C
FINENI’NA NA TINAITAI Ezekiel 47: 1-2, 8-9, 12
Un tinaitai ginin i Lepblun i Prufeta as Ezekiel
Dispues ha konni’ yu’ i anghit tåtti para i intrådan i templu, ya hu li’i’ mimilalak huyung hånum kåkakaya ginin i papa’ i pettan i templu sa’ i sanme’nan i templu ha fåfana’ håya; i hanum mimilalak påpa’ ginin i sanlichan na bånda gi templu, gi lichan i attat. Ha konni’ yu’ huyung umisgin i sangkattan na trångka, guatu asta i sanhiyung na trångka ni ha fåfana’ håya, atyu nai hu li’i’ hånum tutuhu’ ginin i sanlichan na bånda. Ilek-ña nu guåhu, “Esti na hånum i mimilalak guatu gi distritun sanhaya asta påpa’ giya Arabah, ya mimilalak guatu gi tasi, ha na’gågasgas i hanum ma’asin. Amånu ha’ nai milalak i sadduk, todu klåsin gå’ga’ ni siña mañågu u fanlå’la’, ya siempri u bula guihan, sa’ amånu ha’ nai måttu esti na hånum siempri ha na’gåsgas i tasi. Gi ambusbåndan i sadduk, u fanla’chuk todu klåsin trongkun fruta; ti u famboksiun hagun-ñiha, pat sino u fantai tinekcha’. Kada mes siempri u fanmanokcha’ mamfresku na fruta, sa’ siempri manrinenega ni milak ginin i santuåriu. I tinekcha’-ñiha para nengkannu’, yan i hagun-ñiha para åmut.”
I finu’ i Saina.
INEPPIN I SÅTMU Ps 46, 2-3, 5-6, 8-9
R I HANUM I SADDUK HA NÅNA’I MINAGUF I SENGSUNG YU’US,
I SANTUS NA SAGAN I MÅS TAKKILU’
Si Yu’us fanliheng-ta yan minetgot-ta,
todu i tiempu Ha ayuyuda hit gi tiempun disgråsia.
Put ennåo na ti manma’å’ñåo hit, achukka’ linåo i tanu’
pat mayengyung i sabåna asta i fondun tåsi.
INEPPI ….
I milak sadduk ha nåna’i minaguf i sengsung Yu’us,
i santus na sagan i Mås Takkilu’.
Gaigi si Yu’us gi talulu’; ti u mayengyung;
Siempri inayuda as Yu’us gi chatanmak.
INEPPI ….
Manhihita yan i Saina ni Todu Ha Na’siña;
i Yi’us Jacob Guiya fanliheng-ta.
Maila’ ya un li’i’ i bidan i Saina,
ni chumo’gui manna’ma’ñåo na cho’chu’ gi tanu’.
INEPPI ….
SIGUNDU NA TINAITAI 1 Co 3, 9c-11, 16-17
Un tinaitai ginin i Kattan San Pablo para i taotåo ‘Corinth’
Hafañe’lus: Hamyu lokkui’ i gima’ ni iyun Yu’us. Hu usa i rigålu nina’in Yu’us, ya hu cho’gui i che’chu’ kumu un måolik na hahatsa guma’ ya hu plånta i fondasion, ya ottru tåotåo manhåhatsa gi hilu’ esti na fondasion. Låo kada unu debidi u gof adahi taimanu para hatsån-ña. Esta si Yu’us Ha plånta si Jesukristo kumu Guiya ha’ i uniku na fondasion, ya tåya’ ottru siña maplånta.
Hunggan, en tingu’ ha’ na templun Yu’us hamyu ya sumåsaga i Espiritun Yu’us giya hamyu! Put ennåo na håyi dumistrosa i templun Yu’us, siempri si Yu’us u dinistrosa gui’. Såntus i templun Yu’us, ya hamyu era ennåo i templon-ña.
I finu’ i Saina
IBANGHELIU Jn 2, 13-22
Åleluia: ILEK-ÑA I SAINA, HU ATYIK YA HU KUNSÅGRA ESTI
NA GUMA’ KOSA KI, U GAIGI I NA’ÅN-HU PARA TODU I TIEMPU.
Åleluia!
+ Un tinaitai ginin i såntu Ibangheliu sigun gi tinigi’ San Juan
Anai humihihut i giput Påsguan i ManHudihos, humånåo hulu’ si Jesus para Hirusalen. Ha sodda’ i taotåo siha gi templu manmambebendi nubiyu, kinilu, yan påharu, ya i pumalu siha manmatåta’chung manmanulalaika salåppi’. Mama’tinas kuåtta ni tali ya Ha dulalak huyung ginin i templu i taotåo siha, i kinilu yan kuntodu i nubiyu, ya Ha na’fanåtlibis i lamasan atyu siha i manmanulalaika salåppi’, ya Ha chalapun i sinsiyun-ñiha. Ha sangåni atyu siha i manmambebendi påharu: “Fanhuyung ginin esti! Båsta mafa’metkåo i gima’ Tatå-hu!” I mandisipulu-ña mahassu i finu’ i Eskritura: “Ha sosonggi Yu’ i dibusion-hu para i gimå’-mu.”
Put esti na manmanoppi i ManHudihos siha, “Håfa na siñåt siña Un fa’nu’i ham na ma’åoturisa Håo para Un cho’gui esti siha?” Manoppi si Jesus, “Bai Hu yulang esti na templu, ya bai Hu håtsa ta’lu gi mina’tres dihas.” Manmanoppi siha, “Dinira esti na templu kuarentaisais åñus para u mahåtsa, ya Hågu para Un håtsa gi tres dihas?”
Gi magåhit kumuekuentus Gui’ put i templun i tataotåo-ña. Asta ki mana’lå’la’ ta’lu si Jesus ginin i finatai nai mahassu ni mandisipulu-ña na Ha sångan esti, ya manmanhonggi gi Eskritura yan i palåbra ni Ha sångan.
I Ibangheliun i Saina
