FINE’NA NA TINAITAI 2 Sm 5, 1-3
Un tinaitai ginin i sigundu na Lepblun Samuel
Todu i rasan Israhet manmåttu guatu as David giya Hebron ya ilik-ñiha: “Estigui’ ham todu,
i te’lång-mu yan i sinsen-mu. Gi manmaloffan siha na tiempu, anai iståba si Saul rai-måmi,
hågu kumonni’ huyung yan kumonni’ tåtti i Israelitas siha. Ya ilek-ña i Saina nu hågu, ‘Hågu para un pastot para i taotåo-hu Israelitas, yan hågu para må’gas iya Israhet.’ ” Anai manmåttu todu i manåmku’ giya Israhet guatu gi as David giya Hebron, mama’tinas kuntråta i Rai as David yan i taotåo siha guihi gi me’nan i Saina, ya ma’olius gui’ para rai iya Israhet.
I finu’ i Saina.
INEPPIN I SÅTMU Ps 122, 1-2. 3-4. 4-5
R. MUMAGUF YU’ ANAI HU HUNGUK SIHA MA’ÅLUK:
NIHI TA FANHÅNÅO PARA I GIMA’ I SAINA
Maguf yu’ anai ilik-ñiha nu guåhu,
“Nihi ta fanhånåo para i gima’ i Saina.”
Ya på’gu esta manotohgi ham gi halum
i trångkan Hirusalen.
INEPPI…..
I siudån Hirusalen, mahåtsa kumu siudå,
makollat uriyå-ña.
Manmåfattu mågi guini i taotåo,
i taotåo i Saina.
INEPPI…..
Sigun gi manmatågu’ i taotåo Israhet,
para u manå’i gråsia i na’an i Saina.
Guini nai manlistu i ta’chung i hues,
i tronun i familian David.
INEPPI…..
SIGUNDU NA TINAITAI Col 1, 12-20
Un tinaitai ginin i Kattan San Pablo para i taotåo ‘Colassae’
Hafañe’lus:
Gi minaguf nå’i gråsia i Tata, ni Ha na’fandiknu hamyu para en fanmanå’i ni pattin-miyu ni atyu i Ha na’sahngi si Yu’us para i taotåo-ña gi rainun i inina. Esta Ha riskåta hit ginin i fuetsan i hinemhum ya Ha konni’ hit såfu guatu gi rainun i Ha gofli’i’ na Lahi-ña, ni ginin Guiya na mana’fanlibri hit todu, kumeke’ilekña, manma’asi’i hit ni isåo-ta siha.
I Kristo Guiya i a’annuk na imåhin i ti a’annuk na Yu’us. Guiya i primirisa na Patgun Låhi, ni takkilo’ña ki todu i manmafa’tinas siha. Ginin Guiya na si Yu’us Ha fa’tinas todu i kosas siha gi langit yan gi tanu’, i mana’annuk yan i ti mana’annuk na kosas siha, kuntodu i espirituhåt na fuetsa, i saina siha, i manmå’gas yan i åoturidåt siha. Ha fa’tinas si Yu’us interu i tanu’ yan i langit ginin Guiya yan para Guiya. Mo’na i Kristo gaigi ki todu i kosas siha, ya gi dinañña’ yan Guiya todu i kosas siha guaha sagan-ñiha. Guiya i kabesan i tataotåo-ña, era i Gima’Yu’us; ya ginin Guiguiya i lina’la’ i tataotåo. Guiya i primirisa na Patgun Låhi, ni mana’lå’la’ ginin i finatai, kosaki Guiya ha’ na maisa u primeru gi todu i nina’huyung siha. Ginin i disision Yu’us ha’ mismu na gaigi gi Lahi-ña i kabålis na naturan Yu’us. Ennåo na si Yu’us Ha disidi para u na’ta’lu tåtti giya Guiya interu i tanu’ yan i langit ginin i Lahi-ña. Ha na’fåttu si Yu’us i pås ginin i sakrifision i finatai i Lahi-ña gi kilu’us, ya ginin esti na Ha na’ta’lu tåtti giya Guiya interu i kosas siha, gi tanu’ yan kuntodu gi langit.
I finu’ i Saina.
IBANGHELIU Lk 23, 35-43
ÅLELUIA (Mk 11, 10)
R. Åleluia. UMATUNA GUI’ NI MAMAMAILA’ GI NA’AN I SAINA.
UMATUNA GUI’ NI UMIRENSIA I RAINUN DAVID I TATÅ-TA;
R. Åleluia.
+ Un tinaitai ginin i såntu Ibangheliu sigun i tinigi’ San Lucas
I manmå’gas siha manotohgi guennåo mabutleleha si Jesus ilik-ñiñiha, “Ha na’fanlibri i pumalu siha; sotta ya u na’librin maisa Gui’ yanggin Guiya i Misihas ginin as Yu’us, i ma’atyik.”
I sindålu siha lokkui’ mafa’chalik Gui’, mangguaguaguatu giya Guiya para u ma ufresi ni ma’aksum na binu ilik-ñiñiha, “Yanggin Hågu i Rai i ManHudihos, na’librin maisa Håo.”
Iståba un tinigi’ gi hilu’ i ilu-ña, “Guiya esti i Rai i ManHudihos.”
Unu gi kriminåt ni uma’akalayi’ gi kilu’us chinatfinu’i Gui’, “Na ada ti Hågu i Misihas? Pues na’libri Håo yan hami.” Låo linalåtdi Gui’ nu i ottru, “Ada tai ma’a’ñåo håo as Yu’us, na ada ti un lili’i’ na parehu na sintensia nai manggaigi hit? Hita, hunggan, ta miresi. Hita ta apåpasi håfa bidå-ta, låo esti na tåotåo tåya’ båba bidå-ña.” Dispues ilek-ña, “Jesus, hahassu yu’ yanggin måttu Håo gi Rainom-mu.”
Manoppi si Jesus, “Åmen, bai Hu asigura håo: på’gu na ha’åni u ta hita na dos giya Para’isu.”
I Ibangheliun i Saina.
