B
FINENI’NA NA TINAITAI Dn 7, 13-14
Un tinaitai ginin i Lepblun i Prufeta as Daniel
Mientras ki sisigi ha’ i manna’manman na lini’e’-hu gi pupuengi, manli’i’ yu’
Unu ni parehu yan i Lahin i Taotåo ni mamamaila’,
gi hilu’ i mapagåhis i langit;
Anai måttu Gui’ guatu gi Un Åmku’
ya maprisenta Gui’ gi me’nå-ña,
Ha risibi i mina’gas, gloria, yan para u fama’rai;
ya i nasion yan i taotåo siha, i difirentis na lingguåhi
u masetbi Gui’.
I mina’gås-ña para todu i tiempu
ni ti para u machule’guan,
i mina’gås-ña ti u madistrosa.
I finu’ i Saina.
INEPPIN I SÅTMU Ps 93, 1. 1-2. 5
R. I SAINA, GUIYA RAI; MINAGÅGAGU GUI’ NI MINA’GÅS-ÑA.
I Saina, Guiya Rai, ma’lak magagugu-ña;
minagågagu i Saina ya mabalulutan ni minetgut.
INEPPI…..
Ha na’fitmi fina’tinas-ña nu i tanu’,
ya ti para u mana’kalamtin.
Fitmi i tronu-mu desdi i antigu na tiempu;
gagaigi Håo desdi todu i manaihinekkuk na tiempu, Asaina.
INEPPI…..
Manangokkuyun i tinago’-mu siha magåhit;
i sinantus umatya yan i gimå’-mu,
Asaina, para todu i tiempu.
INEPPI……
SIGUNDU NA TINAITAI Rv 1, 5-8
Un tinaitai ginin i Lepblun Ribilasion
Si Jesukristo, i fiet na tistigu, i primirisa na Lahi-ña, ni mana’lå’la’ ginin i finatai ya Guiya lokkui’ Ha gubebetna i manrai i tanu’. Ha guaiya hit, ya ginin i Ha sakrifisiu na finatai-ña Ha na’fanlibri hit ginin i isåo-tayan Ha na’fanhuyung hit kumu rainun mamåli’ para ta setbi i Yi’os-ña yan Tatå-ña. Para si Jesukristo gloria yan minetgut para todu i tiempu! Åmen.
Atan ha’, mamamaila’ Gui’ gi mapagåhis! Todu siempri lumi’i’ Gui’, kuntodu atyu siha i lumånsa Gui’. Todu i taotåo gi tanu’ u fantristi put Guiya. Esti siempri masusedi!
“Guåhu i Fine’na yan i Uttimu,” ilek-ña i Saina, i Todu Ha Na’siña, i gagaigi, i hagas ha’ gagaigi, yan i para u fåttu.
I finu’ i Saina.
IBANGHELIU Jn 18, 33b-37
ÅLELUIA, åleluia Mk 11, 10
R. Åleluia. UMATUNA GUI’ NI MAMAMAILA’ GI NA’AN I SAINA!
U MATUNA I RAINUN I TATÅ-TA AS DAVID NI PARA U FÅTTU!
R. Åleluia, åleluia.
+ Un tinaitai ginin i såntu Ibangheliu sigun i tinigi’ San Juan
Finaisin si Jesus as Pilato, “Ada Hågu i Rai i ManHudihos?” Manoppi si Jesus, “Kåo un såsangan ennåo ginin hagu ha’ mismu na maisa, osino put i masanganem-mu put Guåhu?” Manoppi si Pilato, “Ti Hudihos yu’! I manachataotåo-mu yan i manmå’gas mamåli’ umintrega Håo mågi giya guåhu. Håfa bidå-mu?” Manoppi si Jesus: “I rainok-ku taigui guini gi tånu’. Yanggin gaigi i rainok-ku guini gi tanu’, siempri u fanmumu i taotåo-hu siha put para bai Hu mariskåta ya mungnga na bai Hu ma’intrega gi ManHudihos. Låo i rainok-ku taigui guini.” Put esti, ilek-ña si Pilato, “Pues intonsis na rai Håo?” Manoppi si Jesus, “Hågu sumångan na rai Yu’. I rason na mafañågu Yu’ guini gi tånu’, put para bai Hu tistigun i minagåhit. Ya maseha håyi ni ha kumetin maisa gui’ gi minagåhit ha huhunguk i bos-su.”
I Ibangheliun i Saina.
