FINENIʹNA NA TINAITAI 2 Chr 36, 14-16. 19-23
Un tinaitai ginin i sigundu na Lepblun ‘Chronicles’
Todu i prinsipi siha giya Hudah, i mamåli’ yan i taotåo siha mana’atattiyi i ti mamfiniet-ñiha, ya machocho’gui manna’mamahlåo na fina’tinas ni ma’etyak ginin ottru nasion siha yan machocho’gui mansakrilehiu na fina’tinas gi halum i templun i Saina ni Ha kunsågra giya Hirusalen.
Tåftaf yan sessu i Saina, i Yi’us i tatan-ñiha, Ha na’hånåo i tentago’-ña siha guatu giya siha, sa’ gai ma’asi’ Gui’ nu i taotåo-ña yan i gimå’-ña. Låo mabutleha i tentågu’ Yu’us siha, madispresia i finu’-ñiha, ya mafa’chalik i prufeta siha, asta ki sen lalalu’ si Yu’us nu i taotåo-ña ya tåya’ rimediu. Put lusuttimu, masonggi i Gima’Yu’us ni maninimigun-ñiha, mayulang påpa’ i kellat Hirusalen, masonggi todu i palåsyu, yan manmayulang todu i kosas siha. Atyu siha i maniskåpa ginin i ispåda manmakonni’ kumu prisuneru para ‘Babylon’, ya guennåo nai manmafa’tentågo’-ña yan tentågu’ i famagu’on-ña asta ki mumetgut na nasion i rainun Persia. Manmasusedi todu esti siha put i para u makumpli i finu’ i Saina ni ha sångan si Jeremiah: “Asta ki makumpli i diskånsun ‘sabath’ guini na tånu’, asta ki maloffan sitenta åñus, u makumpli i ‘sabath’ durånti i mayulång-ña.”
Gi primet såkkan anai si Cyrus rai giya Persia, put i para u makumpli i finu’ i Saina ni ha sångan si Jeremiah, i Saina Ha ina i hinassun Cyrus i rai iya Persia para u pruklåma esti gi finu’ påchut yan tinigi’ gi todu i rainon-ña: “Ilek-ña si Cyrus, rai iya Persia: ‘I Saina, i Yi’us i langit Ha nå’i yu’ ni todu i rainun tånu’, yan Ha ingkåtga yu’ lokkui’ para bai hatsåyi Gui’ un guma’ giya Hirusalen, ni gaigi giya Huda. Ennåo mina’, maseha håyi giya hamyu ni såsaonåo gi taotåo-ña, u hånåo hulu’, ya puedi u siha yan i Yi’os-ña!’ “
I finu’ i Saina.
INEPPIN I SÅTMU Ps 137, 1-2. 3. 4-5. 6
R. (6) PO’LU YA U SILENSIU I HILA’-HU,
YANGGIN MALEFFA YU’ NU HÅGU!
Gi uriyan i Sadduk ‘Babylón’
manmatå’chung ham mampininiti yan mangakasåo
anai in hassu iya Sion.
Gi trongkun ‘poplars’
i kana’ i dandan-måmi.
INEPPI….
Guihi nai i gumånna ham ha gågåo ham
ni palåbran i kanta;
I kumastiga ham, para in kantåyi siha ná’maguf:
“Kantåyi ham kantan Sion!”
INEPPI….
Låo taimanu para in kanta i kantan i Saina
gi istrangheru na tånu’?
Yanggin maleffa yu’ nu hågu, Hirusalen,
puedi u måtai i agapa’ na kannai-hu.
INEPPI….
Puedi u chettun i hila’-hu gi paladat-tu
yanggin maleffa yu’ nu Hågu,
Yanggin ti hu tuna iya Hirusalen
yan todu i minagof-fu.
INEPPI….
SIGUNDU NA TINAITAI Eph 2, 4-10
Un tinaitai ginin i Kattan San Pablo para i taotåo ‘Ephesus’
Hafañe’lus:
Låo abundånsia i mina’åsi’ Yu’us, yan metgut i ginifli’e’-ña nu hita, ya put ennåo na achukka’ anai maniståba hit manmåtai gi espirituhåt sa’ put i ti manmanosgi hit, Ha na’fanlå’la’ hit ta’lu yan i Kristo. Ginin i gråsian Yu’us na mana’fansåfu hamyu. Put i mandaña’-ta yan i Kristo Jesus na Ha kåhat hit si Yu’us hulu’ yan Guiya para ta fanmanggubetna yan Guiya gi linangitan na tånu’. Ha cho’gui esti put i para u na’mali’i’ gi todu i manmamamaila’ na tiempu i na’manman na minetgut i grasiå-ña gi guinaiya ni Ha fanu’i hit gi Kristo Jesus. Put i gråsian Yu’us na mana’fanlibri hamyu ginin i hinenggin-miyu. Åhi’, ti put i che’chu’-miyu, låo ginin i rigålun Yu’us, kosa ki tåya’ u banidosu put esti. Si Yu’us fuma’tinas hit taimanu i naturåt-ta på’gu, ya anai manunu hit yan si Jesukristo Ha fa’tinas hit para atyu na klåsin lina’la’ i chumocho’gui i maolik, ni esta Ha pripåra hit para ta cho’gui.
I finu’ i Saina.
IBANGHELIU Jn 3, 14-21
(Todus) U matuna Håo, Asaina Jesukristo, Rai i taihinekkuk na gloria!
(Tetcha) Si Yu’us Ha sen guaiya i tanu’, Ha nå’i hit ni uniku na Lahi-ña,
kosa ki todu i manmanhonggi giya Guiya u fanggai taihinekkuk na lina’la’.
+ Un tinaitai ginin i såntu Ibangheliu sigun i tinigi’ San Juan
Ilek-ña si Jesus as Nicodemus:
“Taimanu ha’ anai si Moises ha kåhat hulu’ i bronsi na buttun kulepbla gi haligi gi
disiettu, taiguennåo ha’ lokkui’ i Lahin i Taotåo debidi u makåhat hulu’, kosa ki todu
atyu siha i manmanhonggi u fanlå’la’ taihinekkuk.
Sa’ put Ha sen guaiya si Yu’us i tanu’ na Ha intrega i uniku na Lahi-ña, kosa ki atyu
i manhonggi giya Guiya ti u måtai, inlugåt para u lå’la’ taihinekkuk. Ti Ha na’hånåo
si Yu’us i Lahi-ña para i tanu’ para u kundena i tanu’, sino ki para u masåtba ginin
Guiya. Maseha håyi ni manhonggi gi Lahi-ña ti u ma kundena, låo maseha håyi ni
ti manhonggi pues esta gui’ munhåyan makundena, sa’ put i ti manhonggi gui’ gi uniku
na Lahin Yu’us. Estigi’ i sintensian kundenasion: måttu esta i inina gi tånu’, låo i
taotåo siha ga’on-ñiha i hinemhum ki i inina, sa’ manailayi bidan-ñiñiha. Sa’ atyu i
chumocho’gui i tailayi ha chatli’i’ i inina; ya ti u fåttu guatu gi inina, sa’ ma’å’ñåo na u
annuk i tailayin bidå-ña. Låo håyi chumocho’gui i minagåhit måfattu gui’ gi inina,
kosa ki siña i inina u nina’annuk na ha cho’gui i che’cho’-ña siha sa’ ubidiente gui’ as
Yu’us.”
I Ibangheliun i Saina.
