FINE’NA NA TINAITAI Jos 5, 9. 10-12
Un tinaitai ginin i Lepblun Joshua
Ilek-ña i Saina as Joshua,
“På’gu na ha’åni Hu na’suha ginin hagu i malalåtdin Ihipto.”
Anai mañåganñaihun i ManIsraelitas giya Gilgal gi fina’yånu giya Jericho, masilebra i Påsgua gi pupuengin i diha katotsi gi mes. Gi sigenti diha dispues di Påsgua mañotchu ni pruduktun i tanu’ gi hechuran broas ni tai libadura yan tinala’ få’i. Guennåo mismu na ha’åni dispues di i Påsgua anai makånnu’ i pruduktun i tanu’, pumåra i mana. Tåya’ esta måna para i ManIsraelitas, siha ni mañotchu guennao na såkkan ni kusetcha ginin i tanu’ giya Canaan.
I finu’ i Saina.
INEPPIN I SÅTMU Ps 34, 2-3. 4-5. 6-7
R. TAÑÑA’ YA EN LI’I’ I MINAOLIK I SAINA.
Bai hu tuna i Saina todu i tiempu;
i matunå-ña u gagaigi todu i tiempu gi pachot-tu.
Sotta ya u maguf i anti-hu gi Saina
bai hu mahunguk ni manakpapa’ na tåotåo siha ya u fanmaguf.
INEPPI…..
Ta fanhita tumuna i Saina;
ta fanhita todu muna’takkilu’ i na’ån-ña.
Hu ispiha i Saina, ya Ha oppi yu’,
ya Ha na’måhgung todu i ma’a’ñåo-hu.
INEPPI…..
Atan si Yu’us ya un nina’ma’lak ni minaguf
ya ti u mamåhlåo i matå-mu.
I Saina Ha hunguk i inagang i mamadedesi
ya Ha na’libri gui’ ginin todu i pinadisi-ña.
INEPPI…..
SIGUNDU NA TINAITAI 2 Cor 5, 17-21
Un tinaitai ginin i sigundu na kattan San Pablo para i taotåo Corinth
Hafañe’lus:
Yanggin guaha mana’dañña’ yan i Kristo, humuyung gui’ nuebu na tåotåo; táigui esta i bihu, sa’ måttu esta i nuebu. Todu esti siha si Yu’us chumo’gui, ya Ha na’fanáfa’måolik hit yan Guiya ginin i Kristo ya Ha nå’i hit ni nina’siña para ta na’fanáfa’måolik i taotåo siha yan Guiya. Kumeke’ilek-ku na si Yu’us Ha na’a’áfa’måolik i tanu’ yan Guiya ginin i Kristo, åhi’ ti Ha tutufung i isao i taotåo siha kontra siha, ya Ha nå’i hit katgot-ta ni minsåhin ináfa’måolik. Estigui’ muna’fanambasadót i Kristo hit, kalang mohun si Yu’us umisgin iya-hihita. In gagagåo hamyu, gi na’an i Kristo: fanáfa’måolik yan si Yu’us! Put hita na si Yu’us Ha kunsidera i Kristo ni ti tumungu’ i isao, kumu un i’isao, kosaki giya Guiya na siña hit manunas gi as Yu’us.
I finu’ i Saina.
IBANGHELIU Lk 15, 1-3. 11-32
R. (Todu) U matuna Håo, Asaina Jesukristo, Rai i taihinekkuk na gloria!
V. (Tetcha) Bai hu kahulu’ ya bai hånao para as tatå-hu ya bai hu sangåni Gui’:
Tåta, umisao yu’ kontra i langit yan kontra Hågu.
+ Un tinaitai ginin i såntu Ibangheliu sigun i tinigi’ San Lucas
Un biåhi manmåttu gi uriyan Jesus i taotåo kuntribusion yan i mani’isåo para u ma’ékkunguk Gui’, ya i MamFarisehu yan i ManEskribas matutuhun manggonggung ilik-ñiñiha, “Esti na tåotåo Ha aksesepta atyu siha i manmadispreresia asta mañisiha mañotchu!” Put ennåo na mansinangåni siha as Jesus ni esti na fina’akumparasion:
“Guaha un tåotåo ni gai lahi dos. I patgun na lahi-ña ilek-ña as tatå-ña, ‘Tåta, nå’i yu’ ni irensiåk-ku gi tanu’.’ Pues i tata ha dibidi i tano’-ña entri i dos na lahi-ña. Dispues di unus kuåntu dihas maloffan, i patgun na lahi-ña ha rikohi todu i guinaha-ña yan i salappe’-ña ya ha dingu i gima’-ñiha. Humånåo para un chågu’ tånu’, ya ha dispitdisia i salappe’-ña gi manápplacha’ na lina’la’. Ha gåsta todu i guinaha-ña. Dispues måttu un dångkulun ha’ilas guennao na tånu’, ya sinedda’ gui’ sin håfa na guinaha. Pues humånåo para u facho’chu’i un tåotåo ennåo na tånu’ ya nina’hånåo gui’ para i lanchon-ña para u naná’chotchu babui. Ya put i niñalång-ña asta ha diseseha kumånnu’ i na’babui, låo tåya numå’i gui’ ni håfa. Put lusuttimu klumåru i hinasson-ña ya ilek-ña, ‘Todu i fumacho’chuchu’i si tatå-hu mañósopbla nengkannu’, ya estegui’ yu’ na måtai ñålang! Bai hu kahulu’ ya bai hu hånåo tåtti as tatå-hu ya bai hu åluk, “Tåta, umisåo yu’ kontra as Yu’us yan hågu. Esta ti hu miresi ma’ågang lahi-mu; tråta yu’ kumu unu gi hutnaleru-mu.” ‘ Pues kahulu’ gui’ ya humånåo tåtti as tatå-ña.
“Chåchagu’ ha’ gui’ trabiha ginin i gima’-ñiha anai lini’i’ gui’ as tatå-ña; måttu un dångkulun pininiti gi kurason-ña ya malågu, ya ha toktuk i lahi-ña ya ha chiku gui’. I ilek-ña i patgun, ‘Tåta, umisao yu’ kontra as Yu’us yan kontra hågu. Esta ti hu miresi ma’ågang lahi-mu.’ Låo i tata ha ågang i tentago’-ña ya ilek-ña, ‘Chuli’ mågi insigidas i mås måolik na magågu ya en na’minagågu gui’. Na’inaniyu’ yan na’sinapåtus gui’. Pues kenni’ i mås yommuk na tatneru ya en pinu’ ya ta fangguput! Ginin måtai esti na lahi-hu, ya lumå’la’ ta’lu; ginin malingu, låo masodda’ gui’ ta’lu.’ Pues matutuhun i giput.
I amku’ na che’lu iståba gi lanchu mientras manmasusesedi esti siha. Gi biradå-ña guatu gi gima’ ha hunguk i dandan yan i baila. Ha ågang unu gi tentågu’ ya ha faisin, ‘Håfa guaha?’ Manoppi i tentågu’ ya ilek-ña, ‘Tuma’lu tåtti i che’lu-mu gi gima’-miyu ya ha punu’i si tatå-mu ni yemmuk na tatneru, sa’ put i måttu gui’ tåtti ya ti chetnudan.’ Nina’gof lalålu’ i amku’ na che’lu nu esti ya ti malagu’ humålum gi gima’; pues humuyung i tata ya finaisin gui’ na u hålum put fabot.
“Låo ilek-ña as tatå-ña, ‘Hekkua’ kuåntus åñus di kalang yu’ i isklåbu, hu fachu’chu’i håo, ya nungka nai ti hu osgi i tinago’-mu siha. Ya håfa nina’i-mu nu guåhu? Ni sikera un chiba para gipot-tu yan i amigu-hu siha! Låo anai måttu esti i lahi-mu, dispues di ha dispitdisia i guinaha-mu gi famalåo’an chålan, un punu’i gui’ ni yemmuk na tatneru!’
“Ineppi ni tata, ilek-ña, ‘Ihu, hågu todu i tiempu gagaigi håo guini gi gima’ ya todu i guinaha-hu iyom-mu. Låo debidi ta fangguput yan ta fanmaguf, sa’ i che’lu-mu ginin måtai, ya lumå’la’ ta’lu; ginin malingu, låo esta masodda’.”
I Ibangheliun i Saina.
