FINE’NA NA TINAITAI Gn 3, 9-15. 20
Un tinaitai ginin i Lepblun Genesis
Dispues di ha kånnu’ si Adan i tinekcha’ i trongku, inagang gui’ as Yu’us i Saina ya finaisin gui’, “Månggi håo?” Manoppi si Adan, “Hu hunguk Håo gi hatdin, låo ma’å’ñåo yu’ sa’ sin magågagu yu’, atyu na umatuk yu’.” Pues finaisin ta’lu ni Saina, “Håyi sumangåni håo na sin magågagu håo? Intonsis esta håo chumotchu ginin atyu na trongku ni Hu ingkåtga håo na cha’-mu kåkannu’!” Manoppi i lahi, “I palåo’an ni Un po’lu guini – guiya numå’i yu’ ni frutan i trongku, atyu na hu kånnu’.” Dispues si Yu’us i Saina Ha faisin i palåo’an, “Håfa muna’un cho’gui ennåo?” Manoppi i palåo’an, “I aniti trumaiduti yu’, atyu muna’hu kånnu’ i fruta.”
Ilek-ña dispues si Yu’us i Saina guatu gi aniti: ‘Sa’ put i esta un cho’gui esti, hågu un mana’suha gi todu i ga’ga’ siha yan gi todu manmachålik na fina’tinas; Un kunanaf gi tiyån-mu, ya i edda’ un kåkannu’ gi todu i ha’ånin i lina’lå’-mu. Bai Hu na’achatli’i’ hamyu yan i palåo’an, ya u fanachatli’i’ lokkui’ i famagu’on-mu yan i famagu’on-ña; Guiya i aniti u sakudi i ilu-mu ya hågu un sakudi i dedigon-ña.”
I lahi ha fa’na’an i asaguå’-ña si Eba, sa’ guiya humuyung nanan todu i manlå’la’la’.
I finu’ i Saina.
INEPPIN I SÅTMU Ps 98, 1. 2-3. 3-4
- (1) KANTÅYI I SAINA UN NUEBU NA KÅNTA,
SA’ ESTA HA CHO’GUI MANNA’MANMAN NA FINA’TINAS.
Kantåyi i Saina un nuebu na kånta,
sa’ esta Ha cho’gui manna’manman na fina’tinas,
i agapa’ na kannai-ña yan i santus na koddu-ña,
muna’fanggånna Gui’.
INEPPI…..
I Saina Ha na’matungu’ na manggånna Gui’;
gi me’nan i nasion siha ha na’matungu’ i sasatba na fuetsån-ña,
Esta Ha hassu na fiet i guinaiya-ña
para i gima’ Israhet.
INEPPI…..
Todu i puntan tånu’ esta mali’i’
i satbasion ginin i Yi’os-ta.
Fangånta kun minaguf para i Saina, todu i tanu’;
kantåyi tinina yan essalåo minaguf.
INEPPI…..
SIGUNDU NA TINAITAI Eph 1, 3-6. 11-12
Un tinaitai ginin i Kattan San Pablo para i taotåo Ephesus
Hafañe’lus:
Maila’ ya ta nå’i gråsia si Yu’us yan Tatan i Saina-ta as Jesukristo! Gi mandanña’-ta yan i Kristo esta Ha bendisi hit ya Ha nå’i hit todu klåsin ispirituhåt na bendision gi langit. Desdi åntis di u mafa’tinas i tanu’, esta si Yu’us Ha atyik hit para iyon-ña ginin i madanña’-ta yan i Kristo kosaki siña hit mañåntus yan manái difektu gi me’nå-ña. Put i guinaiya-ña na Ha disidi si Yu’us na para u na’famagu’on-ña hit ginin i Kristo–estegui’ i minagof-ña yan i minalago’-ña. Maila’ ya ta tuna si Yu’us put i gloriosu na grasiå-ña, sa’ put i dibåtdi na rigålu ni Ha nå’i hit ginin i Ha guaiya na Lahi-ña!
Manmacho’cho’gui todu i kosas siha sigun gi planun Yu’us yan gi disision-ña; ya si Yu’us Ha atyik hit para tåotåo-ña gi dinanña’ yan i Kristo sa’ put i planu-ña, sigun gi disision-ña desdi i tutuhun. Pues nihi ya hita ni fine’na manmanangokku gi Kristo ta tuna i glorian Yu’us!
I finu’ i Saina.
IBANGHELIU Lk 1, 26-38
ÅLELUIA Lk 1, 28
- Åleluia. ÅBE, MARIA, BULA GRÅSIA, I SAINA GAIGI GIYA HÅGU;
MATUNA HÅO ENTRI I FAMALÅO’AN SIHA.
- Åleluia.
+ Un tinaitai ginin i såntu Ibangheliu sigun i tinigi’ San Lucas
Gi mina’sais mesis, i anghit as Gabriel nina’hånåo as Yu’us guatu gi un songsung giya Galileha ni mafa’nana’an Nasaret, para un bithen ni para u ásagua yan un låhi ni na’ån-ña si Jose, ginin i gima’ David. Maria na’ån-ña esti na bithen. Måttu i anghit giya guiya ya ilek-ña, “Na’maguf håo, O sen matuna na finañågu. Matuna håo entri todu i famalåo’an.” Gof inistotba si Maria ni sinangan i anghit, ya nina’manman håfa esti siha na palåbra kumeke’ilekña. Sinangåni ni anghit: “Cha’-mu ma’å’a’ñåo, Maria, sa’ sen måolik si Yu’us nu hågu. Siempri mapotgi’ håo ya un fañågu un påtgun låhi, ya un fa’na’an Gui’ Jesus. U takkilu’ Gui’ ya u ma’ågang Lahin i Mås Takkilu’. I Saina as Yu’us u nina’i Gui’ ni tronun David, i tatå-ña. Ya u rai Gui’ para i famagu’un Jacob para todu i tiempu ya i rainon-ña u tai finakpu’.” Ilek-ña si Maria nu i anghit, “Taimanu para u masusedi esti sa’ tåya’ tåotåo pumapatcha yu’?” Manoppi i anghit, “I Espiritu Såntu u tunuk påpa’ gi hilo’-mu, ya i fuetsan i Todu Ha Na’siña un tinampi; put esti na rason i santus na påtgun u ma’ågang Lahin Yu’us. Hahassu i parentes-mu as Isabel. Masångan na ti siña gui’ gumai patgun; låo esta sais mesis mapotgi’, achukka’ sen amku’ gui’. Sa’ para si Yu’us tåya’ ti Ha na’siña.” Ilek-ña si Maria, “Guåhu i tentågu’ i Saina. U macho’gui giya guåhu taimanu ha’ i sinangån-mu.” Pues diningu gui’ ni anghit.
I Ibangheliun i Saina.
