ABC
FINENI’NA NA TINAITAI Is 9, 1-6
Un tinaitai ginin i Lepblun i Prufeta as Isaias
I taotåo siha ni ginin manmamomokkat gi hinemhum
esta mali’i’ un dångkulu na inina;
Gi hilu’ atyu siha ni mañåsaga gi tanu’ hinemhum
esta manina påpa’ un kåndit.
Un chuli’i guatu giya siha abundånsia na minaguf
yan dångkulu na alegria,
Sa’ manmaguf siha gi me’nå-mu taiguihi gi tiempun kusetcha,
taiguihi i taotåo siha manmamaguf yanggin mana’apatti
ni sinakkin-ñiha.
Sa’ i yigu ni humohonñu’ siha,
i tekpung gi apågan-ñiha,
Yan i bastun i ma’gas-ñiha
esta munhåyan un yamak, taiguihi gi ha’ånin Midian.
Sa’ todu sapåtus ni mamokkat gi gera,
todu chinina ni masupuk gi haga’,
umasonggi kumu håyu para u fañila’.
Sa’ mafañågu un påtgun para hita, un påtgun låhi manmanå’i hit;
gi apagå-ña nai gaigi i rainon-ña.
Mafana’an Gui’ Na’manman na Kunsehu, Yu’us Minatatnga,
Tatan Taihinekkuk, Prinsipin Pås.
I rainoñ-ña sumen dångkulu
ya u trangkilu para todu i tiempu,
Ginin i tronun David, yan gi hilu’ i rainon-ña,
ni ha na’fifitmi yan ha susteteni
Nu i sintensia yan tininas
parehu ha’ på’gu yan para todu i tiempu.
I ånimun i Sainan Mineggai siempri u cho’gui esti!
I finu’ i Saina.
INEPPIN I SÅTMU Ps 96, 1-2. 2-3. 11-12.13
R. (Lk 2:11) PÅ’GU NA HA’ÅNI MAFAÑÅGU I SATBADOT-TA,
I KRISTO I SAINA.
Kantåyi i Saina nuebu na kånta;
kantåyi i Saina, todu hamyu gi tanu’.
Kantåyi i Saina; bendisi i na’ån-ña;
INEPPI….
Anunsia i satbasion-ña kada diha.
Sångan i gloriå-ña gi entalu’ i nasion siha;
gi entalu’ i taotåo siha, i manna’manman na fina’tinås-ña.
INEPPI….
U maguf i langit yan i tanu’ lokkui’;
i tasi yan todu i mañåsaga guennåo u fanessalåo;
i tanu’ ni yånu u maguf yan todu i manggaigi guennåo.
Puedi todu i trongkun håyu siha gi halum tånu’ u fanmaguf.
INEPPI….
Gi me’nan i Saina sa’ mamamaila’ Gui’,
mamamaila’ Gui’ para u gubetna i tanu’,
Para u gubetna i tanu’ kun hustisia
yan u fiet ni taotåo siha.
INEPPI….
SIGUNDU NA TINAITAI Ti 2, 11-14
Un tinaitai ginin i Kattan San Pablo para si Tito
Mangginefli’e’-hu:
Esta si Yu’us Ha na’matungu’ i grasiå-ña para i satbasion todu i taotåo siha. Esti na gråsia ha fa’nåna’gui hit para ta po’lunñaihun gi un bånda todu i ti yini’usan na lina’la’ yan minaguf tånu’, ya para ta suhetan maisa i lina’lå’-ta, para ta na’fanunas hit, yan para u yini’usan lina’lå’-ta guini na tånu’, mientras ta nanangga i matuna na Ha’åni ni ta angongokku na para u fåttu, yanggin umannuk i glorian i takkilu’ na Yu’os-ta yan Satbadot as Jesukristo. Ha nå’in maisa Gui’ put hita put i para u riskåta hit ginin todu i tailayi put i para u na’fanggåsgas hit na tåotågui ni iyon-ña ha’ na maisa ya manånsias para ta cho’gui i maolik.
I finu’ i Saina.
IBANGHELIU Lk 2. 1-14
ÅLELUIA Lk 2. 10-11
R. Åleluia. UN DÅNGKULU YAN NA’MAGUF NA NUTISIA, NI PARA
U NINA’MAGUF TODU I TAOTÅO SIHA.
PÅ’GU MISMU NA PUENGI MAFAÑÅGU I SAINA AS
JESUKRISTO.
R. Åleluia.
+ Un tinaitai ginin i såntu Ibangheliu sigun gi tinigi’ San Lucas
Atyu na tiempu manotdin i Emperadot as Agusto na todu i siudadånun i rainon-ña u fanmarihistra para i sensus. Anai macho’gui esti i fine’na na sensus, si Quirinius guiya iståba gubetnun Syria. Put ennåo na kadakuåt humånåo para i sengsong-ña para u marihistra. Humånåo si Jose desdi i sengsung Nasaret, giya Galileha, asta Hudeha, asta i sengsung ni mafa’nana’an Bilen, anai mafañågu i Rai as David. Må’pus si Jose guatu guennåo sa’ rasan David gui’. Må’pus para u marihistra i dos, si Jose yan si Maria. Si Maria era esta maprumeti na para asaguå-ña. Esta si Maria mapotgi’ guennåo na tiempu, ya anai iståba i dos giya Bilen, måttu i tiempu anai para u fañågu. Mañågu gui’ ni primirisa na låhi, ya mabalutan ni magågu, ya mana’åssun gi sagan nengkannu’ gå’ga’. Tåya’ guennåo guma’ nai siña mañåga siha.
Maniståba gi uriyan ennåo na lugåt unus kuåntus pastoris, ni mapupulan i ga’-ñiha kinilu, ya yanggin puengi manmaigu’ e’ennåo ha’ gi sanhiyung. Mamfinattoigui siha ni un ånghit i Saina, ya i mina’lak i Saina mambinalutan siha. Nina’fansen luhan siha, låo mansinangåni ni anghit, “Cha’-miyu fanma’å’a’ñåo! Sa’ hu chulili’i hamyu un Måolik na Nutisia, ni para u nina’fanmaguf todu i taotåo siha. På’gu mismu na ha’åni gi sengsung David mafañågu i Nana’librin-miyu–i Kristo i Saina. Estigi’ para prueban-miyu: Siempri en sedda’ un neni ni mabalulutan ya umå’assun gi sågan nengkannu’ gå’ga’.” Ya gotpi manunuk låhyan na manånghit i langit mañisiha yan i anghit ma tutuna si Yu’us ni kantan-ñiha:
“U matuna si Yu’us gi yahululu’ gi langit,
yan pås gi tanu’ gi atyu siha anai gaigi si Yu’us i minagof-ña!”
I Ibangheliun i Saina.
