FINE’NA NA TINAITAI Is 49. 14-15
Un tinaitai ginin i Lepblun i Prufeta as Isaias
Ilek-ña si Sion, “Ha yuti’ yu’ esta i Saina;
maleffa esta nu guåhu i Saina.”
Kåo siña i nana maleffa ni neni-ña,
u tåya’ kariñu-ña para i patgun ni ginin i tiyån-ña?
Maseha i nana u maleffa,
Guåhu ni nungka nai bai maleffa.
I finu’ i Saina.
INEPPIN I SÅTMU Ps 62. 2-3. 6-7. 8-9
R. (6) ANTI-HU, GI SAINA HA’ NAI UN DISKÅNSA.
Gi Saina ha’ na maisa nai dumiskåkansa i anti-hu,
ginin Guiya nai måfattu i satbasion-hu.
Si Yu’us ha’ na maisa i atcho’-hu yan satbasion-hu,
i fanliheng-hu; ni ngai’an nai bai hu basnak.
INEPPI…
Gi Saina ha’ nai u diskånsa i anti-hu,
sa’ ginin Guiya na måfattu i inangukok-ku.
Si Yu’us ha’ na maisa i atcho’-hu yan satbasion-hu,
i fanliheng-hu; ni ngai’an nai bai hu basnak.
INEPPI…
Gi as Yu’us nai gaigi i pruteksion-hu yan gloriå-hu,
Guiya i metgut na atcho’-hu yan fanliheng-hu.
Angokku si Yu’us todu i tiempu hamyu ni taotåo-hu!
Basiha huyung i kurason-miyu gi as Yu’us, Guiya i fanliheng-ta!
INEPPI…
SIGUNDU NA TINAITAI 1 Cor 4. 1-5
Un tinaitai ginin i fine’na na Kattan San Pablo para i taotåo Corinth
Hafañe’lus:
Debidi en kunsidera ham kumu tentågu’ i Kristo, ni mana’fanengkatgåo ni sikretun i minagåhit siha ni ginin as Yu’us. Esti na tentågu’ debidi u fiet ni ma’gås-ña. Ti ma’å’ñåo yu’ kåo hamyu para en hisga yu’ pat håfa na kotti nai para bai hu mahusga; sa’ ni ti hu påpasa sintensia kontra guåhu na maisa. Klåru i konsensiåk-ku, låo ti kumeke’ilek-ña ennåo na tai’isåo yu’. I Saina Guiya para u påsa i sintensia giya guåhu. Pues cha’-miyu fanmamåmasa sintensia ni para håyi åntis di u fåttu i dinanchi na tiempu. I uttimu na sintensia debidi u nangga asta ki måttu i Saina; Guiya para u na’annuk gi manana i manhomhum siha na sikretu ya u plånta huyung i sikretu siha na minalagu’ tåotåo ni manggaigi gi hinassun-ñiha. Dispues nai kada unu u risibi ginin as Yu’us i tinina ni ha miresi.
I finu’ i Saina
IBANGHELIU Mt 6, 24-34
ÅLELUIA
R. Åleluia. I FINU’ YU’US LÅLA’LA’ YAN AKTIBU;
HA GUAGUAKLI I HINASSU YAN I MUTIBUN I
KURASON-TA.
R. Åleluia
+ Un tinaitai ginin i såntu Ibangheliu sigun gi tinigi’ San Mateo
Ilek-ña si Jesus ni mandisipulu-ña:
Tåya’ siña umisklåbun dos na åmu: siempri ha chatli’i’ i unu yan ha guaiya i ottru; ha na’fiet gui’ gi unu ya ha chatatan i ottru. Ti siña un setbi si Yu’us yan kuntodu i kepbli.
“Ennåo mina’ Hu sangångani hamyu: cha’-miyu fanchachathinasu håfa para en kannu’ pat en gimin ni para u sinisteni i lina’la’-miyu, patsino håfa para magågun-miyu. Na ada ti takkilo’ña i lina’la’ ki i nengkanu’? Na ti takkilo’ña lokkui’ i tataotåo ki i magågu? Atan ha’ i påharu siha ni manggugupu: tåya’ tinanum-ñiñiha, ni ti manmangusesetcha, pat mannana’etnun gi sagan pine’lu; låo mangginegef adahi as Tatan-miyu ni gaigi gi langit! Na ada ti mås manggáibali hamyu ki i paluma siha? Håyi giya hamyu siña muna’la’anaku’ unus kuåntus åñus i ha’ani-ña put i chachathinasu gui’? “Sa’ put håfa na manchachathinasu hamyu put magågu? Atan ha’ i floris siha gi halumtånu’: ti manmachocho’chu’ ni ti manmama’titinas magågu. Låo bai Hu sangåni hamyu na ni si Solomon gi riniku-ña taimagagu achabunitu yan esti siha na floris. Si Yu’us muna’fanminagågagu i floris siha gi halumtånu’. Chå’guan esti siha i manlala’chuk på’gu, låo manaigui agupa’, sa’ manmasonggi gi hetnu. Ada ti mås mamprisisu hamyu na en fanmana’minagågu? Ti metgut i hinenggin-miyu! “Pues cha’-miyu fanchachathinasu ya aluk: ‘Håfa para ta kånnu’? Pat håfa para ta gimin? Pat håfa para magagu-ta? ‘ (I MamPagånu esti ha’ inispihan-ñiñiha.) Ha gof tungu’ si Tatan-miyu gi langit na en nisisita esti siha. Inlugåt, nå’i ni atension-miyu fine’na i Rainun Yu’us yan i Ha dimåmanda, ya siempri Guiya en fannina’i ni pumalu siha na kosas ni en nisisita. Pues cha’-miyu fañachathinasu put agupa’; sa’ nahung ha’ para atburutu-ña agupa’. Ti guailayi en åomenta i atburotun kada diha.
I Ibangheliun i Saina.
