FINE’NA NA TINAITAI Zep 2, 3; 3, 12-13
Un tinaitai ginin i Lepblun i Prufeta as Zephaniah
Ispiha i Saina, hamyu ni manhumitdi gi tanu’, ni kumukumpli i tinago’-ña siha; Ispiha i hustisia, ispiha i hinimitdi; siña ha’ mana’lihing håo gi ha’ånin i linalålu’ i Saina.
Låo bai hu na’sopbla gi entalu’-miyu un gurupun tåotåo ni manhumitdi yan manakpapa’, Håyi para u fanlihing gi na’an i Saina: i mansopbla siha na tåotåo Israhet. Tåya’ tailayi u macho’gui yan ti u fanmandagi; Ya ti u masodda’ gi pachut-ñiha mandåkun na hula’; Para u mapåstu yan u mana’diskånsa i ga’-ñiha kinilu ya tåya’ u faninistotba siha.
I finu’ i Saina.
INEPPIN I SÅTMU Ps 146, 6-7. 8-9. 9-10
R. (Mt 5, 3) MANDICHOSU I MAMOPBLIN HINALUM, SA’ U IYUN-ÑIHA I RAINUN I LANGIT.
I Saina tåya’ nai malingu hinenggen-ña, Ha nåna’i hustisia i manmapetsisigi, yan nengkannu’ para i manñålang.
I Saina Ha sosotta i manmapreresu.
INEPPI…..
I Saina muna’fanmanlili’i’ i mambåtchit; i Saina Ha håhatsa hulu’ atyu siha i manetekkun påpa’.
I Saina Ha guaiya i manunas; i Saina Ha prutetehi i manistrangheru.
INEPPI…..
Ha susteteni i manai saina yan i mambi’uda, låo Ha kokontra i kinalamtin i manailayi.
I Saina u fanggubetna para todu i tiempu, i Yi’os-mu, Sion, para todu i hinerasion! Åleluia!
INEPPI…..
SIGUNDU NA TINAITAI 1 Cor 1, 26-31
Un tinaitai ginin i fine’na na Kattan San Pablo para i taotåo Corinth Håfañe’lus, unu hamyu gi entalu’ atyu siha i manma’ågang. Kunsidera i iståo nai manggaigi hamyu. Ti meggai giya hamyu manomtum, taiguihi na klåsin tinemtum ni makunsidedera ni taotåo siha; ti meggai giya hamyu manmetgut gi kumunidå; yan siguru na ti meggai gi entri hamyu manakkilu’ manmafañagun-miyu. Si Yu’us Ha atyik atyu siha i manmapopo’lu kumu manáibali para u na’fanmamåhlåo i manomtum; Ha atyik atyu siha i ti manmetgut para u na’fanmamåhlåo i manmetgut. Ha atyik atyu siha i manakpapa’ manmafañagun-ñiha yan i manmadispreresia, atyu siha i manmakunsidedera na manáibali, para u fanrinibåha para tåya’ atyu siha i umå’aluk na mangguaha siha; kosaki i taotåo ti siña bumanidosu gi me’nan Yu’us. Guiya si Yu’us numa’i hamyu lina’la’ ginin as Jesukristo. [Si Yu’us Ha fa’tinemtom-ta si Jesukristo, i muna’fañåsantus hit, yan i muna’fanlilibri hit. Guiya esti atyu i mismu i un sodda’ na matutugi’, “Sotta atyu i para u banidosu, ya u banidosu gi Saina.”
I finu’ i Saina.
IBANGHELIU Mt 5, 1-12
ÅLELUIA Mt 5, 12a R.
Åleluia. FANMAGUF, SA’ UN DÅNGKULUN PREMIU NUMANANGGA HAMYU GI LANGIT.
R. Åleluia.
+ Un tinaitai ginin i såntu Ibangheliu sigun gi tinigi’ San Mateo
Ha li’i’ si Jesus i linahyan tåotåo, ya humånåo hulu’ gi eksu’ ya matå’chung påpa’. Pues i mandisipulu lokkui’ manetnun gi uriyå-ña, ya Ha tutuhun fuma’nå’gui siha: “Manmaguf atyu siha i mamopbli hinalum-ñiha: u iyun-ñiha i Rainun i langit!
“Manmaguf atyu siha i mampininiti: si Yu’us u fangkinensuela!
“Manmaguf atyu siha i manhumitdi: siha u rinisibi i prumesan Yu’us!
“Manmaguf atyu siha i minalagu’ Yu’us mås takkilu’ para u macho’gui: siempri nina’fanggof satisfetchu as Yu’us!
“Manmaguf atyu siha i manyo’asi’ ni ottru tåotåo: si Yu’us u yo’asi’ nu siha!
“Manmaguf atyu siha i mansinsiyu kurason-ñiha: siha u mali’i’ si Yu’us! “Manmaguf atyu siha i numa’kekeguaha pås gi taotåo siha: u faninagang as Yu’us famagu’on-ña!
“Manmaguf atyu siha i manmamadedesi put i machocho’gui i minalagu’ Yu’us: u iyun-ñiha i Rainun i langit!
“Manmaguf hamyu yanggin manma’insutta pat manmapetsigi, pat manmasångan todu klåsin dinagi kontra hamyu sa’ put i mandisipulu-hu hamyu. Fanmaguf sa’ un dångkulun premiu numanangga hamyu gi langit.
I Ibangheliun i Saina.
