A B C
FINENI’NA NA TINAITAI Nu 6, 22-27
Un tinaitai ginin i Lepblun Numiru
Ilek-ña i Saina as Moises: “Kuentusi si Aaron yan i lalahi-ña ya un sangåni siha: Taiguini bendisin-miyu ni ManIsrailitas. Sangåni siha:
I Saina en fambinendisi yan en fampinilan!
I Saina u fanina i matå-ña giya hamyu ya u gai ma’asi’ nu hamyu!
I Saina u yo’asi’ fanatan-ña nu hamyu ya en fannina’i pås!
Pues para taiguini ma’agångña i na’ån-hu gi hilu’ i ManIsrailitas ya bai Hu bendisi siha.”
I finu’ i Saina.
INEPPIN I SÅTMU Ps 67, 2-3. 5. 6. 8
R. SI YU’US U BENDISI HIT GI MINA’ASE’-ÑA.
Puedi u ma’åsi’ si Yu’us nu hita ya u bendisi hit;
puedi u fanina i matå-ña si Yu’us giya hita.
Kosa ki u matungu’ i malago’-mu gi hilu’ tånu’,
i sasatba na fuetsåm-mu gi todu i nasion siha.
INEPPI….
Puedi u fanmaguf i nasion siha yan u fanessalåo minaguf;
sa’ Un gubebetna i taotåo siha gi hustisia,
Un isgagaihun i nasion siha gi tanu’.
INEPPI….
Puedi Un matuna ni taotåo siha, O Yu’us;
Un matuna ni todu i taotåo siha!
Puedi si Yu’us u sigi ha’ bumendisi hit;
ya todu i tanu’ siha u ma’adora i Yi’os-ta.
INEPPI….
SIGUNDU NA TINAITAI Gal 4, 4-7
Un tinaitai ginin i Kattan San Pablo para i taotåo Galasia
Hafañe’lus:
Anai måttu i ma’apunta na tiempu, Ha na’hånåo si Yu’us i Lahi-ña mismu. Måttu Gui’ kumu lahin un palåo’an yan lumå’la’ Gui’ gi papa’ i Lai i ManHudihos, put i para u na’fanlibri atyu siha i maniståba gi papa’ i Lai, kosa ki siña hit manhuyung famagu’un Yu’us.
Put i para u na’li’i’ na famagu’on-ña hamyu, Ha na’hånåo si Yu’us i Espiritun i Lahi-ña hålum gi kurason-ta, atyu na Espiritu i umå’agang, “Åbba, Tåta.” Put ennåo na esta ti isklåbu, låo patgon-ña håo. Ya put i patgon-ña håo, siempri Ha nå’i si Yu’us i famagu’on-ña todu ni guinaha-ña.
I finu’ i Saina.
IBANGHELIU Lk 2, 16-21
ÅLELUIA. Heb 1, 1-2
R. Åleluia. GI MANMALOFFAN SIHA NA TIEMPU HA KUENTUSI
SI YU’US I MAÑAINA-TA GININ I MAMPRUFETA;
PÅ’GU KUMUENTUS GUI’ GININ I LAHI-ÑA.
R. Åleluia.
+ Un tinaitai ginin i såntu Ibangheliu sigun gi tinigi’ San Lucas
Mampinalålala i pastoris siha guatu giya Bilen ya masodda’ si Maria, si Jose yan i neni umå’assun gi sagan nengkannu’ gå’ga’; anai mali’i’ esti, makumprendi atyu i manmasangånin-ñiha put esti na påtgun. Ya todu atyu siha i humunguk manmanman put todu atyu siha i sinangan i pastoris.
Låo si Maria ha nå’na’ ha’ esti siha na sinangan ya ha kunsideran mamaisa gi kurason-ña. I pastoris mana’lu tåtti giya siha matutuna yan ma’o’onra si Yu’us put atyu siha i hininguk-ñiha yan lini’i’-ñiha, sigun i manmasangånin-ñiha.
Anai måttu i mina’otchu na ha’åni anai para u macho’gui i setkomsisiu gi patgun, manå’i na’ån-ña as Jesus, i na’an ni nina’i Gui ni anghit åntis di u mama’potgi’ñaihun gi tiyan nanå-ña.
I Ibangheliun i Saina.
