FINE’NA NA TINAITAI Am 8, 4-7
Un tinaitai ginin i Lepblun i Prufeta as Amos
Ekkunguk esti, hamyu ni gumagatcha’ påpa’ i manggai nisisidåt
yan dumistrorosa i mamopblin i tanu’!
Manmamaisin hamyu, “Ngai’an nai para u hokkuk i nuebu na pulan,
para in fansiña bumendi i mai’is-måmi,
yan i sabalu, kosaki siña in bendi i trigu?
Ta ribåha i ‘ephah’,
yan ta nå’yi mås i ‘shekel’,
ya ta arekla i pesadot para dumigeru!
Ta fåhan ni salåppi’ i takpapa’ na tåotåo,
ya i pepbli na tåotåo put un påt såndålias;
ta bendi kuntodu i lassas trigu!”
Esta manhula i Saina ginin i banidosun Jacob:
Ni ngai’an nai bai Hu maleffa ni una kosa na fina’tinas-ñiha.
I finu’ i Saina.
INEPPIN I SÅTMU Ps 113, 1-2. 4-6. 7-8
R. (1.7) TINA I SAINA, GUIYA NI KUMÅKAHAT HULU’ I PEPBLI.
Fanmanuna, hamyu ni tentågu’ i Saina,
tina i na’an i Saina.
U matuna i na’an i Saina
kuntodu på’gu yan todu i tiempu.
INEPPI…..
I Saina Ha gubebetna todu i nasion siha;
i glorian Yu’us gaigi gi hilu’ i langit.
Håyi parehu-ña i Saina, i Yi’os-ta ni takkilu’ tronu-ña
ya Ha a’atan påpa’ i langit yan i tanu’?
INEPPI…..
I Saina Ha kåkahat i manggái nisisidåt ginin i halum potbus,
Ha håhatsa i mamopbli ginin i munton åpu,
Ha na’fanmatåta’chung yan i prinsipi siha
i prinsipi siha gi entri i taotåo-ña,
INEPPI…..
SIGUNDU NA TINAITAI 1 Tm 2, 1-8
Un tinaitai ginin i fine’na na Kattan San Pablo para si Timoteo
Mangginifli’e’-hu:
En primet lugåt, guåhu hu sosohyu’ hamyu para en ufresi si Yu’us ginagao, tinayuyut, finaisin, yan agradesimentu para todu i taotåo; yan para i manrai yan todu atyu siha i guaha åoturidåt-ñiha, kosaki siña hit manlå’la’ gi pås sin buruka yan kabålis na ribirensia para si Yu’us gi dinanchi na kondukta. Måolik esti yan nina’mamaguf si Yu’us i Satbadot-ta, ni malagu’ na todu i taotåo u fanmasåtba yan para u ma kumprendi i minagåhit. Un Yu’us ha’ guaha, yan unu ha’ muna’dadañña’ si Yu’us yan i taotåo siha, era Guiya i Kristo Jesus, ni Ha intregan maisa Gui’ para u na’fanlibri todu i taotåo siha. Ennegui’ prueba guihi na tiempu na malagu’ si Yu’us na u fanmasåtba todu, ya put ennåo na mana’hånåo yu’ kumu apostot yan ma’estru para i MamPagånu, para bai hu pruklåma i mensahin i hinenggi yan i minagåhit. Åhi’, ti mandadagi yu’; i minagåhit hu såsangan!
Gi todu i tinayuyut siha gi Gima’Yu’us malagu’ yu’ na u fanmanåyuyut i lalåhi, atyu na lalåhi siha i chumocho’gui i minalagu’ Yu’us ya siña ma’istira hulu’ i kannai-ñiha sin u fanlalålu’ pat u fanatgumentu mientras manmanånayuyut.
I finu’ i Saina.
IBANGHELIU Lk 16, 1-13
ÅLELUIA (2 Cor 8, 9)
R. Åleluia. RIKU SI JESUKRISTO, LÅO HA NA’POPBLI GUI’
PUT I PARA UN NINA’RIKU GININ I PINIPBLEN-ÑA.
R. Åleluia.
+ Un tinaitai ginin i såntu Ibangheliu sigun i tinigi’ San Lucas
Ilek-ña si Jesus nu i mandisipulu-ña,
“Un riku na tåotåo guaha ha na’må’gas ya makehåyi esti na tåotåo na ha dispitdidisia i kosas siha. Ha na’ma’ågang ya ilek-ña, ‘Håfa esti i hiningongok-ku put hågu? Nå’i yu’ kuenta put i sitbisiom-mu, sa’ esta para un påra.’ Entri guiya ha’ i ilek-ña i ma’gas, ‘Håfa yu’ bai hu cho’gui? Siguru na ha na’båsta yu’ siempri i amu-hu. Ti hu na’siña mangguadduk kånnat. Mamåhlao yu’ umégagao ginin i ottru tåotåo. Estigui’ bai hu cho’gui! Taiguini bai hu cho’gui para bai hu na’siguru na i taotåo siha ma’aksepta yu’ gi gima’-ñiha yanggin mana’båsta yu’.’ “Intonsis ha ågang todu atyu siha i dumidibi i amu-ña ya ilek-ña nu i fine’na, ‘Kuåntu un didibi i amu-hu?’ Manoppi i taotåo, ‘Sientu na tarun låña.’ Ilek-ña i ma’gas, ‘Chuli’ i risibu-mu ya un fatå’chung insigidas påpa’, ya un po’lu singkuenta.’ Dispues ilek-ña nu i sigundu, ‘Kuåntu i dibi-mu?’ Manoppi, ‘Sientu na mididan trigu,’ ya ilek-ña i ma’gas, ‘Chuli’ i risibu-mu ya un po’lu uchenta.’ “Pues ha nå’i puntu i dueñu esti i bumuchåchu låo tai areklu na hutnaleru! Sa’ håfa? Sa’ i mangga’tanu’ mås mananimosu ki i ottru siha na mangga’tanu’ yanggin manguntråta yan i mamparehun-ñiha.” Ilek-ña si Jesus, “Estigui’ Hu sangångani hamyu: Fanmama’tinas amigun-miyu ginin i guinahan esti na tånu’, kosaki yanggin dumimålas, en fanmataggam gi taihinekkuk na guma’. Yanggin siña un angokku i taotåo gi mandikiki’ na kosas, siña lokkui’ un angokku gui’ gi mandångkulu; låo håyi lokkui’ ni ti tunas gi mandikiki’ na kosas ti tunas lokkui’ gi mandångkulu. Yanggin ti angokuyun håo gi ti ma’uk na rikesa, håyi para un inangokku gi petmanenti na rikesa? Yanggin ti siña håo ma’angokku ni salåppi’ ottru tåotåo, håyi para un nina’i ni mismu iyom-mu? “Tåya’ tentågu’ siña sumetbi dos na åmu. Siempri ha chatli’i’ i unu ya ha gofli’i’ i ottru, patsino ha atendi i unu ya ha dispresia i ottru. Ti siña un nå’in maisa håo para si Yu’us yan i salåppi’.”
I Ibangheliun i Saina.
