FINE’NA NA TINAITAI Is 66, 10-14c
Un tinaitai ginin i Lepblun i Prufeta as Isaiah
Taiguihi ilek-ña i Saina:
Fanhamyu manmaguf yan iya Hirusalen ya na’fanguntentu hamyu put guiya,
todu hamyu ni gumuaiya gui’;
Na’fansen maguf hamyu yan guiya,
todu hamyu ni mampininiti put guiya!
I mohun ya un saonåo sumusu
gi letchin i kunsuelu-ña,
Ya un maguf gumimin letchi
gi misin na sisu-ña!
Sa’ taiguihi ilek-ña i Saina:
Bai Hu riega gui’ rikesa kalang sadduk,
ya i rikesan i nasion siha u fanaiguihi i machuchuda’ na milak.
Kumu neni siempri manhineggui hamyu gi kannai-ña,
ya en fangkinariñu gi hilo’-ña;
Taiguihi yanggin ha kunsuela i nana i lahi-ña,
Guåhu lokkui’ bai Hu kunsuela hamyu;
ya siempri en sedda’ i kunsuelun-miyu giya Hirusalen.
Yanggin en li’i’ esti, siempri manmaguf i kurason-miyu,
ya u fanlå’la’ i tataotåo-miyu kalang chå’guan.
Ya i fuetsan i Saina siempri matungu’ ni sitbinten-ña.
I finu’ i Saina.
INEPPIN I SÅTMU Ps 66, 1-3. 4-5. 6-7. 16, 20
R. PO’LU YA U ESSALÅO I TANU’ GI MINAGUF PARA SI YU’US
Fanessalåo kun minaguf para si Yu’us, todu hamyu ni manggaigi gi tanu’;
kantåyi tinina para i glorian i na’ån-ña;
pruklåma i takkilu’ na matunå-ña.
Sangåni si Yu’us, “Manna’manman siha i bidå-mu!”
INEPPI…..
“Todu i manggaigi gi tanu’ mandimu gi me’nå-mu;
makantåyi Håo, makantåyi i na’ån-mu!”
Fanmamaila’ ya en li’i’ i che’chu’ Yu’us,
manna’manman bidå-ña para hita.
INEPPI…..
Ha tulaika i tasi para un ånglu’ na tånu’,
manmamokkat siha gi entalu’ i sadduk;
pues maila’ ya ta fanmaguf giya Guiya.
Manggubebetna ni minetgot-ña para todu i tiempu.
INEPPI……
Fanekkunguk, todu hamyu ni manma’åñao as Yu’us,
mientras hu diklårara håfa bidå-ña nu guåhu.
U matuna si Yu’us ni Ha nåna’i yu’ ni malago’-hu
i mina’åsi’ ni hu gågagåo gi tinayuyut.
INEPPI…..
SIGUNDU NA TINAITAI Gal 6, 14-18
Un tinaitai ginin i Kattan San Pablo para i taotåo ‘Galatia’
Hafañe’lus:
Låo guåhu hokkuk ha’ nai bai hu banidosu put i kilu’us i Saina as Jesukristo; sa’ put i kilu’os-ña na i tanu’ måtai giya guåhu, yan guåhu måtai yu’ para i tanu’. Tåya’ ni håfa bali-ña kåo masetkumsisio i taotåo pat åhi’; hokkuk ha’ bali-ña i para un huyung nuebu na fina’tinas. Para atyu siha na tåotåo i dumalalalaki esti na lai gi lina’la’-ñiha, i pås yan mina’åsi’ u gaigi giya siha–giya siha yan gi todu i taotåo Yu’us!
Putlus uttimu: cha’-ña ni unu umatburorota yu’ mås, sa’ i paladang ni gaigi gi tataotåo-hu muna’a’annuk na isklåbun Jesus yu’.
I grasian i Saina-ta as Jesukristo u gaigi giya hamyu, hafañe’lus. Åmen.
I finu’ i Saina.
IBANGHELIU Lk 10, 1-12. 17-20,
ÅLELUIA Col 3, 15-16
R. Åleluia. PUEDI I PÅS I KRISTO U FANGGUBETNA GI KURASON-MIYU;
YAN I KINABÅLIS I FINANA’GUEN-ÑA U LÅ’LA’ GI SANHALUM-MIYU. R. Åleluia.
+ Un tinaitai ginin i såntu Ibangheliu sigun i tinigi’ San Lucas
Dispues di esti, manapunta i Saina sitentaidos mås na disipulu ya Ha na’fanhånåo siha dos in dos para todu i sengsung yan lugåt siha ni para u bisita. Ilek-ña nu siha, “Dinanchi na såkkan i kusetcha låo dididi’ ha’ para u fanmango’ku’; pues faisin i ma’gas i kine’ku’ ya u ná’hånåo mås mamfafacho’chu’ para u fanmango’ku’. Fanhånåo ya hahasso esti: Hu na’fanhahanåo hamyu kalang kinilu gi entalu’ i lobu siha. Cha’-miyu fanmangingilili båstun pat balutan; cha’-miyu fansinandådalias yan cha’-miyu fanmañaluluda ni håyi gi chalan. Maseha månu na guma’ nai manhålum hamyu, sångan fine’na, ‘Pås para esti na guma’.’ Yanggin guaha pasifiku na tåotåo guennåo, pues siempri oggan i pås-miyu giya guiya; låo yanggin tåya’, pues siempri tuma’lu tåtti i pås giya hamyu. Fañåga gi etmismu guma’ ya kannu’ yan gimin håfa guahan-ñiha, sa’ i hutnaleru chumilung yan i apås-ña. Cha’-miyu tulalaika i sagan-miyu desdi un guma’ asta ottru. “Maseha månu na siudå nai manhålum hamyu, dispues di manmataggam hamyu, kannu’ håfa maplånta gi me’nan-miyu, yan na’fanhomlu’ i manmalångu guennåo. Sangåni siha, ‘Måttu esta i Rainun Yu’us.’ Låo yanggin ti manma’aksepta hamyu nu i taotåo gi sengsung ni manhålum hamyu fanhånåo para i chalan ya en aluk, ‘Bai in tantan i petbus esti na songsung ginin i adding-måmi kuentan testimoniu kontra hamyu. Låo kumprendi na hihut esta i Rainun Yu’us.’ Bai Hu asigura hamyu, na siempri menus kastigu-ña Sudoma ki esti na klåsin songsung.
Manmåttu tåtti i sitentaidos mansen maguf ya ilik-ñiha, “Ma’estru, kuntodu i manganiti siha manmanosgi ni tinagu’-måmi gi na’ån-mu.” Gi ineppen-ña si Jesus ilek-ña, “Hu li’i’ si Satanås basnak kalang låmlam ginin i langit. Atan ha’ håfa bidå-hu; Hu nå’i hamyu pudet para en gatcha’ i kulepbla yan i iskopiu yan todu i fuetsan i inimigu, ya tåya’ para en fannina’chetnudan. Låo na’mås dångkulu minaguf-miyu put i manmatugi’ i na’an-miyu gi langit ki put i manggái pudet hamyu kontra i aniti.”
I Ibangheliun i Saina.
