FINENE’NA NA TINAITAI Jer 31. 7-9
Un tinaitai ginin i Lepblun i Prufeta as Jeremiah
Taiguini ilek-ña i Saina:
Fanessalåo put minaguf para si Jacob,
saluda i ma’gas i nasion siha;
pruklåma i tininan-miyu ya en sangan:
Esta Ha na’fanlibri i Saina i taotåo-ña,
i mañopbla giya Israhet.
Atan ha’, sa’ bai Hu konni’ siha tåtti
ginin i sangkattan na tånu’;
Bai Hu rikohi siha ginin todu i puntan tånu’,
kuntodu i mambåchit yan i mange’yåo,
I mannåna yan i manmapotgi’ siha;
u fana’lu tåtti kalang un dångkulu na tropa.
Mangåkati anai manhånåo,
låo Guåhu bai kunsuela yan bai giha siha;
Bai Hu konni’ siha guatu gi be’bu’ hånum,
gi yånu na chålan, kosa ki tåya’ u matompu’.
Sa’ tåta Yu’ para si Israhet, si Efraim i primirisa.
I finu’ i Saina.
INEPPIN I SÅTMU Ps 126, 1-2. 2-3. 4-5. 6
R. MANDÅNGKULU SIHA FINA’TINÅS-ÑA I SAINA PARA HITA.
YA MAMBULA HIT MINAGUF.
Anai ha konni’ tåtti i Saina atyu siha i manmapreresu giya Sion,
kulang hit atyu siha na tåotåo ni manmangguiguifi.
Atyu nai bula chålik gi pachot-ta,
yan mangånta minaguf i hila’-ta.
INEPPI…..
Pues masångan gi entri i nasion siha,
“Mandångkulu siha fina’tinås-ña i Saina para siha.”
Mandangkulu siha fina’tinås-ña i Saina para hita.
Mansen maguf hit magåhit!
INEPPI…..
Na’ta’lu tåtti i suettin-måmi, Asaina,
kalang i anglu’ na fondun sadduk giya ‘Negeb’.
Atyu siha i manmanånanum gi trinisti
u fanessalåo minaguf yanggin manmango’ku’.
INEPPI…..
Maskiseha mangåkati mientras manhåhanao mo’na,
makikilili i kestat simiya,
U fana’lu tåtti mane’essalåo minaguf,
ma’u’uma i manohun kusetcha.
INEPPI…..
SIGUNDU NA TINAITAI Heb 5, 1-6
Un tinaitai ginin i Katta para i ManHibrehu
Hafañe’lus:
Kada takkilu’ na påli’ ma’a’atyik entri i mangga’chong-ña yan ma’apupunta para u setbi si Yu’us put siha, para u ufresi i sakrifisiu siha yan inifresi put i isao. Ya put i guiya mismu ñaba’ gui’ gi meggai na puntu, pues siempri pasensia gui’ para i maniknurånti yan i manlalachi. Ya put i guiya mismu ñaba’ gui’, debidi u fanufresi sakrifisiu åhi’ ti put i ottru tåotåo ha’ siha sino ki put i isåo-ña lokkui’. Tåya’ ni unu uma’atyik para guiya mismu i onrun i takkilu’ na påli’. Si Yu’us ha’ na maisa siña umågang i taotåo para u takkilu’ na påli’–taimanu ha’ anai ma’ågang si Aaron. Gi etmismu manera, ti Guiya i Kristo numå’in maisa Gui’ ni onrun i takkilu’ na påli’. Inlugåt ilek-ña si Yu’us nu Guiya, “Hågu Lahi-hu Håo; på’gu na ha’åni nai Guåhu Tatå-mu.” Ha sångan lokkui’ gi ottru bånda, “Hågu siempri påli’ Håo para todu i tiempu, gi pinali’ sigun gi otdin Melchizedek.”
I finu’ i Saina.
IBANGHELIU Mk 10, 46-52
ÅLELUIA
R. Åleluia. I NANA’LIBRET-TA AS JESUKRISTO ESTA HA FUNAS I FINATAI,
YA HA NÅ’I HIT LINA’LA’ GININ I IBANGHELIU.
R. Åleluia.
+ Un tinaitai ginin i såntu Ibangheliu sigun i tinigi’ San Marcos
Anai kokokuyung si Jesus yan i mandisipulu-ña yan un linahyan tåotåo ginin ‘Jericho’, iståba guihi si Bartimaeus (lahin Timeo) un båtchit ni matåta’chung ya ume’egagåo gi kantun chålan. Anai ha hunguk na si Jesus tåotåo Nasaret esti, ha tutuhun umågang, “Jesus, Lahin David, gai ma’asi’ nu guåhu!” Meggai na tåotåo lumalåtdi gui’ put i para u famatkilu, låo mås a’gang essalåo-ña, “Lahin David, gai ma’asi’ nu guåhu!” Pumåra si Jesus ya ilek-ña, “Ågang gui’ mågi.” Mientras ma’å’agang guåtu i batchit, masangåni gui’, “Cha’-mu gagai ma’a’ñao nu Guiya! Kahulu’ sa’ ina’agang håo!” Ha yuti’ñaihun i magagu-ña, ya manggaloppi hulu’ ya malak guatu gi as Jesus. Finaisin gui’ as Jesus, “Håfa malago’-mu bai Hu cho’gui nu hågu?” Manoppi i batchit, “Rabboni, malagu’ yu’ manli’i’.” Sinangåni as Jesus, “Sigi gi hinanåo-mu! I hininggem-mu muna’homlu’ håo.” Insigidas sumiña gui’ manli’i’ ya ha tattiyi si Jesus hulu’ gi chalan.
I Ibangheliun i Saina.
