FINE’NA NA TINAITAI Acts 1, 1-11
I tutuhun i che’chu’ i Manapostulis
Gi fine’na na tinige’-hu, Theophilus, hu sångan todu i Ha cho’gui yan i Ha fa’nå’gui si Jesus asta i ha’åni anai makonni’ Gui’ hulu’ gi langit, dispues di Ha ingkåtga i apostulis siha ni Ha atyik ginin i Espiritu Såntu. Duråntin i tiempu dispues di i masa’pet-ña, Ha fa’nu’i siha yan bula prueba na låla’la’ Gui’, ya Ha bisita siha gi duråntin i kuarenta dihas, yan Ha kuentutusi siha put i Rainun Yu’us. Un ukasion anai manetnun siha, Ha sangåni na mungnga madingu iya Hirusalen: “Nangga i makumplin i prinimetin Tatå-hu, ni en hinguk Yu’ sumångan. Si Juan manakpångi ni hanum, låo ti u åpmam en fanmatakpångi ni Espiritu Såntu.”
Mientras mañisiha manmamaisin i manapostulis, “Asaina, kåo para Un na’ta’lu tåtti i areklu giya Israhet på’gu?” I inippen-ña taiguini, “I eksåktu na ora, ti iyun-miyu para en tingu’. I Tata Ha na’sahngi ennåo para Guiya ha’. Siempri en risibi pudet yanggin måttu påpa’ i Espiritu Såntu giya hamyu; pues siempri hamyu en fantistigu-hu giya Hirusalen, gi todu iya Hudeha yan Samåria, hunggan kuntodu asta i puntan tånu’.” Ti åpmam na Ha sångan esti mahåtsa Gui’ hulu’ gi me’nan matan-ñiha gi mapagåhis ni tumåmpi Gui’ ginin i inatan-ñiha. Manalakhihilu’ ha’ trabiha gi langit anai tumohgi gi fi’un-ñiha dos na tåotåo ni minagågagu å’paka’. Ilik-ñiha, “Tåotåo Galileha, håfa na monotohgi hamyu guini ya en a’atan hulu’ i mapagåhis? Si Jesus ni makonni’ ginin hamyu, u ta’lu mågi, taimanu ha’ anai en li’i’ Gui’ kahulu’ gi langit.”
I finu’ i Saina.
INEPPIN I SÅTMU Ps 47, 2-3. 6-7. 8-9
R. (6) KAHULU’ SI YU’US GI TRONU-ÑA GI ENTALU’ ESSALÅO MINAGUF;
MANGÅTI I TRUMPETA PARA I SAINA.
Na’påkpak kannai-miyu todu hamyu ni taotåo
fanessalåo námaguf para si Yu’us.
Sa’ i Saina, i Mås Takkilu’, i na’ma’a’ñåo,
i mås må’gas na rai todu i tanu’.
INEPPI ….
Kahulu’ si Yu’us gi tronu-ña gi halum essalåo minaguf;
Kahulu’ i Saina gi dumåndan i trumpeta.
Kantåyi tinina si Yu’us, kantåyi tinina;
kantåyi tinina para i rai-ta, kantåyi tinina.
INEPPI ….
Si Yu’us rai gi todu i tanu’;
kantåyi kantan tinina.
Si Yu’us rai todu i nasion siha;
matå’chung Gui’ gi santus na tronu-ña.
INEPPI ….
SIGUNDU NA TINAITAI Eph 1, 17-23
Un tinaitai ginin i Kattan San Pablo para i taotåo Ephesus
Hafane’lus:
Hu gågagåo i Yi’us i Saina-ta as Jesukristo, i gloriosu na Tåta, para en fannina’i ni Espiritu, ya Guiya u na’fanomtum hamyu ya en famfina’nu’i as Yu’us, para ki siña en tingu’ Gui’. Hu gågagåo na u fanmababa i hinassun-miyu pare en li’i’ i ininå-ña, para ki siña en tingu’ i ninangga ni manina’agang hamyu guatu, sa’ gof riku i manna’manman na bendision siha ni ha prumeti i taotåo-ña, yan gof metgut i fuetsån-ña machocho’chu’ giya hita ni manmanhonggi. Esti na fuetsa ni machocho’chu’ giya hita parehu yan atyu i metgut na fuetsa ni Ha usa anai Ha na’lå’la’ ta’lu i Kristo ginin i finatai ya Ha na’fatå’chung Gui’ gi agapa’-ña gi linangitan na tånu’.
Manggubebetna i Kristo guennåo gi hilu’ todu i manlinangitan na manmå’gas, åoturidåt, minetgut, yan saina siha; gaigi giya Guiya un takkilu’ na titulu ni takkilo’ña ki todu i guaha na titulun åoturidåt guini na tånu’ yan gi tanu’ ni mamamaila’. Esta si Yu’us Ha po’lu todu i kosas siha gi papa’ i adding i Kristo yan Ha nå’i i Gima’Yu’us ni Kristo kumu i mås takkilu’ na Saina gi hilu’ todu. I Gima’Yu’us Guiya i tatåotåo i Kristo, Guiya i muna’kabåbalis i Gima’Yu’us ya Guiya i Kristo mismu muna’fangabåbalis todu i kosas siha gi todu i lugåt.
I finu’ i Saina.
B
IBANGHELIU Mk 16, 15-20
Åleluia Mt 28, 19. 20
R. Åleluia. FANHÅNÅO YA EN FA’NÅ’GUI TODU I TAOTÅO NU I IBANGHELIU.
BAI HU GAIGI GIYA HAMYU ASTAKI I UTTIMUN I TANU’.
R. Åleluia.
Un tinaitai ginin i såntu Ibangheliu sigun gi tinigi’ San Marcos
Ilek-ña si Jesus nu siha, “Fanhånåo para todu i tanu’ ya en pruklåma i Maolik na Nutisia gi todu i nina’huyung. I taotåo ni manhonggi ya ha aksepta i tinakpångi u masåtba; i taotåo ni ti malagu’ manhonggi, u makundena. Atyu siha i prumufefesa i hinenggin-ñiha maninakumpåpaña ni esti siha na siñåt: u ma’usa i na’ån-hu para u fanmandulalak aniti, u fanguentus interamenti mannuebu na lingguåhi, u fansiña manmanggo’ti kulepbla, u faniña manggimin binenu ya ti u nina’fanlåmin, u mana’fanhomlu’ i manmalångu ni manmapatcha ilun-ñiha.”
Dispues di mangkuinentusi siha as Jesus makonni’ Gui’ hulu’ gi langit ya matåta’chung gi agapa’ Yu’us. Manhånåo i Onsi huyung ya mañetmun gi todu i lugåt. Ha kuntinuha i Saina macho’chu’ yan siha gi todu i bånda ya Ha kumfifitma i fina’nå’gui ginin i siñåt ni maninakumpåpaña siha.
I Ibangheliun i Saina.
