FINENE’NA NA TINAITAI Wis 2:12, 17-20
Un tinaitai ginin i Lepblun Tinemtum
Ilik-ñiha i manailayi:
Maila’ ya ta istrupeha i tinas na tåotåo, sa’ Ha na’fambububu hit;
Ha kokontra i bidåda-ta siha,
Ha lalålatdi hit put i ta kokontra i tinagu’ ya
ilekña na ti ta dalalalaki i manmapuksai-ta.
Maila’ fan ya ta li’i’ kåo manmagåhit i fino’-ña;
ta nanangga håfa para u masusedi nu Guiya.
Sa’ yanggin lahin Yu’us i tinas na tåotåo, siempri dinifendi Gui’
ya u nina’libri Gui’ ginin i kannai i maninimigu-ña siha.
Maila’ ya ta chagi Gui’ mumattråta yan kumastiga
kåo magåhit na kariñosu yan pasensia Gui’.
Maila’ ya ta kundena Gui’ para un na’mamahlåo na finatai;
sa’ sigun gi fino’-ña mismu siempri inadahi Gui’ as Yu’us.
I finu’ i Saina.
INEPPIN I SÅTMU Ps 54, 3-4. 5. 6-8
R. I SAINA SUMUSTETENI I LINA’LÅ’-HU.
O Yu’us, na’libri yu’ put i na’ån-mu,
yan difendi yu’ put i fuetsåm-mu.
O Yu’us, ékkunguk i tinayuyot-tu;
ékkunguk i finu’ i pachot-tu.
INEPPI…..
I mambuskaplaitu makokontra yu’,
ya i manmalamåña na tåotåo makekepunu’ yu’;
taigui si Yu’us gi me’nan i matan-ñiha.
INEPPI…..
Atan ha’, sa’ si Yu’us ayudantek-ku;
i Saina sumusteteni i lina’lå’-hu.
Pues bai hu ufreresi Håo abundånsia na sakrifisiu
yan bai hu tuna i na’ån-mu, Asaina, put i minåolek-mu.
INEPPI…..
SIGUNDU NA TINAITAI Jas 3, 16-4, 3
Un tinaitai ginin i Kattan Santiago
Mangginifli’e’-hu:
Amånu ha’ nai guaha hinesguan yan chinattåo, gaigi lokkui’ guennåo i disareklåo yan todu klåsin tinailayi. Låo i tinemtum ni ginin hilu’ en primet lugåt gåsgas; pasifiku lokkui’, su’åbi, yan kariñosu; bula mina’åsi’ yan manonokcha’ kusetchan manmåolik na cho’chu’; ti ume’eklasi yan ti hipokritu. Ya i minaolik guiya i kusetchan i tinekcha ni ha tåtmi i pasifiku gi pås.
Ginin manu mågi todu i plaitu yan i atgumentu gi entri hamyu? Manmåfattu ginin i minalagu’-miyu minaguf, ni ti pumåpara mumu gi sanhalum-miyu. Guaha malagu’-miyu, låo put ti siña en chili’, manlistu hamyu para en fanmamunu’; mansen malagu’ hamyu una kosa, låo put i ti siña en chili’, manatgumentu yan manmumu hamyu. Ti måfattu giya hamyu håfa malagu’-miyu sa’ ti en gagagåo si Yu’us ni ennåo. Ya yanggin manmagågagåo hamyu ti manmannåna’i, sa’ båba intension-miyu; manmanggågagåo hamyu kosas para en isa gi minaguf-miyu.
I finu’ i Saina.
IBANGHELIU Mk 9, 30-37
ÅLELUIA 2 Thes 2, 14
R. Åleluia. HA ÅGANG HIT SI YU’US NI IBANGHELIU;
MANMAFÅHAN HIT PARA SI YU’US GININ I
SAINA-TA AS JESUKRISTO.
R. Åleluia.
+ Un tinaitai ginin i såntu Ibangheliu sigun i tinigi’ San Marcos
Dispues di madingu atyu na lugåt si Jesus yan i mandisipulu-ña matutuhun manlåoya giya Galileha, låo ti malagu’ na u guaha tumungu’ månu Gui’ nai gaigi. Ha fa’nåna’gui i mandisipulu-ña taiguini, “I Lahin i Taotåo para u ma’intrega guatu gi kannai i manailayi na tåotåo ya u mapunu’ Gui’; tres dihas dispues di i finatai-ña u lå’la’ ta’lu.” Ti makumprendi håfa mansinangåni siha, låo manma’å’ñåo mafaisin Gui’ kuestion.
Manmåttu si Jesus yan i mandisipulu-ña guatu ‘Capernaum’, ya anai manhålum siha gi gima’, mamfinaisin as Jesus, “Håfa atgumentun-mimiyu mientras manhåhanåo hit para i gima’?”
Tåya’ manoppi, sa’ gi kumbitsasion-ñiha manatgumementu håyi mås takkilu’ gi entri siha. Pues matå’chung påpa’ ya Ha ågang i Dossi para i uriyå-ña ya ilek-ña, “Yanggin guaha malagu’ para u primera, debidi u na’yatåtatti gui’ yan u tentågu’ todu i pumalu.” Pues Ha konni’ un dikiki’ na påtgun ya Ha po’lu gi talu’, ya anai Ha toktuk i patgun ilek-ña nu siha, “Håyi rumisibi tåt kumu taiguini na påtgun gi na’ån-hu, Guåhu ha risisibi; håyi rumisibi Yu’, ha risisibi åhi’ ti Guåhu, sinoki atyu i muna’hånåo Yu’.”
I Ibangheliun i Saina.
