XXVIII DAMENGGU GI UTDINÅRIU NA TIEMPU

182 0

B

FINENI’NA NA TINAITAI                                                                           Wis 7, 7-11 

Un tinaitai ginin i Lepblun Tinemtum 

       Manåyuyut  yu’, ya manå’i yu’ tiningu’ para bai hu fangumprendi; 

Manggågåo yu’, ya måttu i espiritun Tinemtum giya guåhu.  Mås ya-hu

esti ki pudet yan tronun rai, Ya kalang manaibali i rikesa yanggin

manma’akumpåra yan esti, ni ti hu akumpåra esti yan i mangguaguan na

alåhas; Sa’ gi me’nan esti, todu i oru kalang dididi’ na unai, ya i salåppi’ gi

me’nan esti kalang fachi’.  Mås ya-hu esti ki hinemlu’ yan buninitu.

Hu atyik esti mås ki i inina, sa’ i mina’lakña tåya’ nai maigu’.  Låo todu

klåsin minaolik mancháfattu giya guåhu yan esti, ya manggaigi todu klåsin

rikesa gi kannai-ña.

I finu’ i Saina.

INEPPIN I SÅTMU                                                               Ps 90, 12-13. 14-15. 16-17 

R.   NA’FAMBULA HAM NI GUINAIYAM-MU, O ASAINA,

            YA IN FANGÅNTA GI MINAGUF. 

Fa’nå’gui ham tumufung dinanchi i ha’anin-måmi,

            kosa ki siña manomtum kurason-måmi. 

Na’pasensia Håo, O Asaina! Kuåntu dihas tetehnan?

Gai ma’asi’ nu i tentago’-mu siha!  

INEPPI…..

Na’fambula ham ni yine’ase’-mu yanggin manana,

            kosa ki siña manmaguf ham mangånta todu i ha’ånin-måmi.

Na’fanmaguf ham put atyu siha na ha’åni anai Un kastiga ham,

            put atyu siha na såkkan anai in padesi tinailayi.

INEPPI…..

Na’li’i’ i tentago’-mu ni bidå-mu siha

            yan i famagu’un-ñiha ni gloriå-mu;

Puedi u iyun-måmi i kariñosu na inadahin i Saina i Yi’us-måmi;

            Na’misin i che’chu’ i kannai-måmi!

            Na’misin i che’chu’ i kannai-måmi! 

INEPPI…..

SIGUNDU NA TINAITAI                                                                             Heb 4, 12-13 

Un tinaitai ginin i Katta para i ManHibrehu

Hafañe’lus: 

     I finu’ Yu’us låla’la’ yan aktibu, mås malåktus ki i sapbli ni dopbli tatagå’-ña. Ha duduluk asta i yahålulum, anai uma’asudda’ i anti yan i espiritu, yan anai dumadañña’ i kuyintura yan i titanus to’lang.  Ha huhusga todu i disehu yan i hinassu gi kurason tåotåo. Tåya’ ni håfa siña manå’na’ ginin as Yu’us; interu i fina’tinas atbettu ya tåya’ mabababa gi me’nan i matå-ña. Ya giya Guiya nai debidi ta fanmannå’i kuenta.

I finu’ i Saina. 

IBANGHELIU                                                                                   Mk 10, 17-30 

ÅLELUIA    

R.  Åleluia.    MANDICHOSU I MAMOPBLIN ESPIRITU: 

                            U IYUN-ÑIHA I RAINUN I LANGIT.

                                                                                                            R.  Åleluia. 

+  Un tinaitai ginin i såntu Ibangheliu sigun i tinigi’ San Marcos

       Mientras kokokuyung si Jesus sa’ para u hånåo malålagu guatu giya Guiya un tåotåo, ya dumimu påpa’ gi me’nå-ña ya ilek-ña, “Måolik na Ma’estru, håfa debidi bai hu cho’gui para bai hu risibi i taihinekkuk na lina’la’?”  Manoppi si Jesus, “Håfa na un ågang Yu’ måolik?  Tåya’ måolik na si Yu’us ha’. Un tungu’ ha’ i tinagu’ siha: Cha’-mu famumunu’; cha’-mu umadutteteriu; cha’-mu fañåñakki; cha’-mu fansiknanani ni mandagi; cha’-mu fama’bababa tåotåo; onra si tatå-mu yan nanå-mu.”  Manoppi i taotåo, “Ma’estru, hu kumpli todu esti siha desdi i hiniben-hu.” Pues inatan gui’ as Jesus kun guinaiya ya ilek-ña nu guiya, “Guaha tetehnan debidi un cho’gui. Hånåo ya un bendi i guinaha-mu ya un nå’i i mamopbli; ya un gai guinaha gi langit. Dispues di ennåo, fåttu ya un dalalaki Yu’.”  Dispues di Ha sångan esti siha nina’tristi matå-ña.  Må’pus gui’ tritristi, sa’ meggai guinaha-ña.
       Manatan si Jesus ya ilek-ña ni mandisipulu-ña, “Ai na minapput i riku na tåotåo humålum gi Rainun Yu’us!”  Nina’fansen manman i mandisipulu ni esti na fino’-ña.  Pues Ha ripiti si Jesus håfa ilek-ña, “Famagu’on-hu, ai na minapput humålum gi Rainun Yu’us!  Guse’ña humålum i kameyu gi madduk håguha ki un riku para u hålum gi Rainun Yu’us.”  Nina’fanmås manman ni esti, pues manasangani, “Intonsis håyi siña masåtba?”  Ha na’chettun i inatan-ña si Jesus giya siha ya ilek-ña, “Para i taotåo hunggan impusipbli, låo para si Yu’us, åhi’; todu pusipbli para si Yu’us.”  Pues si Pedro ha atotga sumangåni Gui’, “In dingu todu i guinahan-måmi ya in dalalaki Håo!”  Manoppi si Jesus, “Åmen, bai Hu asigura hamyu, tåya’ ni dumingu i gimå’-ña, mañe’lu-ña, nanå-ña pat tatå-ña, famagu’on-ña pat prupiedåt-ña put Guåhu yan i ibangheliu ya ti u risibi guini na tiempu sien buettas mås na guma’, che’lu siha, nåna, famagu’un yan prupiedåt–ya fuera di esti para un ma petsigi–ya gi mamamaila’ na tiempu un manå’i taihinekkuk na lina’la’.

I Ibangheliun i Saina.

Related Post

MANA’KAHULU’ SÅNTA MARIA GI LANGIT

Posted by - August 16, 2019 0
FINENE’NA NA TINAITAI                                                              Rv 11:19a; 12:1-6a.10ab  Un tinaitai ginin i Lepblun Ribilasion  Mababa i templun Yu’us gi langit, ya…

HA’ÅNIN MANMÅTAI

Posted by - October 30, 2020 0
Un tinaitai ginin i Lepblun Tinemtum                                        Wis 3, 1-9 I antin i manunas manggaigi gi kannai Yu’us,          ya tåya’…

TULOS SÅNTUS

Posted by - October 31, 2019 0
FINE’NA NA TINAITAI                                                                Rv 7, 2-4. 9-14  Un tinaitai ginin i Lepblun Rebelasion       Guåhu, si Juan, hu li’i’ kokokolu’…

DAMENGGU DISPUES DI PENTEKOSTES SANTISIMA TRINIDAD

Posted by - June 10, 2022 0
FINENE’NA NA TINAITAI                                                                          Prv 8, 22-31 Un tinaitai ginin i Lepblun Sinangan siha  Taiguini ilek-ña i Tinemtum Yu’us:  “I…

XXVI DAMENGGU GI UTDINÅRIU NA TIEMPU

Posted by - September 28, 2019 0
FINE’NA NA TINAITAI                                                                                         Am 6, 1a. 4-7  Un tinaitai ginin i Lepblun i Prufeta as Amos Estigui’ ilek-ña…