FINE’NA NA TINAITAI Wis 11, 22-12, 2
Un tinaitai ginin i Lepblun Tinemtum
Gi me’nan i Saina, kalang un pongpung potbus interu i tanu’ ni muna’å’atlibis i pesadot patsino kalang i chi’up i chatangmak ni tumutunuk gi tanu’. Låo Hågu gai ma’asi’ nu hami, sa’ todu Un na’siña; ya Un bibira i matå-mu ginin i isao tåotåo kosaki siña manmañotsut. Sa’ Un guaiya todu siha i nina’huyung ya tåya’ Un chatli’i’ gi fina’tinås-mu; sa’ ti Un fa’tinas atyu siha i ti ya-mu. Ya håfa taimanu para u gagaigi ha’ una kosa, solu malagu’ Håo; patsino u mama’uk ha’ solu Hågu dumititmina? Låo Un na’fanlilibri todu i kosas siha sa’ iyom-mu, O Asaina, Hågu ni mangguaiya ånti, sa’ gagaigi i ti lalamas na espiritu-mu gi todu i kosas siha! Put ennao na adumididi’ Un lalåtdi i manlalachi, Un aminåsa siha, ya Un na’fanmanhassu siha ni isao ni machocho’gui, kosaki u ma’abandona i linachin-ñiha ya u fanmanhonggi giya Hågu, O Asaina!
I finu’ i Saina.
INEPPIN I SÅTMU Ps l45, l-2. 8-9. l0-11. l3-l4
R.(l) BAI HU TUNA I NA’ÅN-MU TODU I TIEMPU, RAI-HU YAN YU’OS-SU.
Bai hu na’takkilu’ Håo, Yu’os-su yan rai-hu,
bai hu tuna i na’ån-mu todu i tiempu.
Bai hu bendisi Håo kada diha,
bai hu tuna i na’ån-mu todu i tiempu.
INEPPI…..
I Saina kariñosu yan yo’asi’,
ñating lalålu’ yan misin ginefli’i’.
Måolik i Saina para todu
Ha ma’asisi’i todu i fina’tinås-ña.
INEPPI…..
Todu i fina’tinås-mu Un manå’i gråsia, O Asaina
ya Un ma bendisi ni mamfiet nu Hågu.
Sedi siha ya u masånganñaihun i glorian i rainom-mu
ya u masångan i minetgot-mu.
INEPPI…..
Fiet i Saina gi todu siha i fino’-ña
yan fiet gi todu siha i che’cho’-ña.
I Saina Ha supopotta todu atyu siha i mamopoddung
yan Ha na’fanatatchu todu atyu siha i manetekkun.
INEPPI…..
SIGUNDU NA TINAITAI 2 Thes 1, 11-2, 2
Un tinaitai ginin i sigundu na Kattan San Pablo para i taotåo Thessalonica
Hafañe’lus:
Put ennåo na todu i tiempu in tayuyuyuti hamyu. In gagagåo i Yi’os-ta para u na’fandiknu hamyu ni lina’la’ ni maninagang guatu. Puedi u kumpli ginin i fuetsån-ña todu atyu siha i disehun-miyu para minaolik yan u na’funhåyan i che’chu’-miyu gi hinenggi. Gi taiguini na i na’an i Saina-ta as Jesus siempri Ha risibi i tinina ginin hamyu, yan hamyu ginin Guiya, ginin i gråsian i Yi’os-ta yan i Saina as Jesukristo.
Put i finattun i Saina-ta as Jesukristo yan i mana’fandaña’-ta para ta fanhita yan Guiya: Hu gågagåo hamyu, hafañe’lus, para cha’-miyu nina’faningkibukåkåo hinassun-miyu osino para u nina’fambåba sinientin-miyu put atyu i masåsangan na esta måttu i Saina. Buenti hinassun-ñiha na hami sumångan esti anai manmama’tinas ham prufesiha pat anai mañetmun ham, osino hami tumugi’ gi kåtta.
I finu’ i Saina.
IBANGHELIU Lk 19, 1-10
ÅLELUIA (Jn 3, 16)
R. Åleluia. HA SEN GUAIYA SI YU’US I TANU’,
ENNAO MINA’ HA NÅ’I HIT NU I UNIKU NA LAHI-ÑA,
KOSAKI TODU ATYU SIHA I MANMANHONGGI NU
GUIYA U FANGGAILINA’LA’ PARA TODU I TIEMPU.
R. Åleluia.
+ Un tinaitai ginin i såntu Ibangheliu sigun i tinigi’ San Lucas
Humålum si Jesus giya Jericho sa’ para u isgin ennao na lugåt. Iståba guennåo i ma’gas i taotåo kuntribusion, ni na’ån-ña si Zacchaeus, ya riku gui’ na tåotåo. Ha kekeli’i’ håyi si Jesus, låo dikiki’ gui’ na tåotåo ya ti siña ha li’i’ sa’ i tropan tåotåo. Pues malågu mo’na gi me’nan i linahyan tåotåo ya kumahulu’ gi trongkun figus para u li’i’ si Jesus, ni para u faloffan guennåo. Anai måttu si Jesus guennåo na lugåt tumalakhilu’ ya ilek-ña as Zacchaeus, “Chaddik påpa’, Zacchaeus, sa’ debidi bai Hu såga gi gimå’-mu på’gu.” Tumunuk insigidas si Zacchaeus ya maguguf ha konni’ si Jesus hålum gi gimå’-ña. Todu i taotåo siha ni lumi’i’ esti ma tutuhun manggonggung, “Esti na tåotåo humålum mambisita gi gima’ un i’isao!” Tumohgi hulu’ si Zacchaeus ya ilek-ña ni Saina, “Siñot, ékkunguk yu’! Bai hu nå’i lamitå gi guinaha-hu para i mamopbli; ya yanggin guaha hu digiruyi bai hu apåsi gui’ tåtti kuåttru buettas.” Ilek-ña si Jesus nu guiya, “På’gu na ha’åni måttu i satbasion guini na guma’; guiya esti na tåotåo lokkui’ disindensian Abrahan. I Lahin i Taotåo måttu para u ispiha yan para u såtba i manmalingu.”
I Ibangheliun i Saina.
