A
FINENI’NA NA TINAITAI Mal 1, 14b-2. 2b. 8-10
Un tinaitai ginin i Lepblun i Prufeta as Malachi
Må’gas Yu’ na Rai, ilek-ña i Sainan i ehetsitu siha,
ya i na’ån-hu siempri mama’a’ñågui gi entalu’ i nasion siha.
Intonsis, mamåli’, esti na månda para hamyu:
Yanggin ti en pe’lu gi kurason-miyu,
na para en na’i i na’ån-hu ni gloria, ilek-ña i Sainan i
ehetsitu siha,
Bai na’hanågui hamyu un matdision
ya i bendision-miyu bai Hu tulaika para matdision.
En bira hamyu ginin i dinanchi na chålan,
ya en eppuk meggai para u fanlachi ginin i finanå’guin-miyu;
En yilang i kuntråtan Levi,
ilek-ña i Sainan i ehetsitu siha.
Intonsis, Guåhu bai Hu na’fanmachatli’i
yan bai Hu na’fanakpapa’ hamyu gi me’nan todu i taotåo siha,
Sa’ put i ti en kimpli i finana’guek-ku siha,
ya en na’annuk na guaha en fabobot gi disision-miyu.
Ada ti todus hit unu ha’ Tatå-ta?
Ada ti un Yu’us ha’ fuma’tinas hit?
Pues sa’ put håfa na ta yulang i inangukkot-ta unu kada unu,
ya ta yulang i kuntråtan i tatå-ta siha?
I finu’ i Saina.
INEPPIN I SÅTMU Ps 131, 1. 2. 3
R. GIYA HÅGU, ASAINA, NAI HU SODDA’ I PÅS-HU.
O Asaina, ti banidosu i kurason-hu,
ni ti subetbiu i matå-hu;
Ti hu e’ega’ga’ atyu siha i mandångkulu na kosas,
atyu siha na kosas i manmapput para guåhu.
INEPPI….
Inlugåt, kuntentu i anti-hu,
mamatkikilu ha’ kalang i magunus na påtgun.
Kalang i magunus na påtgun ni sinasaddi as nanå-ña,
taiguennåo i anti-hu gi sanhalom-hu.
INEPPI…..
Israhet, fanangokku gi Saina,
på’gu yan todu i tiempu.
INEPPI…..
SIGUNDU NA TINAITAI 1 Thes 2, 7b-9. 13
Un tinaitai ginin i fine’na na Kattan San Pablo para i taotåo ‘Thessalonica’
Hafañe’lus:
Mampasensia ham anai manhihita, kalang i nana ni ha adadahi i famagu’on-ña.
Put i ginefli’i’-måmi nu hamyu na manlistu ham para ta fanhita gi Maolik na Nutisia ni ginin as Yu’us yan gi lina’la’-måmi mismu. Kiridun-måmi hamyu! Siguru na en hahassu ha’, håfañe’lus, na duru ham manmacho’chu’! Manmachocho’chu’ ham ha’åni yan puengi putno in atburota hamyu mientras in setmumuni hamyu ni Maolik na Nutisia ginin as Yu’us.
Yan put esti na rason na todu i tiempu in nana’i gråsia si Yu’us. Anai in chili’i hamyu ni minsåhin Yu’us, åhi’ ti en hinguk yan en aksepta kumu minsahin tåotåo låo kumu minsåhi ginin as Yu’us, ya hunggan magåhit ginin as Yu’us. Si Yu’us machocho’chu’ giya hamyu ni manmanhonggi.
I finu’ i Saina.
IBANGHELIU Mt 23, 1-12
ÅLELUIA
R. Åleluia. UNU HA’ TATAN-MIYU, I TATAN-MIYU GI LANGIT;
UNU HA’ MA’ESTRUN-MIYU: I ASAINA AS JESUKRISTO!
R. Åleluia.
+ Un tinaitai ginin i såntu Ibangheliu sigun gi tinigi’ San Mateo
Ha sangåni si Jesus i linahyan tåotåo yan i mandisipulu-ña: “I manma’estrun i Lai yan i MamFarisehu matahgui si Moises kumu manma’estru; put esti, na che’gui yan dalalaki todu i mantinagu’ hamyu. Låo cha’-miyu dalalalaki ihemplun-ñiha. Ti mapraktitika håfa setmun-ñiñiha.
Manmagoddi manmakkat na kåtgu siha, ni makkat ma’uma, para u fanmapo’lu gi apågan ottru tåotåo siha, låo ti u mana’kalamtin un kålulut para u fanmanayuda. Todu i bidan-ñiñiha manmachochu’gui para u fanmali’i’. Atan ha’ i bandera gi ilun-ñiha yan gi agapa’ na kannai-ñiha anai manggaigi i tinigi’ ginin i eskritura sa’ mansen dangkulu! Atan lokkui’ sa’ mansen anakku’ i petlas gi magagun-ñiha. Gof yan-ñiha i onråo na tå’chung gi giput yan i yamo’nana na siya gi sinagoga, gof yan-ñiha manmasaluda kun rispetu gi pupbliku yan para u fanma’ågang ‘Rabbi’. Låo hamyu, cha’-miyu fanma’å’agang ‘Rabbi’. Unu ha’ gi entalu’-miyu Ma’estru, sobri todu hamyu mañe’lu. Cha’-miyu a’agang ni håyi guini gi tanu’ ‘Tatan-miyu’. Unu ha’ Tatan-miyu, Guiya ni gaigi gi langit. Cha’-miyu fanma’å’agang ‘Ma’estru’. Unu ha’ Ma’estrun-miyu, i Misihas. I mås takkilu’ gi entalu’-miyu debidi u setbi i pumalu. Maseha håyi ni muna’takkilu’ maisa gui’ u mana’takpapa’, låo maseha håyi ni muna’takpapa’ maisa gui’ u mana’takkilu’.
I Ibangheliun i Saina.
