FINE’NA NA TINAITAI Am 6, 1a. 4-7
Un tinaitai ginin i Lepblun i Prufeta as Amos
Estigui’ ilek-ña i Sainan i Ehetsitu siha:
Matdision para i manggagu’ giya Sion!
Manå’assun gi hilu’ kåtrin måtfit,
ma’istitira siha kun trangkilidåt gi siyan-ñiha,
mañochotchu kinilu ginin i paståhi,
yan tatneru ginin i kellat!
Matattitiyi i dandan ginin i hatpa,
kalang si David, ni siha ha’ fuma’titinas i son-ñiha.
Manggigimin binu gi táson
ya mapalalala’i siha ni mås måolik na låña;
ya ti maninefekta anai dumimålas si Jose!
Pues på’gu, siha u fanfine’na manmadistilådu,
ya u påra i burukan i disunestu na che’chu’-ñiha.
I finu’ i Saina.
INEPPIN I SÅTMU Ps 146, 7. 8-9. 9-10
R. ANTI-HU, TUNA I SAINA!
Dichosu atyu i tåya’ nai malingu hininggen-ña,
Ha nåna’i hustisia i manmapetsisigi,
yan nengkannu’ para i manñålang.
I Saina Ha sosotta i manmapreresu.
INEPPI…..
I Saina muna’fanmanlili’i’ i mambåtchit.
i Saina Ha håhatsa hulu’ atyu siha i manetekkun påpa’;.
I Saina Ha guaiya i manunas;
i Saina Ha prutetehi i manistrangheru.
INEPPI…..
Ha susteteni i manai saina yan i mambi’uda,
låo Ha kokontra i kinalamtin i manailayi.
I Saina u fanggubetna para todu i tiempu,
i Yi’os-mu, Sion, para todu i hinerasion! Åleluia!
INEPPI…..
SIGUNDU NA TINAITAI 1 Tm 6, 11-16
Un tinaitai ginin i fine’na na Kattan San Pablo para si Timoteo
Låo hågu, tåotåo Yu’us håo, suhåyi esti siha. Ispiha i tininas, i yini’usan, i hinenggi, i ginefli’i’, i minesngun, yan i kinariñosu. Achikak kuåntu i siña gi kareran i hinenggi, ya un gånna i taihinekkuk na lina’la’ para hågu mismu; sa’ si Yu’us umågang håo para esti na lina’la’ anai un prufesa fitmi i hininggem-mu gi me’nan i lahyan ni mantistigu. Gi me’nan Yu’us, ni Ha nåna’i lina’la’ todu i kosas siha, yan gi me’nan i Kristo Jesus, ni Ha prufesa i hininggen-ña fitmi gi me’nan Ponsio Pilåto, hu tåtagu’ hamyu på’gu para en esgi i manmatågu’-miyu yan para en famfiet kumumpli asta atyu na Ha’åni anai para u annuk i Saina-ta as Jesukristo. I umannokña siempri måttu gi inapuntan Yu’us na tiempu, i matuna yan i uniku ni Manmåmanda, i Rai i manrai siha yan i Sainan i mañaina siha. Guiya ha’ solu i ti mámatai; Guiya låla’la’ gi inina ni tåya’ siña fumattoigui. Tåya’ ni unu esta lumi’i’ Gui’; ni tåya’ siña lumi’i’ Gui’. Para Guiya u ma’onra yan taihinekkuk na fuetsa! Åmen.
I finu’ i Saina.
IBANGHELIU Lk 16, 19-31
ÅLELUIA (2 Cor 8, 9)
R. Åleluia. RIKU SI JESUKRISTO LÅO MAMA’POPBLI,
PUT I PARA EN FANRIKU GININ I PINIPBLEN-ÑA.
R. Åleluia.
+ Un tinaitai ginin i såntu Ibangheliu sigun i tinigi’ San Lucas
Ilek-ña si Jesus ni MamFarisehu:
“Ginin guaha un tåotåo minagågagu ni mås mangguaguan na magågu yan gefsaga lina’lå’-ña kada diha. Iståba lokkui’ un popbli, na’ån-ña si Låsaru, ni såtna, ni makokonni’ para i pettan i riku na tåotåo, ha nanangga na u guaha poddung nengkannu’ ginin i lamasan i riku kosaki siña chumotchu gui’. Manmåfattu tengnga i ga’lågu ya mahohoflak i chetnot-ña. Måtai i pepbli na tåotåo ya makonni’ ni manånghit guatu gi fi’un Abrahan, durånti i giput i langit. Måtai lokkui’ i riku na tåotåo ya mahåfut. Dångkulu pinadesisi-ña giya sasalåguan; ya anai tumalakhilu’ ha li’i’ chågugu’ si Abrahan sumisiha yan si Låsaru gi fi’on-ña. Pues umågang i riku hulu’, ‘Abrahan, tatå-hu, gai ma’asi’ nu guåhu. Na’hånåo si Låsaru ya u totchi i kalulot-ña gi hanum ya u na’fresku i hila’-hu, sa’ dångkulu pinadesisi-hu guini gi halum guåfi.’ Låo ilek-ña si Abrahan, ‘Hassu, ihu, anai låla’la’ håo manå’i håo meggai siha manmåolik na kosas, ya si Låsaru manå’i ni mambåba siha. Låo ha gogosa gui’ på’gu guini mientras mamadedesi håo. Fuera di esti, guaha un tåddung na kantit gaigi gi entalo’-ta, kosaki atyu siha i manmalagu’ manhånåo guatu giya hamyu ti u fansiña, yan lokkui’ ni håyi siña måttu ginin ennåo.’ Ilek-ña i riku na tåotåo, ‘Pues intonsis, tåta, put fabot na’hånåo si Låsaru para i gima’ tatå-hu sa’ manggaigi guihi singku na mañe’lu-hu lalåhi; ya u faninakunseha kosaki mungnga manmåttu guini na sagan pinadesi.’ Ilek-ña si Abrahan, ‘Gaigi ha’ si Moises yan i mamprufeta para u faninakunseha i mañe’lu-mu po’lu ya siha uma’ékkunguk.’ Manoppi i riku, ‘Ti nahung ni ennåo, Abrahan, tatå-hu! Låo yanggin guaha lumå’la’ ta’lu ginin i finatai ya u famfinattoigui, siempri u mabira siha ginin i isao-ñiha.’ Låo ilek-ña si Abrahan nu guiya, ‘Yanggin ti ma ékkunguk si Moises yan i mamprufeta, ti u fanmalagu’ manmanhonggi achukka’ u guaha lumå’la’ ta’lu ginin i finatai.’ ” I Ibangheliun i Saina.
