FINE’NA NA TINAITAI Acts 13, 14. 43-52
Un tinaitai ginin i Bidan i Manapostulis
Makuntinuha i hinanao-ñiha si Pablo yan si Barnabas desdi Perga ya måttu giya Antioch ni gaigi giya Pisidia. Humålum i dos gi sinagoga gi Sabaf na ha’åni ya matå’chung påpa’. Putlus uttimu anai machalapun i inetnun, meggai na ManHudihos yan atyu siha i manmakumbetti para u fanhålum ManHudihos, madalalaki si Pablo yan si Barnabas yan mangkuinentusi siha yan mansineyu’ na u na’famfitmi siha gi gråsian Yu’us.
Gi sigenti Sabaf, kana’ ha’ interu i siudå manmåttu para u ma hunguk i finu’ Yu’us. Anai mali’i’ ni ManHudihos i linahyan tåotåo, manhosguan siha ya makontra kuåntu i siña yan bula chinatli’i’ i sinangan Pablo. Låo ti nina’ma’å’ñåo si Pablo yan si Barnabas kumuentus: “Debidi hamyu fine’ne’na en fanmasangåni ni finu’ Yu’us; låo put i en richåsa i finu’ Yu’us ya en kundenan maisa hamyu na ti mandiknu hamyu ni taihinekkuk na lina’la’, ennåo mina’ hami in bira ham ya in ispipiha på’gu atyu siha i MamPagånu. Sa’ taiguini manmasangånin-måmi nu i Saina: ‘Esta Hu fa’kåndit håo para i nasion siha, Hågu para un satbadot asta i uttimun i tanu’.”
Mansen maguf atyu siha i MamPagånu anai mahunguk esti ya ma’oppi i finu’ i Saina ni tininan-ñiha. Todu atyu siha i manmadistina para i taihinekkuk na lina’la’ manmanhonggi ni esti. Pues taiguennao na måmta’ i finu’ i Saina gi todu siha i uriyan ennåo na lugåt. Låo unus kuåntus gi ManHudihos mana’fanlalålu’ atyu siha na famalåo’an ni manakkilu’ yan i mangege’hilu’ na lalåhi gi siudå, ya taiguennåo na matutuhun mapitsigi si Pablo yan si Barnabas. Putlus uttimu madulalak i dos ni ManHodihus ginin ennåo na tanu’-ñiha. Pues esti i dos matåntan i petbus ginin i adding-ñiha kuentan linalålo’-ñiha ya humånåo para Iconium. Nina’sen maguf i dos ya nina’bula ni Espiritu Såntu.
I finu’ i Saina.
INEPPIN I SÅTMU Ps 100, 1-2. 3. 5
R. HITA I TAOTÅO-ÑA: I KINILU GI FANKINILUYÅN-ÑA.
Fangånta na’maguf para i Saina, todu hamyu ni tanu’ siha,
adora i Saina gi minaguf-miyu;
fanmamaila’ gi me’nå-ña yan i manná’maguf na kånta.
INEPPI…..
Tingu’, na i Saina Yu’us Gui’;
Guiya fuma’tinas hit, ya iyon-ña hit,
tåotåo-ña hit, i Ha atetendi na kinilu.
INEPPI…..
Hunggan måolik i Saina:
taihinekkuk i ginifli’e’-ña,
fiet Gui’ para todu i hinerasion siha.
INEPPI…..
SIGUNDU NA TINAITAI Rv 7, 9. 14b-17
Un tinaitai ginin i Lepblun Ribilasion
Guåhu, si Juan, manli’i’ yu’, iståba guennåo un dångkulu na linahyan–tåya’ siña tumufung todu i taotåo siha! Mangginin todu i familia, råsa, nasion, yan lingguåhi ya manotohgi gi sanme’nan i tronu yan i Kinilu, manminagågagu magågun å’paka’ manmanggogo’ti råmus gi kannai-ñiha.
Unu gi manåmku’ ilek-ña nu guåhu, “Esti siha na tåotåo atyu i manhuyung såfu ginin i makkat na pinitsigi. Esta mafa’gåsi i magagun-ñiha ya mana’å’paka’ ni haga’ i Kinilu.
“Put ennåo na manotohgi gi me’nan i tronun Yu’us ya masesetbi Gui’ ha’åni yan puengi gi templu. Atyu i matåta’chung gi tronu para u famprinitehi siha ni gumaigen-ña. Ni ngái’an ta’lu na u fanñålang pat u fanmå’hu; ni i atdao pat håfa ni titinu na maipi siña sumonggi siha, sa’ i Kinilu, ni gaigi gi ta’lu gi tronu, Guiya para pastot-ñiha, ya Guiya u fangginiha siha para i be’bu’ hånum ni mannåna’i lina’la’. Ya si Yu’us u såosåo todu i lagu’ ginin i matan-ñiha.”
I finu’ i Saina.
IBANGHELIU Jn 10, 27-30
ÅLELUIA Jn 10, 14
R. Åleluia. ILEK-ÑA I SAINA, GUÅHU I MAOLIK NA PASTOT;
HU TUNGU’ I GA’-HU KINILU SIHA YA SIHA
MATUNGU’ YU’. R. Åleluia.
+ Un tinaitai ginin i såntu Ibangheliu sigun i tinigi’ San Juan
Ilek-ña si Jesus:
“I ga’-hu kinilu mahuhunguk i bos-su. Hu tungu’ siha,
ya madalalalaki Yu’.
Hu nåna’i siha taihinekkuk na lina’la’,
ya ni ngai’an nai u fandimålas.
Takkilo’ña si Tåta ki ni håyi, gi atyu i Ha nå’i Yu’,
ya tåya’ siña umåmut Yu’ ginin i kånnai-ña.
I Tata yan Guåhu unu ha’.” I Ibangheliun i Saina.
