FINE’NA NA TINAITAI Jer 17, 5-8
Un tinaitai ginin i Lepblun i Prufeta as Jeremiah
Taiguini ilek-ña i Saina:
Matdision para i taotåo ni manangokku ottru tåotåo siha,
ni ha ispipiha i minetgot-ña gi sensin,
ni ha bibira i kurason-ña ginin i Saina.
Kalang gui’ un trongku ni ti fafanokcha’ gi disiettu
ni tåt nai ha chagi ottru klåsin tiempu,
Låo tumatachu ha’ gi hilu’ i anlágu’ butkån,
gi hilu’ asiga yan kansådu na tånu’.
Bendision para i taotåo ni manangongokku gi Saina,
ni gaigi i kumfiansån-ña gi Saina.
Kalang gui’ un trongku ni matånmi gi uriyan hånum
ni måfattu i hale’-ña guatu gi milak hånum;
Ti ma’åñao yanggin måttu i maipi,
i hagon-ña siha todu i tiempu bebetdi ha’;
Gi tiempun somnak na såkkan ti malåyu,
låo sigi ha’ manokcha’ frutas.
I finu’ i Saina.
INEPPIN I SÅTMU Ps 1, 1-2. 3. 4. 6.
R. MANMAGUF ATYU SIHA I MANMANANGOKU GI SAINA.
Mandichosu atyu siha i ti tumattitiyi
i akunsehun i manailayi,
ni ti manotohgi gi chalan i mani’isåo,
ni ti manmatåta’chung yan i mambutlon,
Låo i minaguf-ñiha gaigi gi tinagu’ i Saina;
makunsidedera i tinagu’ Yu’us ha’åni yan puengi.
INEPPI…..
Kalang siha i trongkun håyu
ni matåtmi gi fi’un i milak hånum,
ni manonokcha’ gi tiempon-ña;
ya ti malålayu i hagon-ña;
ya todu i macho’gui, siempri manmasuetti.
INEPPI…..
Ti taiguennåo i manailayi!
Kalang siha i basula ni mangguinaguaifi huyung ni manglu’.
I Saina Ha pupulan i hinanåo i manunas,
låo u fandimålas i hinanåo i manailayi.
INEPPI…..
SIGUNDU NA TINAITAI 1 Cor 15, 12. 16-20
Un tinaitai ginin i fine’na na Kattan San Pablo para i taotåo Corinth
Hafañe’lus:
På’gu, put i mensåhin-måmi na esta i Kristo mana’lå’la’ ginin i finatai, håfa taimanu na para u guaha giya hamyu u åluk na ti para u mana’fanlå’la’ i manmåtai? Yanggin ti mana’fanlå’la’ i manmåtai, ni i Kristo ti mana’lå’la’. Ya yanggin ti mana’lå’la’ i Kristo, pues tai bali i hinenggin-miyu, ya manggagaigi ha’ hamyu gi isao-miyu. Kumeke’ilekña lokkui’ na atyu siha i manmanhonggi gi Kristo ni esta manmåtai manmalingu siha. Yanggin i inangokkot-ta gi Kristo para esti ha’ na lina’la’ baliña ya tåya’ mås, pues debidi hita mås ta fanmapinitiyi ki ni håyi gi todu i tanu’.
Låo estigui’ i minagåhit na esta i Kristo mana’lå’la’ ginin i finatai, ya Guiya esti gumarantitiha na atyu siha i manmamaigu’ gi finatai u mana’fanlå’la’ lokkui’.
I finu’ i Saina.
IBANGHELIU Lk 6, 17. 20-26
ÅLELUIA
R. Åleluia. NA’FANMAGUF HAMYU
SA’ I PREMIUN-MIYU U DÅNGKULU GI LANGIT
R. Åleluia.
+ Un tinaitai ginin i såntu Ibangheliu sigun i tinigi’ San Lucas
Anai tumunuk si Jesus yan i manapostules-ña ginin i eksu’ sabåna, pumåra gi un lugåt na fina’yånu anai maniståba guennåo un dångkulun linahyan tåotåo mañisiha yan i mandisipulu-ña ni mangginin todu i påtti giya Hudeha yan Hirusalen yan i kantun ‘Tyre’ yan ‘Sidon’.
Dispues, tumalak guatu gi mandisipulu-ña, ya ilek-ña:
“Mandichosu hamyu ni mamopbli;
iyun-miyu i rainun Yu’us.
Mandichosu hamyu ni manñålang,
sa’ siempri en mana’fanhåspuk.
Mandichosu hamyu ni mangåkati;
sa’ siempri en fañålik.
“Siempri mandichosu hamyu yanggin manmachatli’i’ hamyu ni taotåo siha, yanggin ti manma’atendi hamyu yan manma’insutta hamyu yan manmapribi na’an-miyu kumu manailayi put i Lahin i Taotåo. Na’fanmaguf hamyu guihi na ha’åni yanggin manmacho’gui esti siha, sa’ i
premiun-miyu dångkulu gi langit. Taiguennao ha’ i mañainan-ñiha tratan-ñiha ni mamprufeta.
“Låo manna’masi’ hamyu ni manriku,
sa’ på’gu i minaguf-miyu.
Manna’masi’ hamyu ni manhåhaspuk;
sa’ siempri manñålang hamyu.
Manna’masi’ hamyu ni mañåchalik på’gu;
sa’ siempri en fangasao gi pininitin-miyu.
Manna’masi’ hamyu yanggin todu sumåsangan manmåolik na kosas put hamyu. I mañainan-ñiha taiguennao ha’ tratan-ñiha ni mamfåtsu na prufeta.” I Ibangheliun i Saina.
