’us, ni Ha gubebetna todu, u matuna para todu i tiempu! Åmen.
I finu’ i Saina.
IBANGHELIU Mt 14, 22-33
ÅLELUIA
R. Åleluia. Mahålang yu’ hu nanangga i Saina,
i anti-hu ha nanangga i fino’-ña.
R. Åleluia.
+ Un tinaitai ginin i såntu Ibangheliu sigun gi tinigi’ San Mateo
Anai manhåspuk i linahyan tåotåo Ha insisti si Jesus na u fanma’udai gi boti i mandisipulu-ña ya u fanmofo’na guatu gi ottru båndan hagoi, mientras Ha rititira i taotåo siha. Dispues di Ha na’fanhånåo si Jesus i taotåo siha, humånåo Gui’ na maisa hulu’ gi eksu’ para u fanåyuyut, ya Guiguiya ha’ na maisa guennåo anai kumeke homhum. Mientras tåntu, i boti ni esta måolik chinago’ña huyung tinituhun chinalåochåo ni napu sa’ mumetgut i manglu’. Kåsi ennåo i alas tres gi chatanmak mali’i’ Gui’ guaguaguatu giya siha mamomokkat gi hilu’ i hanum. Anai mali’i’ Gui’ na mamomokkat gi hilu’ hånum nina’fansen luhan i mandisipulu. Ilik-ñiha, “Ennagui’ i fafa’ñagui,” ya gi mina’a’ñao-ñiha manessalåo. Insigidas maninasigura siha as Jesus “Na’fantrangkilu ha’ hamyu! Guåhu ha’. Cha’-miyu fanma’å’a’ñåo!” Kumuentus si Pedro ya ilek-ña, “Asaina, yanggin magåhit na Hågu, tågu’ yu’ ya bai hu famokkat gi hilu’ hånum guatu giya Hågu.” Ilek-ña si Jesus, “Maila’!” Pues humuyung si Pedro gi boti ya ha tutuhun mamokkat gi hilu’ hånum guatu para as Jesus. Låo anai ha sienti na gof metgut i manglu’, muma’å’ñåo gui’ ya ha tutuhun mañokñuk, pues umessalåo, “Asaina, na’libri yu’!” Ha istira huyung i kannai-ña, “Ai na ninátata i hinenggem-mu! Håfa na muma’å’ñåo håo?” Gigun humålum i dos gi boti, pumåra i manglu’. Atyu siha i maniståba gi halum i boti ma’adora Gui’ ilik-ñiha, “Sin duda, magåhit, Hågu i Lahin Yu’us.”
I Ibangheliun i Saina.
