A
FINENI’NA NA TINAITAI Is 49, 3. 5-6
Un tinaitai ginin i Lepblun i Prufeta as Isaias
Ilek-ña i Saina nu guåhu: Hågu, Israhet, i sitbintek-ku, ginin hagu na mama’nunu’i yu’ ni gloriå-hu. Pues kumuentus i Saina ni fumotma yu’ kumu sitbinteñ-ña ginin i tiyan, kosa ki u makonni’ si Jacob tåtti para Guiya, ya u mana’dañña’ si Israhet yan Guiya. Ya guåhu bai hu huyung kumu dichosu gi me’nan i Saina yan i Yi’os-su Guiya på’gu i minitgot-tu. Ilek-ña gof dikiki’ håo para sitbintek-ku, para un håtsa hulu’ i rasan Jacob yan para un nana’lu i tetehnan na tåotåo Israhet; bai Hu fa’kåndit håo para todu i nasion siha kosa ki i satbasion-hu u hagu’ i puntan tånu’.
I finu’ i Saina.
INEPPIN I SÅTMU Ps 40, 2. 4. 7-8. 8-9. 10
R. ESTIGUI’ YU’, ASAINA MÅTTU YU’ PARA BAI HU CHO’GUI I
MINALAGO’-MU.
Hagas ha’ mannangga yu’, mannangga yu’ nu i Saina
ya tumekkun Gui’ påpa’ para guåhu ya Ha ékkunguk i inagång-hu.
Ya Ha po’luyi un nuebu na kånta i pachot-tu,
un himnu para i Yi’os-ta.
INEPPI…..
Ti Un diseseha inifresi yan sakrifisiu;
låo talanga ni manmababa para manmanosgi Un nå’i yu’.
Inifresin gå’ga’ pat inifresi para isåo ti Un ispipiha;
pues ilek-ku, “Atan sa’ måttu yu’.”
INEPPI…..
“I tinago’-mu nu guåhu manmatugi’ gi royun påppit.
Para bai hu cho’gui i pinto’-mu ennåo minagof-fu;
Yu’os-su, i tinago’-mu gaigi gi halum kurason-hu.!”
INEPPI…..
Hu anunsia i bidå-mu gi dangkulu na inetnun tåotåo;
Ti hu suheta i labios-su; Hågu, O Asaina, tistigu-hu.
INEPPI…..
SIGUNDU NA TINAITAI 1 Cor 1, 1-3
Un tinaitai ginin i fine’na na Kattan San Pablo para i taotåo Corinth
Ginin as Pablo ni ma’ågang ginin i minalagu’ Yu’us para u apostut i Kristo Jesus, yan ginin i che’lu-ta as Sosthenes — Para i Gima’Yu’us ni gaigi giya Corinth, para todu atyu siha i manma’ågang para u fanhålum mañåntus na famagu’un Yu’us, ni iyun Yu’us ni mandadañña’ yan i Kristo Jesus, mañisiha yan todu i taotåo gi todu i bånda ni umadodora i Saina-ta as Jesukristo, i Sainan-ñiha yan Saina-ta: Puedi si Yu’us Tatå-ta yan i Saina as Jesukristo en fannina’i ni gråsia yan pås.
I finu’ i Saina.
IBANGHELIU Jn 1, 29-34
ÅLELUIA.
R. Åleluia. I FINIHU’ MAMA’TÅOTÅO YA SUMÅGA GI ENTALO’-TA.
ATYU SIHA I UMAKSEPTA GUI’,
HA NÅ’I SIHA PUDET PARA U FAMFAMAGU’UN YU’US.
R. Åleluia.
+ Un tinaitai ginin i såntu Ibangheliu sigun gi tinigi’ San Juan
Gi sigenti diha anai ha ripåra si Juan na guaguaguatu si Jesus giya guiya, umessalåo gui’:
“Atan guatu! I Kinilun Yu’us ni fumufunas i isåo siha gi tanu’! Put Guiya na ilek-ku: ‘Dispues di guåhu para u fåttu un tåotåo ni ma’gås-ña ki guahu, sa’ put mofo’ña Gui’ ki guahu.’ Ni guåhu ti hu tungu’ Gui’, ya put ennåo na rason na måttu yu’ manakpåpangi nu i hanum, kosa ki siña u matungu’ Gui’ giya Israhet. “Mannå’i si Juan ni esti na testimoñu lokkui’: “Hu li’i’ i Espiritu tumutunuk påpa’ kalang un paluma ginin i mapagåhis, ya tumohgi gi hilo’-ña. “Låo ti hu tungu’ Gui’. Atyu i muna’hånåo yu’ para bai hu fanakpångi ni hanum sumangåni yu’, ‘Yanggin un li’i’ i Espiritu tumunuk ya tumohgi gi un tåotåo, Guiya ennåo i para u fanakpångi ni Espiritu Såntu.’ På’gu guåhu mismu lumi’i yan tumistigu, ‘Guiya esti i Lahin Yu’us.'”
I Ibangheliun i Saina.
