FINE’NA NA TINAITAI Is 55, 6-9
Un tinaitai ginin i Lepblun i Prufeta as Isaias
Ispiha i Saina mientras sisiña ha’ masodda’ Gui’,
ågang mientras ki hihihut Gui’.
Sedi i tailayi na tåotåo ya u yuti’ñaihun i kustumbren-ña,
ya i baba na tåotåo u yuti’ i baba na hinasson-ña;
Sedi ya u bira gui’ tåtti gi Saina sa’ yo’asi’ Gui’;
para guatu gi Yu’os-ta, ni chaddik manasi’i.
Sa’ i hinassok-ku ti parehu yan i hinassom-mu,
ni ti parehu i bidå-hu yan i bidå-mu siha, ilek-ña i Saina.
Taimanu ha’ tinakkilo’ña i langit gi hilu’ i tanu’,
taiguennåo ha’ tinakkilo’ña i bidå-hu ki i bidå-mu siha
yan i hanassok-ku ki i hanassom-mu siha.
I finu’ i Saina.
INEPPIN I SÅTMU Ps 145, 2-3. 8-9. 17-18
- (18) HIHUT I SAINA PARA ATYU SIHA I UMÅ’AGANG GUI’.
Bai hu bendisi Håo kada diha;
bai hu tuna i na’ån-mu todu i tiempu.
Må’gas i Saina ya debidi u matuna Gui’ takkilu’;
i mina’gås-ña ti kumprendiyun.
INEPPI…..
I Saina kariñosu yan yo’asi’,
ñating lalålu’ yan misin ginefli’i’.
Måolik i Saina para todu,
Ha ma’asisi’i todu i fina’tinås-ña.
INEPPI…..
Tunas Håo Asaina gi todu i bidå-mu,
fiet Håo gi todu i che’cho’-mu.
Hihut Håo Asaina, para atyu siha i umå’agang Håo,
para atyu siha i umå’agang Håo gi minagåhit.
INEPPI…..
SIGUNDU NA TINAITAI Phil 1, 20c-24. 27a
Un tinaitai ginin i Kattan San Pablo para i taotåo ‘Philippi’
Mañe’lu-hu:
Guåhu mismu bai hu na’ma’onra i Kristo, achukka’ yu’ låla’la’ pat måtai. Håfa kumeke’ilekña i lina’la’? Para guåhu kumeke’ilekña i Kristo. Pues siempri måttu mås lina’la’ ginin i finatai. Låo yanggin siña hu cho’gui mås manmåolik na cho’chu’ put i låla’la’ yu’ pues ti siguru yu’ håfa para bai hu atyik. Kalang mohun mahåhalla yu’ gi dos direksion. Malagu’ ha’ yu’ hu dingu esti na lina’la’ ya para in hami yan i Kristo, ya hunggan esti mås måolik gi entri i dos; låo put hamyu na måolekña na bai hu låla’la’ ha’.
Intonsis, tåya’ mås imputtånti ki para en dalalaki gi lina’la’-miyu håfa ginagagåo ni ibangheliun i Kristo.
I finu’ i Saina.
IBANGHELIU Mt 20, 1-16a
ÅLELUIA Acts 16, 14b
- Åleluia. BABA I KURASON-MÅMI, O ASAINA,
PARA BAI IN EKKUNGUK I FINU’ I LAHI-MU.
- Åleluia.
+ Un tinaitai ginin i såntu Ibangheliu sigun gi tinigi’ San Mateo
Ha sangåni si Jesus i mandisipulu-ña ni esti na fina’akumparasion:
“I Rainun i langit siña ma’akumpåra yan un tåotåo ni gai gualu’ ni tåftataf gi egga’an humånåo huyung para u fanispiha hutnaleru para u fanmacho’chu’ gi gualo’-ña. Dispues di manakumfotma na u faninapåsi suetdun un diha, esdesit, un pidåsun salåppi’, nina’fanhånåo siha guatu gi gualo’-ña. Gi alas nuebi gi egga’an humånåo ta’lu para atyu na lugåt anai mane’enangga cho’chu’ i taotåo siha, ha li’i’ unus kuåntu lalåhi manotohgi guennåo manaiche’chu’, pues mansinangåni siha, ‘Fanhånåo lokkui’ para i gualo’-hu, ya bai hu apåsi hamyu månu i tinas.’ Pues manhånåo. Gi alas dossi yan gi alas tres ha cho’gui ta’lu taiguennåo ha’. Anai ti åpmam alas singku, humånåo ta’lu para i lugåt anai mane’enangga cho’chu’ i taotåo siha, ya mañodda’ ha’ ta’lu unus kuåntu ni manotohgi. Mamfinaisin siha, ‘Håfa na manotohgi hamyu guini todu i diha ya tåya’ che’chu’-mimiyu?’ Manmanoppi, ‘Tåya’ fumaisin ham.’ Mansinangåni siha, ‘Pues hamyu lokkui’, fanhånåo para i gualo’-hu.’ “Anai kumekehomhum, ha tågu’ i lancheru ni muma’gågasi i che’chu’, ilek-ña, ‘Ågang i hutnaleru ya un apåsi siha, tutuhun ginin i mås uttimu macho’chu’ asta i finene’na.’ Atyu siha na lalåhi ni tumutuhun manmacho’chu’ gi alas singku manmanå’i un pidåsun salåppi’. Pues anai manmåttu para u fanma’apåsi atyu siha i finene’na manmacho’chu’, hinassun-ñiha na para u fanmanå’i mås, låo un pidåsun salåppi’ ha’ lokkui’ manmanå’in-ñiha. Machuli’ i salåppi’-ñiha ya matutuhun manggonggung kontra i lancheru. Ilik-ñiha, ‘Una ora ha’ che’chu’-ñiha esti i uttimu manmåttu, ya hami in usuni todu i diha gi papa’ i maipin somnak, ya parehu ha’ apås-mu nu siha yan hami!’ Ilek-ña i lancheru nu i unu giya siha, ‘Ekkunguk hit fan, amigu, sa’ ti hu kekefa’baba håo. Na ada ti kumuntråta hit para un cho’guiyi yu’ un diha, ya apås-mu un pidåsun salåppi’. Pues måolekña un chuli’ i apås-mu ya un hånåo para i gimå’-mu. Ginin i minalago’-hu ha’ na hu na’parehu i apas-miyu yan esti i uttimu macho’chu’. Na ada ti libri yu’ hu cho’gui maseha håfa malago’-hu ni kepblek-ku? Pat sino hohosguan håo put i gineftåo-hu?’ ”
Ennåo mina’ ilek-ña si Jesus, “Pues atyu siha i manuttimu u fanmo’na, yan atyu siha i manmo’na u fanuttimu.”
I Ibangheliun i Saina.
