FINENE’NA NA TINAITAI 2 Mc 7, 1-2. 9-14
Un tinaitai ginin i sigundu na Lepblun Maccabees
Masusedi na manma’aresta sietti na mañe’lu yan si nanan-ñiha ya mansinaolak siha ni rai ni kuåtta, para u faninafuetsa mañotchu kåtnin babui put i para u mayulang i lai Yu’us. Unu gi mañe’lu kumuentus para i pumalu siha, ya ilek-ña: “Håfa para un gånna ginin esti siha na kuestion? Manlistu ham manmåtai ki para in yilang i tinagu’ i mañainan-måmi.”
Anai esta para u måtai i mina’dos na che’lu ilek-ña: “Matdisidu håo na manganiti, ti para un na’gosa ham ni lina’la’ esti na tånu’, låo i Rai todu i tanu’ Guiya para u kåhat ham hulu’ ya para in fanlå’la’ ta’lu para todu i tiempu. Put in kikimpli i tinagu’ Yu’us na para in fanmåtai.”
Dispues di guiya, i mina’tres na che’lu mana’famadesi gui’ ginin i huegun-ñiha. Humula’ huyung insigidas anai matågu’ na u hula’, ya ti ma’å’ñao ha istira huyung i kannai-ña, mientras ha såsangan esti siha na mambunitun palåbras: “Ginin i langit nai hu risibi esti i hila’-hu yan i kannai-hu ya put i lai Yu’us bai hu po’lu na ti hu nisisita esti siha; sa’ hu angokku na si Yu’us u nå’i yu’ ta’lu ni esti siha.” Kuntodu i rai yan i umasisisti gui’ nina’fanmanman ni ti kinibåtdin esti na hobin tåotåo, sa’ ti ha po’lu put atdit i pinadesi-ña siha.
Dispues di måtai gui’, makastiga yan mamattråta i mina’kuåttru na che’lu parehu yan i pumalu. Anai kumekematai, ilek-ña, “Put minalago’-hu ha’ na para bai måtai gi kannai tåotåo låo gaigi gi as Yu’us i inangukkok-ku na para u na’lå’la’ yu’ ta’lu; låo tåya’ resureksion para hamyu.”
I finu’ i Saina.
INEPPIN I SÅTMU Ps 17, 1. 5-6. 8. 15
R. YANGGIN UMANNUK I GLORIÅ-MU, ASAINA,
SIEMPRI KABÅLIS I MINAGOF-FU.
Ékkunguk, Asaina, i tinayuyot-tu para u guaha hustisia;
atendi i inagång-hu;
Ékkunguk i tinayuyot-tu
ginin i labios-su ni ti dåkun.
INEPPI…..
Fitmi i pinikkåt-tu gi chalån-mu;
ti manlålaolåo i addeng-hu.
Hu ågang Håo;
ékkunguk yu’ O Yu’us.
Na’talakmagi i talanga-mu;
ékkunguk i tinayuyot-tu.
INEPPI…..
Prutehi yu’ taiguihi yanggin Un prutehi i matå-mu;
na’attuk yu’ gi ánining i pappam-mu.
Låo bai hu li’i’ Håo, sa’ tåya’ tailayi bidå-hu;
ya yanggin makmåmata yu’ bai hu kuntentu sumåga gi me’nå-mu.
INEPPI…..
SIGUNDU NA TINAITAI 2 Thes 2, 16 – 3, 5
Un tinaitai ginin i sigundu na Kattan San Pablo para i taotåo ‘Thessalonica’
Hafañe’lus:
Puedi i Saina-ta as Jesukristo mismu yan si Yu’us Tatå-ta, ni Ha guaiya hit yan gi mina’ase’-ña Ha nå’i hit ni ti mamaktus na minatatnga yan fitmi na inangokku, Guiya en fannina’i ånimu yan minetgut para en che’gui yan en sangan todu i tiempu i manmåolik.
Put lusuttimu, mañe’lu-hu, fanmanåyuyut para hami kosa ki u sigi ha’ måmta’ chaddik i minsåhin i Saina, ya u marisibi gi onru, taiguihi iya hamyu. Fanmanåyuyut lokkui’ ya u riskåta ham si Yu’us ginin i manailayi yan mambåba na tåotåo; sa’ ti todu humonggi i minsåhi.
Låo i Saina fiet Gui’, ya Guiya u na’fanmetgut hamyu yan u na’fansåfu hamyu ginin Atyu i Tailayi. Ya i Saina u nå’i ham kumfiånsa giya hamyu, ya mansiguru ham na en cheche’gui yan para en kutinuha chumo’gui håfa hu sangåni hamyu. Puedi i Saina u dikta hamyu guatu gi mås tåddung na kinimprendi put i ginifli’i’ Yu’us yan i minesngun ni måfattu ginin i Kristo.
I finu’ i Saina.
IBANGHELIU Lk 20, 27-38
ÅLELUIA (Rv l, 5a, 6b)
R. Åleluia. SI JESUKRISTO, I MAFAÑÅGU FINE’NA GININ I FINATAI;
PARA GUIYA GLORIA YAN MINETGUT PARA TODU I TIEMPU.
R. Åleluia.
+ Un tinaitai ginin i såntu Ibangheliu sigun i tinigi’ San Lucas
Unus kuåntu Sadducees atyu i umå’aluk na tåya’ resureksion, manmalak mo’na para u ma faisin si Jesus ni esti na kuestion: “Ma’estru, manågu’ si Moises na debidi u ássagua i taotåo yan i asaguan i che’lu-ña yanggin måtai i che’lu-ña ya tåya patgun-ñiha ya u famoksai tinatti para i che’lu-ña. Intonsis guaha sietti na mañe’lu. I fine’na umássagua ya måtai sin påtgun. Dispues i sigundu na che’lu umássagua yan i bi’uda, dispues i mina’tres, yan taiguennåo påpa’. Todu i sietti manmåtai sin u fanggái famagu’un. Put lusuttimu måtai i bi’uda mismu. Yanggin manlå’la’ ta’lu i manmåtai håyi gái asagua gui’. Hahassu na todu i sietti umasagua gui’.” Mansinangåni siha as Jesus, “I famagu’un på’gu na tiempu mana’ássagua ya mana’fana’gun ássagua, låo åhi’ ti atyu siha i manmakunsidera na mamiresi manmanå’i sagan-ñiha gi mamamaila’ na tiempu yan i resureksion ginin i manmåtai. Siempri manmama’ånghit siha ya ti u fanmåtai. Siha i famagu’un Yu’us sa’ manlå’la’ ginin i finatai. Ha na’annuk si Moises na mana’fanlåla’la’ ta’lu i manmåtai gi tinigi’ put i trongkun dikiki’ anai ha ågang i Saina i Yi’us Abrahan, yan i Yi’us Isaac, yan i Yi’us Jacob. Ti Yi’us i manmåtai si Yu’us, låo Yu’us i manlåla’la’. Todu manlåla’la’ para Guiya.”
I Ibangheliun i Saina.
