FINE’NA NA TINAITAI Jer 20, l0-l3
Un tinaitai ginin i Lepblun i Prufeta as Jeremiah
“Hunggan, hu hunguk i ñangun meggai na tåotåo:
“Manna’ma’ñåo gi todu i bånda!
Rinunsia! maila’ ya ta rinunsia gui’!”
Todu atyu siha i ginin manamigu-hu
manmaguf ma’a’atan i linachi-hu.
‘Siña ha’ goddon gi ekkudu; ya siempri manmanggånna hit,
ya ta na’empas.’
Låo humahami yan i Saina, kalang i mås metgut:
u fanmatompu’ i pumetsisigi yu’, ti u fanmanggånna.
Gi manmapeddin-ñiha u mana’fanmamåhlåo,
para todu i tiempu, gi ti siña mamaleffanñaihun na
klåsin disareklåo.
O Asainan i ehetsitu siha, Hågu chumachagi i manunas,
Hågu umeksamimina i hinassu yan i kurason,
sedi yu’ para bai hu li’i’ i binggansåm-mu nu siha,
sa’ giya Hågu nai hu intrega i kausåk-ku.
Kantåyi i Saina,
tuna i Saina,
Sa’ Ha riskåta esti i lina’la’ i pepbli
ginin i fuetsan i tailayi! “Ilek-ña si Jeremiah:
I finu’ i Saina.
INEPPIN I SÅTMU Ps 69, 8-l0. l4. l7. 33-35
- (l4) ASAINA, GININ I DANGKULU NA GINIFLI’E’-MU, OPPI YU’.
Put Hågu na hu sungun i insuttu,
ya tinampi matå-hu ni minamåhlåo.
Mayuti’ñaihun yu’ ni mamparentes-su,
un istrangheru yu’ para i famagu’un nanå-hu,
Sa’ ha latchai yu’ i animu-hu put i gimå’-mu,
ya i insuttun atyu siha i chumatfinunu’i Håo mamopoddung gi hilo’-hu.
INEPPI…..
Låo hu tåtayuyut Håo, Asaina,
para Un ékkunguk i ginagågåo-hu.
O Yu’us, gi dangkulun kariñu-mu ékkunguk yu’
ni siguru na ayudu-mu.
Oppi yu’, Asaina, sa’ geftao i guinaiyam-mu;
gi dangkulun mina’ase’-mu bira Håo mågi giya guåhu.
INEPPI…..
“Hamyu ni manakpapa’, atan ya en fanmaguf;
hamyu ni umispipiha si Yu’us, u fanmaguf kurason-miyu!
Sa’ i Saina Ha huhunguk i pepbli,
ya ti malelefa ni manmapreresu.
Un matuna ni langit yan i tanu’,
kuntodu i tasi yan todu siha i mangalalamtin gi halum tåsi!”
INEPPI…..
SIGUNDU NA TINATAI Rom 5, 12-15
Un tinaitai ginin i Kattan San Pablo para i taotåo Roma
Hafañe’lus:
Ginin un låhi na måttu i isao gi tanu’, ya i isåo-ña ha na’fåttu i finatai. Put esti na machalapun i finatai gi todu i taotåo siha sa’ put todu manisao. Esta guaha isao gi tanu’ åntis di u mana’huyung i Lai; låo anai tåya’ lai tåya’ isao ma’apunta påpa’. Låo desdi i tiempun Adan asta i tiempun Moises manhåli’ i isao gi todu i taotåo siha, achukka’ atyu siha na tåotåo i ti manisao parehu yan si Adan anai ti ha osgi i tinagu’ Yu’us.
Si Adan figuran atyu i para u fåttu. Låo ti parehu i dos, sa’ i geftåo na rigålun Yu’us ti parehu yan i isao Adan. Hunggan magåhit na bula manmåtai na tåotåo put i isao atyu na låhi. Låo mås takkilu’ i gråsian Yu’us, yan i geftåo na rigalu-ña para i lahyan na tåotåo ginin i grasian atyu na låhi, era si Jesukristo.
I Finu’ i Saina.
IBANGHELIU Mt l0, 26-33
ÅLELUIA Jn 15, 26. 27
- Åleluia. I ESPIRITUN MINAGÅHIT U TISTIGUYI YU’, ILEK-ÑA I SAINA,
YA LOKKUI’ HAMYU PARA TISTIGU-HU.
- Åleluia.
+Un tinaitai ginin i såntu Ibangheliu sigun gi tinigi’ San Juan
Ilek-ña si Jesus nu i manapostules-ña:
“Cha’-miyu sesedi na en fanma’aminåsa ni taotåo siha. Tåya’ manåna’na’ ya ti u mana’annuk, yan tåya’ uma’attuk ya ti u matungu’. Håfa Hu sangåni hamyu gi hemhum, sånganñaihun gi manana. Håfa Hu sangåni hamyu ha’ na maisa, essalåoñaihun ginin i hilu’ åtuf. Cha’-miyu fanma’å’ñåo nu atyu siha ni siña pumunu’ i taotåo låo ti siña mapunu’ i anti. Inlugåt, ma’añågui atyu siha i siña yumamak kuntodu i tataotåo yan ånti giya Gehenna. Na ada ti gof baråtu nai mabebendi kada dos na paluman nossa’? Ya ombris ennåo tåya’ paluman nossa’ popoddung gi edda’ sin pitmisun Tatan-miyu. På’gu hamyu, kada gaputulu gi ilun-miyu esta manmatufung: Pues cha’-miyu fanma’å’a’ñåo ni håfa. Mås hamyu manggái bali ki i katdumin nossa’. “Maseha håyi ni rumikuknisa Yu’ gi me’nan tåotåo bai Hu rikuknisa gui’ gi me’nan Tatå-hu gi langit. Maseha håyi ni ti umatendi Yu’ gi me’nan tåotåo ti bai Hu atendi gi me’nan Tatå-hu gi langit.
I Ibangheliun i Saina.
