FINENE’NA NA TINAITAI Is 42, 1-4. 6-7
Un tinaitai ginin i Lepblun i Prufeta as Isaias
Taiguini ilek-ña i Saina:
I sitbentek-ku ni Hu susteteni,
i inatyek-ku ni giya guiya nai mumamaguf Yu’,
Gi hilo’-ña nai Hu po’lu i espiritu-hu;
guiya chumuchuli’ i tininas para i nasion siha,
Ti umå’agang huyung, ti ume’essalao,
ti ha na’mahuhunguk i bos-ña gi katsåda.
I malåssas na pi’åo ti para u yamak,
ya i mañiñila’ na metcha ti para u punu’,
Asta ki ha istapblesi i tininas gi tanu’;
i kantun tåsi siha u manangga i finana’gueñ-ña.
Guåhu, i Saina, esta Hu ågang håo para i tininas ni manggånna,
esta Hu go’ti i kannai-mu;
Hu fotma håo, ya Hu po’lu håo
kumu kuntråtan i taotåo,
un kåndit para i nasion siha,
Para un baba i matan i mambåtchit,
para un na’fanhuyung i prisuneru siha ginin i kalabosu,
ya ginin i papa’ såtgi, atyu siha ni manggaigi gi hinemhum.
I finu’ i Saina.
INEPPIN I SÅTMU Ps 29, 1-2. 3-4. 3. 9-10
R. I SAINA U BENDISI I TAOTÅO-ÑA SIHA NI PÅS.
Nå’i i Saina, hamyu ni manlinangitan,
nå’i i Saina ni gloria yan minetgut;
Nå’i i Saina ni gloria ni diretchon-ña i na’an Yu’us.
Adora i Saina gi santus na magagu-ña!
INEPPI…..
I bos i Saina gaigi gi hilu’ i tasi siha;
i Saina gaigi gi hilu’ i taichi’ na tåsi siha.
Minina’siña i bos i Saina;
må’gas i bos i Saina.
INEPPI…..
Huhulu i glorian Yu’us,
Todu i manggaigi gi palåsyu ilik-ñiha, “Gloria!”
Matå’chung i Saina gi hilu’ i dilubiu!
Manggubetna i Saina kumu rai para todu i tiempu!
INEPPI…..
SIGUNDU NA TINAITAI Acts 10, 34-38
Un tinaitai ginin i Bidan i Manapostulis
Ha tutuhun kumuentusi siha si Pedro i MamPagånu ni esti siha na palåbras: “På’gu ha’ hu tututuhun kumumprendi na magåhit na tåya’ si Yu’us Ha fabureresi ni unu. Inlugåt di ennåo, si Yu’us Ha aksesepta maseha håyi na nasion tåotåo ni ma’å’ñåo nu Guiya yan måolik bidåda-ña. Estigui’ i minsåhi ni Ha nå’i i famagu’un Israhet, i Maolik na Nutisian pås ni mapruklåma ginin as Jesukristo ni Sainan todus. Gi hinassok-ku na en tingu’ ha’ håfa masåsangan gi todu iya Hudeha put si Jesus i taotåo Nasaret, ni matutuhun giya Galileha put i båotismu ni ha setmunñaihun si Juan; håfa taimanu si Yu’us na Ha olius Gui’ ni Espiritu Såntu yan pudet. Lumålåoya Ha chocho’gui manmåolik na cho’chu’ yan Ha na’fanhohomlu’ todu atyu siha i manggaigi gi papa’ i nina’siñan i aniti, ya gaigi si Yu’us giya Guiya.”
I finu’ i Saina.
C
IBANGHELIU Lk 3, 15-16. 21-22
ÅLELUIA
R. Åleluia. MABABA I LANGIT YAN MAHUNGUK I BOS I TATA:
GUIYA ESTI I HU GOFLI’I’ NA LAHI-HU, EKKUNGUK GUI’.
R. Åleluia.
+ Un tinaitai ginin i såntu Ibangheliu sigun gi tinigi’ San Lucas
I taotåo siha mana’afaisin, manmamanman gi kurason-ñiha na siña ha’ na si Juan guiya i Misihas. Manineppi siha todu as Juan anai ilek-ña, “Hu takpåpangi hamyu ni hanum, låo guaha para u fåttu ni metgotña ki guahu. Guåhu ti diknu yu’ para bai hu pula’ i geddin i sandaliås-ña. Guiya en fantinakpångi ni Espiritu Såntu yan i guafi.
Anai munhåyan manmatakpångi i taotåo siha, ya iståba na manånayuyut si Jesus dispues di matakpångi Gui’ lokkui’, mababa i langit ya tumunuk påpa’ i Espiritu Såntu ya tumohgi gi hilo’-ña gi fotman un paluma. Ya mahunguk un bos ginin i langit ilelek-ña, “Hågu i Hu gofli’i’ na Lahi-hu. Hågu muna’mamaguf Yu’.”
I Ibangheliun i Saina.
