FINE’NA NA TINAITAI Hb 1, 2-3; 2, 2-4
Un tinaitai ginin i Lepblun i Prufeta as Habakkuk
Kuåntu tiempu, O Asaina? Hu ågang para Un ayuda yu’
låo ti Un e’ekkunguk yu’!
Umågang yu’ giya Hågu, “Piligru!”
låo ti Un ayuda yu’.
Håfa na Un sedi na para bai hu li’i’ esti siha na distrosu;
sa’ håfa na debidi bai hu atan esti siha na pinadesi?
Manggaigi gi me’nå-hu i anyulang yan i piligru;
manmumumu yan manå’åguaguat gi todu i bånda.
Pues i Saina Ha oppi yu’ ya ilek-ña:
Tugi’ påpa’ i lini’e’-mu
Na’klåru gi hilu’ i tapblerun åtchu’,
kosaki siña libiånu mataitai.
Sa’ i lini’e’-mu trabiha ti para u masusedi,
låo ti apmam siempri u makumpli i sinangån-hu siha;
Yanggin ñating finatton-ña pues nangga ha’,
siguru na siempri u fåttu, ti u atrasåo.
I tailayi na tåotåo siempri u måtai;
låo i tinas, siempri u lå’la’, sa’ put i hinenggen-ña.
I finu’ i Saina.
INEPPIN I SÅTMU Ps 95, 1-2. 6-7. 8-9
R. YANGGIN EN HINGUK I BOS-ÑA PÅ’GU NA HA’ÅNI,
CHA’-MIYU MUNA’FANMAHEHETUK I KURASON-MIYU.
Fanmamaila’, nihi ya ta fanmaguf kumantåyi i Saina;
nihi ya ta onra i atchu’ i satbasion-ta.
Maila’ ya ta taggam Gui’ ni kantan minaguf;
nihi ya ta fanmaguf mangånta såtmu para Guiya.
INEPPI…..
Fanhålum ya ta fanmañaluda yan ta fanmanadora;
maila’ ya ta fandimu gi me’nan i Saina ni fuma’tinas hit.
Sa’ Guiya i Yi’os-ta,
ya hita i taotåo-ña ni Ha påpastu, i inetnun ni Ha gigiha.
INEPPI….
Ai, ya på’gu na ha’åni nai en hinguk i bos-ña:
“Cha’-miyu muna’fanmahehettuk i kurason-miyu taiguihi
anai maniståba hamyu giya Meribah,
taiguihi i tiempun Massah gi disiettu,
Guihi anai matenta yu’ ni mañainan-miyu;
machagi yu’ achukka’ esta mali’i’ i che’cho’-hu siha.”
INEPPI…..
SIGUNDU NA TINAITAI 2 Tm 1, 6-8. 13-14
Un tinaitai ginin i sigundu na Kattan San Pablo para si Timoteo
Ginifli’e’-hu:
Put esti na rason na hu na’hahassu håo para un na’låla’la’ ha’ todu i tiempu i rigålu ni nina’i håo as Yu’us anai hu po’lu i kannai-hu gi hilo’-mu. Åhi’, ti Ha na’fangubåtdi hit i Espiritu ni Ha nå’i hit si Yu’us; inlugåt, Ha na’fanmetgut hit i Espiritu-ña, yan Ha na’fambula hit ginefli’i’, yan Ha nå’i hit nina’siña para ta suhetan maisa hit. Intonsis, cha’mu mamåmahlåo tumistigu para i Saina; yan cha’mu lokkui’ mamåmahlåo nu guåhu, guåhu ni mapreresu put i Kristo. Inlugåt, kåtga i pattem-mu pinadesi put i Maolik na Nutisia, sa’ ninana’i håo as Yu’us minetgut put esti.
Go’ti fitmi atyu i magåhit na palåbra siha ni hu fa’nå’gui håo, kumu un ihemplu ni para un dalalaki, ya un gagaigi ha’ gi hinenggi yan gi ginefli’i’ ni iyot-ta ni mandadañña’ yan i Kristo Jesus. Ginin i nina’siñan i Espiritu Såntu, ni gagaigi giya hita, go’ti i manmåolik siha ni ma’engkåtga håo.
I finu’ i Saina.
IBANGHELIU Lk 17, 5-10
ÅLELUIA (1 Pt 1, 25)
R. Åleluia. I FINU’ I SAINA U TACHU PARA TODU I TIEMPU;
GUIYA ESTI I FINIHU’ NI MANMANÅ’I HAMYU,
I MAOLIK NA NUTISIA. R. Åleluia.
+ Un tinaitai ginin i såntu Ibangheliu sigun i tinigi’ San Lucas
Ilik-ñiha i manapostulis nu i Saina, “Na’lameggai i hinenggin-måmi,” ya manoppi Gui’, “Yanggin chamuddung i hinenggin-miyu yan i pipitas muståsa, siña en sangåni esti na trongkun figus, ‘Bo’uk håo ya un transplånta håo gi halum tåsi.’ ya siempri inesgi håo.
“Yanggin unu giya hamyu gai tentågu’ ni manalåladu pat sino ha konni’ i kinilu para i påstu ya måttu tåtti ginin i gualu’, kåo para un sangåni gui’, ‘Maila’ ya un fatå’chung guini gi lamasa?’ Pat sino siempri un åluk, ‘Fa’tinåsi yu’ nu i senå-hu. Tinapis ya un setbi yu’ mientras chumochotchu yan gumigimin yu’. Ya dispues nai hågu un chotchu yan un gimin?’ Kåo u nina’maguf gui’ ni atyu na muchåchu i matago’-ña ha’ ha chochu’gui? Parehu ha’ yan esti lokkui’ hamyu nu i ume’ékkunguk yu’. Yanggin munhåyan en che’gui todu i manmatågu’-miyu para en che’gui, taiguini en sangan, ‘Manai bali ham na tentågu’. Tåya’ mås in che’gui ki i ubligasion-måmi.’ “
I Ibangheliun i Saina.
