FINENE’NA NA TINAITAI Acts 2, 14. 22-33
Un tinaitai ginin i Bidan i Manapostulis
(Gi ha’ånin Pentekostes) Tumohgi si Pedro yan i Onsi na manapostulis ya ha håtsa i bos-ña ya ha kuentusi i taotåo siha: “Hamyu ni ManHudihos, yan todu hamyu lokkui’ ni mañåsaga giya Hirusalen! Ekkunguk håfa para bai hu sangåni hamyu. “Lalåhin Israhet, ékkunguk yu’! Si Jesus Nasarenu, Guiya i taotåo ni matågu’ ginin as Yu’us guatu giya hamyu na nina’i fuetsan milågru, manna’manman na cho’chu’, yan siñåt siha para kuentan prueba. Si Yu’us machocho’chu’ gi entalu’-miyu ginin Guiya tåtkumu esta en tingu’. Ma’intreganñaihun Gui’ sigun gi rason yan gi planun Yu’us; hamyu en isa i MamPagånu siha para u maklåba yan u mapunu’ Gui’. Låo si Yu’us Ha na’libri Gui’ ginin i minala’it i finatai, ya Ha na’kahulu’ Gui’ ta’lu ginin i entalu’ i manmåtai, sa’ impusipbli na u minantieni ni finatai. Ilek-ña si David, put Guiya:
‘Hu po’lu i Saina todu i tiempu gi me’nå-hu,
ya ti u ma’atburota yanggin gaigi Gui’ gi agapa’-hu.
Esta maguf i kurason-hu yan mumaguf i hila’-hu,
låo i tataotåo-hu u lå’la’ gi ninangga,
sa’ ti para Un abandona i anti-hu gi tanu’ i manmåtai,
yan ti Un sedi lokkui’ na i dumalalalaki Håo u lamas tataotåo-ña.
Esta Un fa’nu’i yu’ ni chalan lina’la’;
ya siempri Un na’bula yu’ ni minaguf gi me’nå-mu.’
“Mañe’lu-hu, siña hu kuentusi hamyu yan kumfiånsa put i tatå-ta as David. Måtai gui’ yan mahåfut, ya i naftan-ña gagaigi ha’ asta på’gu gi entalo’-ta. Prufeta gui’ ya ha tungu’ ha’ na si Yu’us manhula giya guiya na unu gi disendensiå-ña u fatå’chung gi hilu’ i tronu-ña. Ilek-ña na ti ma’abandona gui’ para i sampapa’ na tånu’, ni ti lumamas i tataotåo-ña, ya ginin ennåo na ha pruklåma kun tiempu i resureksion i Misihas. Guiya esti si Jesus ni nina’lå’la’ as Yu’us, ya hami i tistigu-ña. Mana’takkilu’ Gui’ gi agapa’ na kannai Yu’us, Ha risibi fine’na i Espiritu Såntu ni maprumeti ginin i Tata, ya dispues Ha chuda’ huyung esti na Espiritu giya hita.
I finu’ i Saina.
INEPPIN I SÅTMU Ps 16, 1-2. 5.7-8. 9-10. 11
R. (11) ASAINA, HÅGU PARA UN FA’NU’I HAM NI CHALAN I LINA’LA’
Adahi yu’, O Yu’us, sa’ giya Hågu nai lumilihing yu’;
ilek-hu nu i Saina, “Hågu Saina-hu.”
O Asaina, Hågu i pattek-ku yan i taså-hu,
Hågu gumogo’ti fitmi i pattek-ku.
INEPPI…..
Bai hu tuna i Saina ni umakunseseha yu’;
Achukka’ puengi i kurason-hu ha å’agang yu’.
Todu i tiempu gagaigi i Saina gi me’nå-hu;
yanggin gaigi Gui’ gi fi’on-hu ti bai hu ma’atburota.
INEPPI…..
Put esti na trangkilu i kurason-hu ya maguf i anti-hu,
kuntodu i tatåotåo-hu gai kumfiånsa;
Sa’ ti para Un abandona i anti-hu para i sampapa’ na tånu’
yan ti para Un sedi i mamfiet na para u fanlamas.
INEPPI…..
Hågu para Un fa’nu’i yu’ ni chalan i lina’la’,
kabålis na minaguf gi me’nå-mu,
ya para todu i tiempu i minaguf gi agapa’-mu.
INEPPI…..
SIGUNDU NA TINAITAI 1 Pt 1, 17-21
Un tinaitai ginin i fine’na na Kattan San Pedro
En a’agang Gui’ Tåta, yanggin manmanåyuyut hamyu as Yu’us, ni Ha huhusga todu i taotåo parehu, sigun gi kadakuåt bidå-ña; put ennåo na gåsta i tetehnan gi tanu’ na lina’la’-miyu gi adorasion nu Guiya. En tingu’ håfa apås-ña anai mana’fanlibri hamyu ginin i tai setbi na klåsin lina’la’ ni manma’irensia hamyu ni mañainan-miyu. Åhi’, ti una kosa ni siña madistrosa, taiguihi i pidåsun salåppi’ pat oru; låo i mås guaguan na sakrifisiun i Kristo; ni kalang un kinilu ni tai difektu pat tai linachi.
Hagas inatyik Gui’ as Yu’us desdi åntis di u mafa’tinas i tanu’ ya på’gu mana’matutungu’ Gui’ guini gi uttimu na ha’åni put hamyu. Ginin Guiya na manmanhonggi hamyu as Yu’us, ni Guiya numa’lå’la’ Gui’ ta’lu ginin i finatai ya nina’i Gui’ gloria; put ennåo na i hinenggin-miyu yan i inangokkun-miyu chettun gi as Yu’us.
I finu’ i Saina.
IBANGHELIU Lk 24, 13-35
ÅLELUIA See Lk 24, 32
R. Åleluia. ASAINA JESUS, NA’KLÅRU I FINO’-MU NU HAMI,
NA’SINENGGI I KURASON-MÅMI NI GUINAIYA
YANGGIN UN KUENTUSI HAM.
R. Åleluia.
+ Un tinaitai ginin i såntu Ibangheliu sigun gi tinigi’ San Lucas
Atyu mismu na ha’åni dos gi entri i mandisipulun Jesus humåhanåo para un songsung ni mafa’nana’an ‘Emmaus’, kåsi ennåo i sietti miyas desdi Hirusalen, ya kumumbetsasiosion i dos put atyu siha i esta manmasusedi. Mientras kumuekuentus i dos, humihut si Jesus ya sumåonåo mamokkat yan siha; mali’i’ ha’ Gui’ låo ti matungu’ håyi Gui’. Ilek-ña si Jesus nu siha, “Håfa ilik-mimiyu mientras mamomokat hamyu?” Kumetu i dos un råtu, ya tristi i matan-ñiha. Unu giya siha ni na’ån-ña si ‘Cleopas’, ha faisin Gui’, “Kåo Hågu ha’ na maisa ni sumåsaga giya Hirusalen ti tumungu’ håfa måsusesedi gi manmaloffan siha na ha’åni?” Mamaisin Gui’, “Håfa siha?” Manoppi i dos, “Atyu siha i manmasusedi as Jesus tåotåo Nasaret. Prufeta esti na tåotåo, ya si Yu’us yan i taotåo siha makunsidedera Gui’ kumu metgut gi finihu’ yan gi fina’tinas. I manmå’gas na mamåli’-måmi ma’intrega Gui’ para u masintensia para u mapunu’, ya maklåba Gui’ gi kilu’us. Ya in diseseha na Guiya mohun para u nina’libri iya Israhet! Fuera di esti siha, på’gu na ha’åni i mina’tres dihas desdi ki manmasusedi esti siha. Unus kuåntus na famalåo’an gi mangga’chung-måmi ni muna’fanmanman ham; manhånåo siha para i naftan gi chatanmak, ya ti mahulat masodda’ i tataotåo-ña. Manmåttu tåtti giya hami ya manmasangåni ham na manmanli’i’ siha manångit ni sumangåni siha na lå’la’ Gui’. Unus kuåntus gi entri hami manhånåo para i naftan ya masodda’ taimanu ha’ i sinangan i famalåo’an, låo ti ma li’i’ Gui’.” Pues ilek-ña si Jesus nu siha, “Manatåktak hamyu, mansen dispåsiu hamyu para en henggi todu siha i sinangan i mamprufeta! Na ada ti nisisåriu na u padesi esti siha i Misihas para u hålum gi gloriå-ña?” Ya si Jesus Ha isplikåyi siha håfa manmasångan gi Eskritura put Guiya, Ha tutuhun gi lepblun Moises yan i tinigi’ todu i mamprufeta. Mientras manhåhanåo guatu gi sengsung ni mahanånagui, maditieni si Jesus gi hinanåo-ña. Ilik-ñiha, “Maila’ ya ta fanhita; esta para u hokkuk ha’ i ha’åni ya esta homhum.” Intonsis, humålum para u fañiha. Matå’chung Gui’ gi lamasa yan siha, ya Ha chuli’ i pån, ya Ha bendisi; dispues Ha ipi’ i pån ya mannina’i siha. Manmababa i matan-ñiha ya marikuknisa Gui’; låo malingu Gui’ ginin i me’nan-ñiha. Ilik-ñiha entri siha, “Kalang ha’ mohun guåfi mañiñila’ gi sanhalom-ta anai Ha kuentusi hit gi chalan ya Ha isplikåyi hit ni Eskritura? Insigidas kahulu’ i dos ya mabira siha tåtti para Hirusalen, ya masodda’ i Onsi na mandisipulu mandadañña’ yan i pumalu siha ilik-ñiñiha, “Sin duda esta lumå’la’ i Saina! Lini’i’ Gui’ esta as Simon!”
Pues maninisplikåyi siha ni esti i dos håfa masusedi gi chalan, yan håfa taimanu na marikuknisa i Saina anai Ha ipi’ i pån.
I Ibangheliun i Saina.
