FINE’NA NA TINAITAI Ez 34, 11-12. 15-17
Un tinaitai ginin i Lepblun i Prufeta as Ezekiel
Taiguini ilek-ña i Saina i Yi’us: Guåhu mismu bai Hu pulan yan bai asisti i ga’-hu kinilu. Taimanu ha’ i pastot ni ha asisisti i ga’-ña kinilu yanggin finakcha’i gui’ gi halum i chinalapun kinilu, taiguennåo ha’ para asistek-ku ni ga’-hu kinilu. Bai Hu akudi siha ginin todu i lugåt anai manggaigi siha na manmachalalapun anai nupblådu i ha’åni yan homhum. Guåhu mismu bai Hu påstu i ga’-hu kinilu; Guåhu mismu bai Hu na’fandiskånsa siha, ilek-ña i Saina i Yi’us. Bai Hu ispiha i manmalingu, bai Hu konni’ tåtti i manabak, bai Hu be’i i manchitnudan, bai Hu na’fanhomlu’ i manmalångu, låo i manyommuk yan i manmetgut bai Hu yamak, sa’ Guåhu i pastot ni chumocho’gui i dinanchi. Intonsis, ilek-ña i Saina i Yi’us, låo hamyu ni ga’-hu kinilu, Guåhu bai Hu husga hamyu ya bai na’fansahngi i manmåolik ginin i manailayi, i kinilu siha ginin i chiba.
I finu’ i Saina.
INEPPIN I SÅTMU Ps 23, 1-2. 2-3. 5-6
R. (1) I SAINA I PASTOT-TU, TÅYA’ U FÅTTA GIYA GUÅHU.
I Saina i pastot-tu; tåya’ u fåtta giya guåhu.
Ha påpastu yu’ gi betdi na paståhi.
INEPPI…..
Ha kokonni’ yu’ guatu gi fi’un i mannåna’i diskånsu na hånum;
Ha na’tata’lu tåtti i fuetsåk-ku.
Ha gigiha yu’ gi dinanchi na chålan
put i na’ån-ña.
INEPPI …..
Un plånta i lamasa gi me’nå-hu
gi me’nan i maninimigu-hu;
Un olius låña i ilu-hu;
ya i taså-hu esta machuchuda’.
INEPPI …..
I minaolik ha’ yan i mina’åsi’ tumattitiyi yu’
todu i lina’lå’-hu;
Ya bai hu såga gi gima’ i Saina
gi manmamamaila’ siha na såkkan.
INEPPI…..
SIGUNDU NA TINAITAI 1 Cor 15, 20-26. 28
Un tinaitai ginin i fine’na na Kattan San Pablo para i taotåo ‘Corinth’
Hafañe’lus:
Låo estigui’ i minagåhit na esta i Kristo mana’lå’la’ ginin i finatai, ya Guiya esti gumarantitiha na atyu siha i manmamaigu’ gi finatai u mana’fanlå’la’ lokkui’. Taimanu ha’ na måttu i finatai ginin un låhi, pues taiguennåo ha’ lokkui’ na u fåttu i lina’la’ ginin i finatai un låhi. Taimanu ha’ na todu i taotåo manmåtai put i mandañña’-ñiha yan si Adan, pues taiguennåo ha’ lokkui’ na todu u mana’fanlå’la’ ginin i finatai put i mandañña’-ñiha gi Kristo. Låo kada unu u mana’lå’la’ sigun gi tarihå-ña: i Kristo, fine’na; dispues, gi ha’ånin i finattoñ-ña, todu atyu siha i taotåo-ña. Dispues di ennåo u fåttu i uttimu; siempri i Kristo Ha gånna todu i esperituhåt na manmå’gas, åoturidåt, yan fuetsa, ya u intrega i Rainu guatu gi as Yu’us Tåta. Debidi u fanggubetna i Kristo asta ki Ha gånna si Yu’us todu i inimigu ya Ha po’lu siha gi papa’ i addeng-ña. I uttimu na inimigu ni para u magånna era i finatai. Låo yanggin esta manmapo’lu todu siha gi papa’ i ginibetnan i Kristo, pues Guiya mismu, era i Lahi-ña, u po’lu Gui’ gi papa’ Yu’us, ni Guiya pumo’lu todu siha gi papå’-ña; ya ennåo nai siempri u fanggubetna si Yu’us kabålis gi hilu’ todu.
I finu’ i Saina.
IBANGHELIU Mt 25, 31-46
ÅLELUIA Mk 11, 9,10
R. Åleluia. U MATUNA GUI’ NI MAMAMAILA’ GI NA’AN I SAINA!
U MATUNA I RAINUN I TATÅ-TA AS DAVID NI PARA U FÅTTU!
R. Åleluia.
Un tinaitai ginin i såntu Ibangheliu sigun gi tinigi’ San Mateo
Ilek-ña si Jesus ni mandisipulu-ña: “Yanggin måttu i Lahin i Taotåo kumu Rai, mañisiha yan todu i manånghit, siempri u fatå’chung gi tronun rai, ya i taotåo siha ginin todu i nasion u mana’fandañña’ gi me’nå-ña pues siempri Ha dibidi siha entri dos gurupu, taimanu ha’ i pastot yanggin ha na’sahngi i kinilu ginin i chiba: ya siempri Ha po’lu i kinilu gi agapa’-ña ya i chiba gi akagguen-ña. Dispues siempri i Rai Ha sangåni i taotåo siha gi agapa’-ña, ‘Fanmamaila’, sa’ mambinendisi hamyu as Tatå-hu! Maila’ ya en risibi i rainu ni mapripåra para hamyu desdi ki anai mafa’tinas i tanu’. Anai ñålang Yu’ en na’chotchu’ Yu’, må’hu Yu’ ya en na’gimin Yu’; istrangheru Yu’, ya en risibi Yu’ gi gima’-miyu, kisnuda Yu’ ya en na’minagågu Yu’; malångu Yu’ ya en asisti Yu’, mapresu Yu’ ya en bisita Yu’.’ Ya siempri i manunas u fanmanoppi: ‘Ngai’an, Asaina, nai in li’i’ Håo ñålang ya in na’chotchu Håo, pat må’hu ya in na’gimin Håo? Ngai’an nai in li’i’ Håo na istrangheru ya in kumbida Håo para i gima’-måmi, pat sino kisnuda ya in na’minagågu Håo? Ngai’an nai in li’i’ Håo malångu pat mapreresu, ya manmåttu ham in bisita Håo?’ Siempri manineppi siha ni Rai, ‘Åmen bai Hu sangåni hamyu na yanggin en che’gui esti para unu gi mås takpapa’ gi esti siha i mañe’lu-hu, en cheche’gui para Guåhu!’ “Dispues siempri Ha sangåni atyu siha i manggaigi gi akagguen-ña, ‘Ritira hamyu giya Guåhu, gaigi i matdision Yu’us giya hamyu! Fañigi guatu gi taihinekkuk na guåfi ni mapripåra para i aniti yan i mananghet-ña! Anai ñålang Yu’ ti en na’chotchu Yu’, må’hu Yu’ ya ti en na’gimin Yu’; istrangheru Yu’ ya ti en risibi Yu’, kisnuda Yu’ ya ti en na’minagågu Yu’; malångu Yu’ ya ti en asisti Yu’, mapresu Yu’ ya ti en bisita Yu’. Ya siempri siha u fanmanoppi, ‘Ngai’an, Asaina, nai in li’i’ Håo ñålang, pat sino må’hu pat istrangheru osino kisnuda pat malångu pat mapresu ya ti in asisti Håo?’ Siempri manineppi siha ni Rai, ‘Åmen, bai Hu sangåni hamyu, na yanggin ti en asisti unu gi mås takpapa’, Guåhu atyu i ti en asisti.’ Esti siha siempri u mana’fanhånåo para i taihinekkuk na kastigu, ya i manunas para i taihinekkuk na lina’la’.”
I Ibangheliun i Saina.
