FINE’NA NA TINAITAI Is 25, 6-10a
Un tinaitai ginin i Lepblun i Prufeta as Isaias
Guini na sabåna i Sainan i ehetsitu siha
para u na’guaha para todu i taotåo
un guput ni mansustånsia na nengkannu’ yan måolik na binu,
månngi’, sustånsia na nengkannu’ yan i mås gåsgas yan
måolik na binu.
Guini na sabåna nai para u yulang
i litun puminiti ni tumåtampi i taotåo siha,
yan i balutan ni tumåtampi todu i nasion siha;
Guiya para u yulang i finatai para todu i tiempu.
I Saina as Yu’us para u såosåo
todu i lagu’ siha ginin todu i mata;
para u na’suha i disgråsian i taotåo-ña siha
ginin interu i tanu’; sa’ kumuentus esta i Saina.
Guennåo na ha’åni siempri u masångan:
“Atan ha’ i Yi’os-ta, Guiya ta ispipiha para u na’fansåfu’ hit!
Guiya esti i Saina ni ta a’atan;
maila’ ya ta fanmaguf sa’ ha na’fanlibri hit!”
Sa’ para u såga i kannai i Saina guini na sabåna.
I finu’ i Saina.
INEPPIN I SÅTMU Ps 23, 1-3a, 3b-4, 5, 6
R. SIEMPRI BAI HU SÅGA GI GIMA’ I SAINA TODU I HA’ÅNIN I LINA’LÅ’-HU.
I Saina i pastot-tu; tåya’ u fåtta giya guåhu.
Ha påpastu yu’ gi betdi na paståhi;
Ha kokonni’ yu’ guatu gi fi’un i mannåna’i diskånsu na hånum;
Ha na’tata’lu tåtti i fuetsåk-ku.
INEPPI…..
Ha gigiha yu’ gi dinanchi na chålan
put i na’ån-ña.
Achukka’ mamomokat yu’ gi hemhum na kañåda,
tåya’ tailayi ma’añåo-hu; sa’ gaigi Håo gi fi’on-hu
Un gogo’ti i galuti-mu yan i baston-mu
ni numåna’i yu’ ånimu.
INEPPI…..
Un plånta i lamasa gi me’nå-hu
gi me’nan i maninimigu-hu;
Un olius låña i ilu-hu;
ya i taså-hu esta machuchuda’.
INEPPI…..
I minaolik ha’ yan mina’åsi’ tumattitiyi yu’
todu i lina’lå’-hu;
Ya bai hu såga gi gima’ i Saina
gi manmamamaila’ siha na såkkan.
INEPPI…..
SIGUNDU NA TINAITAI Phil 4, 12-14, 19-20
Un tinaitai ginin i Kattan San Pablo para i taotåo ‘Philippi’
Hafañe’lus:
Hu chagi chinatsaga yan hu chagi ginefsaga. Esta hu kumprendi esti na sikretu, put ennåo na maseha månu, pat maseha ngai’an, kuntentu yu’, måseha ñålang pat håspuk yu’, maseha bula pat dididi’ ha’ guinaha-hu. Sufisienti yu’ minetgut ni Ha nå’i yu’ i fuetsan i Kristo para bai hu sungun todu klåsin kundision.
Sin imbåtgu, mansen måolik hamyu nu guåhu durånti anai guaha atburutu-hu.
I Yi’os-su en fannina’i ginin i Kristo Jesus ni todu i en nisisita ginin i riniku-ña.
Gloria para todu i tiempu para i Yi’os-ta yan Tatå-ta! Åmen.
I finu’ i Saina.
IBANGHELIU Mt 22, 1-14
ÅLELUIA cf. Eph 1:17-18
R. Åleluia, åleluia. I TATAN I SAINA-TA AS JESUKRISTO U INA I
MATAN I KURASON-TA, KOSA KI SIÑA TA LI’I’ TAIMANU TINAKKILO’ÑA ATYU NA KLÅSIN NINANGGA NI MANMA’Å’AGANG HIT GUATU.
R. Åleluia, åleluia.
+ Un tinaitai ginin i såntu Ibangheliu sigun gi tinigi’ San Mateo
Ha tutuhun ta’lu si Jesus kumuentusi i manmå’gas mamåli’ yan i manåmku’ i taotåo siha,
Ha u’usa fina’akumparasion,
“I Rainun i langit siña ma’akumpåra yan un rai ni ha fandangguyi i lahi-ña. Ha na’fanhånåo i tentago’-ña para u fanma’ågang atyu siha i manmakumbida para i fandånggu låo ti manmalagu’ manmåttu. Numa’hanåo ta’lu ottru tentågu’ siha ya ilik-ñiha, ‘Sangåni atyu siha i manmakumbida na esta mampriparåo todu i nengkannu’! Manmapunu’ esta i tureti yan i mana’fañotchu mai’is na guaka; todu esta priparåo. Fanmamaila’ para i fandånggu.’ Guaha siha ti umekkunguk i imbetasion ya manhånåo gi hinanao-ñiha, unu para i lanchon-ña, i ottru para i bisnes-ña, i pumalu siha mamantieni i tentågu’, manma’insutta, yan manmapunu’. Nina’sen bubu i rai ya ha na’fanhånåo i sindalu-ña siha para u fanmapunu’ atyu siha i manmamunu’ yan para u masonggi i sengsung-ñiha. Dispues ilek-ña ni tentago’-ña: ‘I fandånggu esta priparåo, låo atyu siha i manmakumbida ti mandiknu manmåttu. Put esti na debidi en fanhuyung gi katsåda siha yan en kumbida para i fandånggu todu i asudda’-miyu.’ Intonsis, manhånåo i tentågu’ para i katsåda siha ya manmakonni’ todu i asudda’-ñiha, parehu ha’ manmåolik pat mambåba ya ginin ennnåo na bumula taotåo-ña i giput. Låo anai humålum i rai para u li’i’ i kumbiti, ha li’i’ un tåotåo ni ti minagågagu magagun guput. Ilek-ña nu guiya, ‘Amigu, taimanu fattom-mu mågi guini ni ti asentådu magagu-mu?’ Tåya’ inippen-ña i taotåo. Pues ilek-ña i rai ni tentago’-ña siha, ‘Geddi i kannai-ña yan i addeng-ña ya yiti’ gui’ huyung gi halum homhum para u kasao yan u na’chichik i nifen-ña.’ “Meggai manmakumbida, låo dididi’ ha’ manma’atyik.”
I Ibangheliun i Saina.
