FINENE’NA NA TINAITAI 2 Kgs 5, 14-17
Un tinaitai ginin i sigundu na Lepblun i Manrai
Humånåo påpa’ si Naaman gi Sadduk Hotdån ya ha supuk gui’ sietti biåhi sa’ put i sinangåni gui’ as Elisha, i taotåo Yu’us. I sinsen-ña mama’sensin un dikiki’ na påtgun, ya mana’gåsgas gui’ ginin i chetnut nasarinu.
Ha bira gui’ tåtti yan i mangga’chochong-ña para i taotåo Yu’us. Anai måttu, tumohgi gi me’nan Elisha ya ilek-ña, “På’gu nai hu tungu’ na tåya’ Yu’us guini gi tanu’ fuera di guini giya Israhet. Put fabot chuli’ esti i rigålun i tentago’-mu.”
Manoppi si Elisha, “Mientras ha’ låla’la’ i Saina ni hu sesetbi, ti bai hu chuli’ esti,” ya achukka’ sigi ha’ inafuetsa gui’ as Naaman, ti malagu’ ha aksepta. Ilek-ña si Naaman: “Yanggin ti malagu’ håo un aksepta esti, pues put fabot nå’i esti i sitbintem-mu dos kareta na odda’, sa’ ti bai hu fanufresi ta’lu masosonggi na inifresi para ottru yu’us fuera di i Saina.”
I finu’ i Saina.
INEPPIN I SÅTMU Ps 98, 1. 2-3. 3-4
R. (2) I SAINA HA NA’MATUNGU’ GI NASION SIHA I SASATBA NA
NINA’SIÑÅ-ÑA.
Kantåyi i Saina un nuebu na kånta,
sa’ esta Ha cho’gui manna’manman na fina’tinas;
I agapa’ na kannai-ña yan i santus na koddu-ña
muna’fangganna gui’,
INEPPI…..
I Saina Ha na’matungu’ na manggånna Gui’;
gi me’nan i nasion siha ha na’matungu’ i sasatba na fuetsån-ña.
Esta Ha hassu na fiet i guinaiyan-ña
para i gima’ Israhet.
INEPPI….
Todu i puntan tånu’ esta mali’i’
i satbasion ginin i Yi’os-ta.
Fangånta kun minaguf para i Saina, todu i tanu’;
kantåyi tinina yan essalåo minaguf.
INEPPI…..
SIGUNDU NA TINAITAI 2 Tm 2, 8-13
Un tinaitai ginin i sigundu na Kattan San Pablo para si Timoteo
Ginifli’e’-hu:
Hassu si Jesukristo, ni mana’lå’la’, Guiya disendentin David, atyu i manmafanå’gui hit gi Maolik na Nutisia ni hu setmunñaihun. Put i hu setmunñaihun i Maolik na Nutisia na mamadesi yu’ yan makadena yu’ kalang kriminåt. Låo ti makadena i finu’ Yu’us, pues hu sungun todu put atyu siha i maninatyik Yu’us na tåotåo, kosa ki siha lokkui’ siña ma risibi i satbasion ni måfattu ginin i Kristo Jesus ni mañuñuli’ taihinekkuk na gloria. Magåhit esti na sinangan:
“Yanggin manmåtai hit yan Guiya,
siempri lokkui’ manlåla’la’ hit yan Guiya.
Yanggin sigi ha’ di ta sungun,
siempri lokkui’ manmanggubetna hit yan Guiya.
Yanggin ta ñiega Gui’
siempri Ha ñiega hit lokkui’.
Yanggin ti mamfiet hit,
Guiya fiefiet ha’ siempri,
sa’ ti siña Ha dagin maisa Gui’.”
I finu’ i Saina.
IBANGHELIU Lk 17, 11-19
ÅLELUIA (1 Thes 5, 18)
R. Åleluia. FANNÅ’I GRÅSIA GI TODU MANERA,
SA’ ESTI MALAGO’-ÑA SI YU’US GIYA HÅGU GI DUMAÑA’-MU YAN I KRISTO JESUS.
R. Åleluia
+ Un tinaitai ginin i såntu Ibangheliu sigun i tinigi’ San Lucas
Gi hinanåo-ña guåtu giya Hirusalen Ha upus si Jesus i linderun Samaria yan Galileha. Anai kåkakalum gi sengsung umasudda’ yan dies na nasarinu. Mañåga gi chagu’ ya manessalåo ilik-ñiñiha, “Jesus, Ma’estru, gai ma’asi’ nu hami!” Anai manlini’i’ siha manoppi, “Fanhånåo ya en fa’nu’i i mamåli’ nu hamyu.” Anai mangguaguaguatu guihi mana’fanhomlu’. Unu gi entri siha, anai ha li’i’ na mana’homlu’ gui’, humånåo tåtti ya a’gang bos-ña ha tutuna si Yu’us, ha fotyung gui’ ya umoppup påpa’ gi adding Jesus ya ha tuna Gui’. Esti na tåotåo, Samaritånu gui’.
Ha aprubetcha si Jesus esti na ukasion ya ilek-ña, “Na ada ti todu i dies mana’fanhomlu’? Manmånggi i ottru nuebi? Kåo tåya’ para u bira gui’ tåtti para u nå’i gråsia si Yu’us fuera di esti i istrangheru?” Ilek-ña nu i taotåo, “Tohgi hulu’ ya un sigi gi hinanåo-mu; i hininggem-mu sumåtba håo.”
I Ibangheliun i Saina.
