FINENE’NA NA TINAITAI Sir 35, 12-14. 16-18
Un tinaitai ginin i Lepblun Sirach
I Saina Guiya i Yi’us hustisia,
tåya’ håyi kiridu-ña.
Maseha ti mampus Ha fabobot i manainina’siña,
låo Ha e’ekkunguk i inagang i manmamadedesi.
Ti tangnga Gui’ para i katin i manaisaina,
pat para i bi’uda yanggin ha sångan huyung i piniti-ña.
Atyu i sumesetbi si Yu’us ginin i minalago’-ña ha’ u ma’ekkunguk;
i ginagåo-ña måfattu gi langit.
I tinayuyut i manakpápa’ ha duduluk i mapagåhis;
ti dumiskåkansa asta ki måttu gi chiña,
Ti u bira gui’ asta ki manoppi i Mås Takkilu’,
tunas yanggin manhusga yan Ha apruerueba i dinanchi.
I finu’ i Saina.
INEPPIN I SÅTMU Ps 34, 2-3. 17-18. 19. 23
R. I SAINA HA HUHUNGUK I KATIN I MAMOPBLI.
Bai hu tuna i Saina todu i tiempu;
i matunå-ña u gagaigi todu i tiempu gi pachot-tu.
Sotta ya u maguf i anti-hu gi Saina;
bai hu mahunguk ni manakpapa’ na tåotåo siha ya u fanmaguf.
INEPPI…..
I Saina Ha chata’atan i manailayi,
ya ti Ha na’fanmahahassu siha guini gi tanu’.
I Saina Ha e’ekkunguk i inagang i manunas na tåotåo,
ya Ha akukudi siha ginin todu i achåkin-ñiha.
INEPPI…..
Hihut i Saina para atyu siha i mampininiti kurason-ñiha;
Ha såsatba atyu siha i manmafigis espiritun-ñiha.
I Saina Ha na’fanlilibri i lina’la’ i tentago’-ña;
tåya’ siña umisao yanggin lumilihing gi as Yu’us.
INEPPI…..
SIGUNDU NA TINAITAI 2 Tm 4, 6-8. 16-18
Un tinaitai ginin i sigundu na Kattan San Pablo para si Timoteo
Ginefli’e’-hu:
På’gu put guåhu, måttu esta i ora para bai hu masakrifika; måttu esta i ora anai para bai hu dingu esti na tånu’. Hu cho’gui kuåntu i nina’siñå-hu gi atchikak, esta hu falaguyi kabålis i distånsia, ya hu gogo’ti ha’ i hinenggi. Ya på’gu ha nanangga yu’ i premiu-hu ni manå’i yu’ put i tinas na lina’la’, atyu na premiu ni i Saina, Guiya ni tunas na Hues, para u nå’i yu’ guihi na Ha’åni–ya ti para guåhu ha’, låo kuntodu atyu siha i manmannanangga kun guinaiya ni umanok-ña.
Tåya’ iståba gi fi’on-hu anai hu difendi yu’ gi fine’na na biåhi; todu umabandona yu’. Puedi ti u faninachåka siha as Yu’us! Låo sumåga giya guåhu i Saina ya Ha nå’i yu’ minetgut, ya ennåo na sumiña hu pruklåma kabålis i minsåhi para u mahunguk ni todu i MamPagånu; masåtba yu’ ya ti masintensia yu’ para bai hu måtai. Ya i Saina, Guiya u såtba yu’ ginin todu i tinailayi ya u konni’ yu’ sin disgråsia guatu gi linangitan na Rainon-ña. Para Guiya i gloria para todu i tiempu! Åmen.
I finu’ i Saina.
IBANGHELIU Lk 18, 9-14
ÅLELUIA (2 Cor 5, 19)
R. Åleluia. ISTÅBA SI YU’US GI KRISTO, PARA U
NA’A’FA’MAOLIK I TANU’ YAN GUIYA;
YA HA NA’FANENKATGÅO HIT NU I MAOLIK NA
NUTISIAN INA’FA’MAOLIK. R. Åleluia.
+ Un tinaitai ginin i såntu Ibangheliu sigun i tinigi’ San Lucas
Kumuentus si Jesus ni esti na fina’akumparasion ya Ha sangåni atyu siha i pumo’lun mamaisa siha na manunas ya manmachatlili’i’ i ottru tåotåo siha: “Dos na tåotåo humånåo hulu’ para i templu para u fanåyuyut; i unu era Farisehu, ya i ottru tåotåo kuntribusion. I Farisehu ti ha na’tekkun påpa’ i ilu-ña ya taiguini tinayuyot-ña, ‘Hu nåna’i Håo gråsia, O Yu’us, sa’ ti parehu yu’
yan i pumalu siha na tåotåo ni manhasupak, mamfafa’baba, manadutteriu—pat taiguini i taotåo kuntribusion. Umayuyunat yu’ dos biåhi gi simåna. Manapåpasi yu’ dies put sientu gi todu i guinaha-hu.’ Låo i ottru tåotåo sumåga ha’ gi chagu’, ya ti ha atotga ni sikera para u na’talak hilu’ i matå-ña gi langit. Hokkuk ha’ bidå-ña ha påmpan i ha’of-ña ya ilek-ña, ‘O Yu’us, gai ma’asi’ nu guåhu, ni i’isao.’ Henggi Yu’, na esti na tåotåo humånåo guatu gi gimå’-ña umamigu yan si Yu’us låo i ottru åhi’. Sa’ maseha håyi ni muna’takkilu’ maisa gui’ u mana’takpapa’ ya håyi muna’takpapa’ maisa gui’ u mana’takkilu’.”
I Ibangheliun i Saina.
