B
FINENI’NA NA TINAITAI Gn 2, 18-24
Un tinaitai ginin i Lepblun Genesis
Ilek-ña si Yu’us i Saina: “Ti måolik na u guiguiya ha’ na maisa i lahi. Bai Hu fa’tinåsi gui’ ga’chong-ña ni afakcha’-ña.” Intonsis si Yu’us i Saina Ha fa’tinas ginin i tanu’ todu klåsi ni manmachålik na gå’ga’, yan paluma gi airi, ya Ha konni’ esti siha guatu giya guiya para u li’i’ håfa para u fanfina’na’an; maseha håfa ni ha fa’na’an siha pues ennåo para na’an-ñiha. I lahi ha nå’i na’an-ñiha todu i guaka, i paluman i airi, yan i manmachålik na gå’ga’; låo tåya’ umafakcha’ para ga’chong-ña.
Pues si Yu’us i Saina Ha na’maigu’ maffung i lahi, ya anai mamaigu’, Ha laknus unu gi kustiyås-ña ya Ha tåmpi ni sensin anai iståba i kustiyas. Intonsis, si Yu’us i Saina Ha fotma i palåo’an ginin i kustiyas ni Ha chuli’ ginin i lahi. Anai Ha konni’ i palåo’an guatu gi lahi, ilek-ña i lahi: “Putfin, i te’lang ginin i te’lång-hu, i sensin ginin i sinsen-hu; guiya esti u ma’ågang palåo’an’, sa’ ginin i lahi na mafa’tinas gui’.” Put esti na rason na i lahi para u dingu si tatå-ña yan nanå-ña ya u dañña’ yan i asaguå-ña, ya u fama’un tåtaotåo i dos.
I finu’ i Saina.
INEPPIN I SÅTMU Ps 128, 1-2. 3. 4-5. 6
R. PUEDI I SAINA U BENDISI TODU I HA’ÅNI SIHA GI LINA’LÅ’-TA.
Manmaguf atyu siha i umo’osgi i Saina,
i chumocho’gui i tinagu’ Yu’us.
Sa’ siempri un kånnu’ i kusetchan i fina’chu’cho’-mu;
maguf håo ya un gefsaga:
INEPPI…..
Kalang meppa’ na råmas ubas
i asaguå-mu palåo’an gi halum i gimå’-mu,
i famagu’on-mu kalang tinanum ubas
gi uriyan i lamasa-mu.
INEPPI…..
Atan ha’, sa’ taiguini u fanmabendisi
i lalåhi ni manma’ånåo ni Saina.
Puedi i Saina un binendisi ginin Sion:
todu i ha’ånin i lina’lå’-mu
kosa ki un såonåo gi minaguf Hirusalen.
INEPPI…..
Ya un lå’la’ para un li’i’ i famagu’un i famagu’on-mu.
Pås para Israhet!
INEPPI…..
SIGUNDU NA TINAITAI Heb 2, 9-11
Un tinaitai ginin i Katta para i ManHibrehu
Hafañe’lus;
Låo ta lili’i’ si Jesus, Guiya ni mana’takpapa’ña un råtu ki i manånghit, kosa ki ginin i gråsian Yu’us u måtai put todu. Ta lili’i’ Gui’ på’gu makurorona ni gloria yan onru put i finatai ni Ha padesi. Dinanchi bidå-ña si Yu’us sa’ ginin i pinadesin Jesus na Ha na’suha ginin Guiya todu i ti mamprifektu, sa’ put i Guiya si Yu’us muna’fanhuyung yan sumusteteni i kosas siha, put i para u na’fañåonåo meggai na famagu’on-ña gi gloria. Si Jesus gumigiha siha guatu gi satbasion. Ha na’fanggåsgas si Jesus i taotåo siha ginin i isao-ñiha, ennåo mina’ Guiya yan atyu siha i mana’fanggåsgas parehu Tatan-ñiha. Put ennåo na ti mamåhlåo si Jesus para u ågang siha mañe’lu-ña.
I finu’ i Saina.
IBANGHELIU Mk 10, 2-16
ÅLELUIA
R. Åleluia. YANGGIN MANAGUAIYA HIT,
SIEMPRI SUMÅGA SI YU’US GIYA HITA YAN I
KABÅLIS NA GUINAIYA.
R. Åleluia.
+ Un tinaitai ginin i såntu Ibangheliu sigun i tinigi’ San Marcos
Unus kuåntus MamFarisehu siha manmåttu guatu ya put i para u machagi Gui’, mafaisin si Jesus kåo mapitmiti i lahi para u dibutsia i asaguå-ña. Manoppi ya ilek-ña, “Håfa mantinagu’ hamyu as Moises?” Ilik-ñiha, “Si Moises ha pitmiti i dibutsiu yan i matuge’-ña i diklårasion i dibutsiu.” Mansinangåni siha as Jesus, “Ha tugi’ ennåo na tinagu’ si Moises put i manataktak-miyu. Gi tutuhun anai mana’fanhuyung todu i kosas siha si Yu’us Ha fa’tinas låhi yan palåo’an; ya put esti na rason i lahi para u dingu si tatå-ña yan nanå-ña ya u fama’unu ha’ i dos. Esta ti dodos siha sinoki unu ha’ na sensin. Put esti na cha’-ña, maseha håyi, sumipåpa’ra håfa nina’dañña’ Yu’us.” Anai manmåttu siha tåtti gi gima’, matutuhun ta’lu i mandisipulu makuestiona Gui’ put esti. Mansinangåni siha, “Maseha håyi na låhi ni ha dibutsia i asaguå-ña ya umassagua ta’lu yan ottru umisåo adutteriu gui’ kontra i asaguå-ña ya i palåo’an lokkui’ ni ha dibutsia i asaguå-ña ya umassagua yan ottru umisåo adutteriu gui’.”
I taotåo siha makunni’i Gui’ ni mandikiki’ na famagu’un-ñiha para u fampinatcha, ya manlinalåtdi siha ni mandisipulu put esti. Anai Ha ripåra si Jesus esti nina’lalålu’ ya ilek-ña nu siha, “Sotta i famagu’un ya u fanmåttu giya Guåhu ya cha’-miyu chechema’ siha. Estigui’ siha iyun-ñiha i Rainun Yu’us. Åmen, bai Hu sangåni hamyu ni minagåhit, maseha håyi ni ti ha aksepta i rainun Yu’us taiguihi i patgun ti u hålum gi Rainu.” Dispues Ha toktuk yan Ha bendisi siha, ya mampinatcha ilun-ñiha.
I Ibangheliun i Saina
