FINE’NA NA TINAITAI Is 5, 1-7
Un tinaitai ginin i Lepblun i Prufeta as Isaias
Sedi yu’ på’gu ya bai hu kånta put i amigu-hu,
i kantan i amigu-hu put i gualo’-ña ubas.
Gai gualu’ ubas i amigu-hu
un måolik na tånu’ gi kantun i eksu’;
Ha guadduk i edda’, ya ha rikohi i atchu’,
ya ha tåtmi i mås måolik na ubas;
Manhåtsa tori para mamulan,
ya mangguadduk para mamugu’ ubas.
Dispues ha nangga na u guaha kusetchan ubas,
låo i tinekchå’-ña manma’aksum na ubas.
Intonsis, hamyu ni taotåo Hirusalen yan lalåhin Hudah,
hamyu para en hisga yu’ osino i gualu’ ubas;
Håfa mås debidi bai hu cho’gui para i gualo’-hu ubas
ya ti hu cho’gui?
Sa’ put håfa na anai manispiha yu’ kusetchan ubas,
manokcha’ manma’aksum na ubas?
På’gu bai na’tungu’ håo
håfa para bai hu cho’gui ni gualo’-hu ubas;
Bai na’suha i kellat, bai pastuyi,
bai hu yulang i kellat ni prumutetehi, ya u magatcha’!
Hunggan, bai hu yamak:
ti u malåbbun yan ti u mana’manñaña’ eddå’-ña,
bai hu sotta ya u china’guåni ni tituka’ siha;
Bai hu otdin i mapagåhis
para cha’-ña u’uchan gi hilo’-ña.
I gualo’-ña ubas i Sainan i ihetsitu era i gima’ Israhet,
ya i lalåhin Hudah siha i Ha guaiya na tinanom-ña;
Ha nanangga na para u macho’gui i maolik, låo håga’ Ha li’i’!
Ha nanangga na u macho’gui i tinas,
låo i nina’lamin-ñiha mane’essalåo para u guaha hustisia.
I finu’ i Saina.
INEPPIN I SÅTMU Ps 80, 9. 12. 13-14. 15-16. 19-20
R. (Is 5, 7) I GUALO’-ÑA UBAS I SAINA, ERA I GIMA’ ISRAHET.
Un transplånta un sinisu ginin Ihipto;
Un dulalak i nasion siha ya Un tåtmi gui’.
Manråmas huyung asta i tasi,
i sinisu-ña asta i sadduk.
INEPPI…..
Håfa na Un yamak påpa’ i kellåt-ña siha,
ya håyi ha’ maloffan måmfi’ fruta?
Magatcha’ todu ni babuin halum tånu’,
yan kinannu’ ni manmachålik na gå’ga’.
INEPPI…..
Bira Håo ta’lu, Asainan i ehetsitu siha;
talakpapa’ ginin i langit ya Un li’i’;
atendi esti na tinanum,
yan prutehi håfa tinanom-ña i agapa’-mu,
i lahin i taotåo ni Hågu mismu muna’metgut.
INEPPI…..
Pues ennåo na ni nungka ta’lu nai in fañuha ginin Hagu;
nå’i ham nuebu na lina’la’, ya bai in agang i na’ån-mu.
O Asaina, Yu’us i ehetsitu siha, na’fana’lu ham tåtti;
fanatan påpa’ ginin i langit ya Un såtba ham.
INEPPI…..
SIGUNDU NA TINAITAI Phil 4, 6-9
Un tinaitai ginin i Kattan San Pablo para i taotåo ‘Philippi’
Hafane’lus:
Cha’-miyu fanchachat hinassu ni put håfa, låo gi todu i tinayuyut-miyu gågåo si Yu’us ni nisisidat-miyu, todu i tiempu fanmanggågåo ginin i kurason-miyu ni bula agradesimentu.
Ya i pås Yu’us, ni takkilo’ña ki i kinemprendin tåotåo, u inadahi i kurason yan i hinassun-miyu ya cha’-ñiha fana’adispatta yan i Kristo Jesus.
Put lusuttimu, mañe’lu-hu, na’fambula hinassun-miyu ni atyu siha i manmåolik yan mantunåyun: atyu siha na kosas ni manmagåhit yan manakkilu’, manunas yan manggåsgas, mambunitu yan manhonoråpbli. Praktika håfa en tingu’ yan en risibi ginin guahu, ginin i fino’-hu yan ginin i aksion-hu. Ya si Yu’us ni numåna’i hit pås u gaigi giya hamyu.
I finu’ i Saina.
IBANGHELIU Mt 21, 33-43
ÅLELUIA Jn 15, 16
R. Åleluia. ILEK-ÑA I SAINA, GUÅHU UMATYIK HAMYU GININ I TANU’,
PARA EN FANHÅNÅO YA EN FANGGAI PRUBETCHU.
R. Åleluia.
+ Un tinaitai ginin i såntu Ibangheliu sigun gi tinigi’ San Mateo
Ilek-ña i Saina ni manmå’gas mamåli’ yan i manåmku’ i taotåo siha:
“Fanekkunguk ottru na fina’akumparasion. Guaha un tåotåo ni gai tanu’ ni ha tåtmi ubas ya ha kollat ni mandikiki’ na trongku, mama’tinas chalan hånum, ya ha håtsa un tori. Dispues ha na’ma’atkila ni lancheru siha ya humånåo gui’ bumiåhi. Anai måttu i tiempun kusetcha, ha otdin i tentågu’ siha para u marikohi i patten-ña ubas ginin atyu siha i manmanatkikila. Låo manma’aresta i tentågu’ ni atyu siha i manmanatkikila. Ma’anña i unu, mapunu’ i ottru ya i mina’tres ma’åtchu’. Intonsis, numa’hanåo ta’lu mås meggai na tentågu’ på’gu na biåhi, låo parehu ha’ manmatråtan-ñiha. Putlus uttimu, ha na’hånåo i lahi-ña mismu sa’ ha båtga gui’ na, ‘Siempri marispeta i lahi-hu.’ Anai mali’i’ i lahi-ña, ilik-ñiha atyu i manmanatkikila entri siha, ‘Guiya esti i para u irensia todu nu esti siha. Maila’ ya ta punu’ ya siempri hita rumisibi i irensia.’ Intonsis, magu’ut gui’, ya mabåtsala gui’ huyung gi hiyung i fanggualu’an ubas, ya mapunu’ gui’.
“Håfa hinassun-miyu para u cho’gui i dueñu ni esti siha i manmanatkikila yanggin måttu gui’ tåtti?” Manmanoppi ya ilik-ñiha, “Siempri ha na’fanlåmin ennåo siha na taotågui ya u nama’atkila i gualo’-ña ubas ni ottru tåotåo siha ni siña mana’siguru na u manå’i gui’ ubas gi tiempun kusetcha.” Ilek-ña si Jesus nu siha, “Kåo tåya’ nai en taitai gi iskritura:
‘I atchu’ ni marichåsa ni manmanhåhatsa guma’
ennåo humuyung prinsipåt na åtchu’ gi gima’.
I Saina chumo’gui esti, ya sen bunitu ma’atan.’
Put esti na rason na bai Hu sangåni hamyu, na en fanma’åmut ni Rainun Yu’us ya u fanmanå’i atyu siha na tåotåo ni siña muna’guaha pruduktu.”
I Ibangheliun i Saina.
