FINE’NA NA TINAITAI Acts 2, 42-47
Un tinaitai ginin i Bidan i ManApostulis
I mañe’lu siha madalalaki i fina’nå’guin i manapostulis yan i lina’la’ i manmanhonggi, gi ma’ipi’ i pån yan i tinayuyut siha. Un rispitåo na mina’å’ñåo måttu giya siha, sa’ mali’i’ na meggai manna’manman na cho’chu’ yan siñåt macho’gui ni manapostulis. Atyu siha i manmanhonggi manapatti todu ni guinahan-ñiha kumu kumunidåt; ma bendi todu i guinahan-ñiha ya ma dibidi todu gi entri siha sigun gi nisisidåt unu kada unu. Manhåhanåo guatu gi lugåt i Templu kada diha, ya gi gima’-ñiha nai ma’i’ipi’ i pån. Manmamaguf yan mandadañña’ mañotchu, yan ma’o’onra si Yu’us ya magåga’um i kurason i taotåo siha. Kada diha si Yu’us Ha åomementa atyu siha i manmasåtba.
I finu’ i Saina.
INEPPIN I SÅTMU Ps 118, 2-4. 13-15. 22-24
R. (1) NÅ’I GRÅSIA I SAINA SA’ MÅOLIK GUI’, TAIHINEKUK I GINEFLI’E’-ÑA.
Po’lu i gima’ Israhet ya u åluk,
“I ginefli’i’ Yu’us dinidira todu i tiempu.”
Po’lu i gima’ Aaron ya u åluk,
“I ginefli’i’ Yu’us dinidira todu i tiempu.”
Po’lu atyu siha i manma’å’ñåo ni Saina ya u ma’åluk,
“I ginefli’i’ Yu’us dinidira todu i tiempu.”
INEPPI…..
Dångkulu atburutu-hu ya kumekepoddung yu’,
låo måttu i Saina para u akudi yu’.
I Saina, i fuetsåk-ku yan i minetgot-tu,
måttu giya guåhu kumu satbadot.
I na’maguf yan a’gang na essalåo
mahunguk ginin i tento’ i manmanggånna:
INEPPI…..
I atchu’ ni marichåsa ni atyu siha i manmanhåhatsa
mama’un åtchu’ ni imputtånti gi gima’.
I Saina muna’macho’gui esti;
mambunitu esti siha gi matå-ta.
I Saina fuma’tinas esti na ha’åni;
nihi ya ta fanmaguf på’gu ya ta silebra.
INEPPI…..
SIGUNDU NA TINAITAI 1 Pt 1, 3-9
Un tinaitai ginin i fine’na na Kattan San Pedro
Maila’ ya ta nå’i agradesimentu i Yi’us yan Tatan i Saina-ta as Jesukristo! Put i dangkulun mina’ase’-ña Ha nå’i hit nuebu na lina’la’ anai Ha na’lå’la’ ta’lu si Jesukristo ginin i finatai. Estigui’ muna’fambula hit ni lala’la’ na inangokku, ya put ennåo na ta nanangga na ta risibi i abundånsia na bendision ni Ha na’sahngi si Yu’us para i taotåo-ña siha. Ha na’sahngi esti siha gi langit para hamyu, anai ti siña u lamas pat u båba osino u falingu. Put i hinenggin-miyu na i fuetsan Yu’us u prutehi hamyu asta ki i satbasion ni mapripåra mana’annuk gi uttimun i tanu’. Na’fanmaguf hamyu put esti, achukka’ nisisåriu på’gu na en fantristi un råtu sa’ put i meggai klåsin achåki en padedesi. Mina’taiguini esti put i para en fanmachagi na magåhit i hinenggin-miyu. Kun todu i oru, ni siña madistrosa, machachagi kåo siña u dinistrosa ni guafi; pues parehu yan i hinenggin-miyu, ni guaguañña ki i oru, debi lokkui’ di u machagi, kosa ki u mesngun ya u fama’prueba para tinina yan gloria yan onru gi Ha’åni anai mana’annuk si Jesukristo. Achukka’ ti en lili’i’ Gui’, en gefli’i’ Gui’, yan en henggi Gui’. Pues fanmaguf gi un dångkulu yan gloriosu na minaguf ni mapput ma’isplika ni palåbra siha, sa’ en risisibi i satbasion para i antin-miyu, ni put esti na rason na manmanhonggi hamyu nu Guiya.
I finu’ i Saina.
