FINENE’NA NA TINAITAI Is 7, 10-14
Un tinaitai ginin i Lepblun i Prufeta as Isaias
I Saina Ha kuentusi si Ahaz: Fanggågåo un siñåt ginin i Saina i Yi’os-mu; na’taddong-ña ki i mås tåddung na tånu’ pat na’mås takkilu’ ki i mapagåhis! Låo si Ahaz manoppi “Mungnga yu’ manggågåo! Mungnga yu’ tumenta i Saina!” Pues ilek-ña: Ekkunguk, O gima’ David! Ada ti nahung ha’ na para un na’fanyayas i taotåo, kåo un nisisita na un na’yayas lokkui’ i Yi’os-su? Ennåo na i Saina mismu para un nina’i nu esti na siñåt: I bithen para u kåtga gi tiyån-ña un påtgun, ya para u fañågu låhi ya para u mafa’na’an Emmanuel.
I finu’ i Saina.
INEPPIN I SÅTMU Ps 24, 1-2. 3-4. 5-6
R. (7. 10) NA’HÅLUM I SAINA; GUIYA I RAI I GLORIA.
Iyun i Saina i tanu’ yan i guinaha-ña,
i tanu’ yan todu i mañåsaga guennåo.
Sa’ Ha kåhat hulu’ gi halum tåsi,
yan Ha istapblesi gi halum sadduk.
INEPPI…..
Håyi siña kahulu’ gi sabånan i Saina?
Osino håyi siña tumohgi gi santus na lugåt-ña?
Atyu i manai isåo kannai-ñiha yan manggåsgas kurason-ñiha,
ni ti manmama’titinas mamfåtsu na prumesa.
INEPPI…..
Siempri marisibi bendision ginin i Saina,
un premiu ginin as Yu’us i nana’librin-ñiha.
Ennagui’ na råsan tåotåo ni gumufli’i’ i Saina,
ni umispipiha i matan i Yi’us Jacob.
INEPPI…..
SIGUNDU NA TINAITAI Rom 1, 1-7
Un tinaitai ginin i Kattan San Pablo para i taotåo Roma
Si Pablo, un sitbentin i Kristo Jesus, ni ma’ågang para apostut yan ma’atyik para u pruklåma i ibangheliun Yu’us ni hagas Ha prumeti desdi i antigu na tiempu ginin i mamprufeta, taimanu ha’ i ha rihistra i Sagråda Iskretura–i ibangheliu put i Lahi-ña, ni mafañågu sigun i sensin ginin i rasan David låo humuyung Lahin Yu’us gi pudet sigun gi espiritun sinantusan, put i resureksion-ña ta’lu ginin i finatai: si Jesukristo i Saina-ta. Ginin Guiya na manmafaburesi hit para ta fanapostulis, kosa ki siña ta chalapun i na’ån-ña yan ta na’fanmåttu guatu gi ubidiente na hinenggi gi todu i MamPagånu na nasion, hamyu unu gi entri esti siha na nasion manma’ågang para en fanåotåo Jesukristo. Para todu hamyu ni mangguinaiyan Yu’us giya Roma, ni manma’ågang para en fansinantusan na taotåo-ña, i gråsia yan i pås ginin as Yu’us Tatå-ta yan i Saina as Jesukristo.
I finu’ i Saina.
IBANGHELIU Mt 1, 18-24
ÅLELUIA Mt 1, 23
R. Åleluia. UN BITHEN U FAÑÅGU LÅHI:
I NA’ÅN-ÑA PARA SI EMMANUEL:
GAIGI SI YU’US GIYA HITA. R. Åleluia.
+ Un tinaitai ginin i såntu Ibangheliu sigun gi tinigi’ San Mateo
Taiguini mafañagu-ña si Jesukristo. Si nanå-ña as Maria kumuntråta esta na para u ássagua yan si Jose, låo åntis di u ássagua i dos ha tungu’ si Maria na para u gai patgun ginin i Espiritu Såntu. Si Jose, ni kuntratå-ña para asaguå-ña, todu i tiempu i maolik ha chocho’gui; låo ti malagu’ na u na’mamåhlåo si Maria gi me’nan tåotåo, pues ha disidi na u påra i dos sikretamenti. Mientras ha hahassu esti, finattoigui ni anghit i Saina gi guinifi-ña ya ilek-ña: “Jose lahin David, cha’-mu ma’å’a’ñåo kumonni’ si Maria para asaguå-mu. Ginin i Espiritu Såntu na mumapotgi’ gui’. U gai lahi ya u mafa’na’an Jesus sa’ Guiya para u na’fansåfu i taotåo-ña siha ginin i isao-ñiha.”
Manmasusedi esti siha intonsis, put i para u makumpli i finu’ i Saina ni sinangan i prufeta: “Un bithen u mapotgi’ ya u gai lahi, ya u ma’ågang Emmanuel” (ni kumeke’ilekña, “Manhihita yan si Yu’us”). Pues anai makmåta si Jose ha cho’gui håfa tinago’-ña i anghit ya ha asagua si Maria.
I Ibangheliun i Saina.
