FINE’NA NA TINAITAI Ex 17, 8-13
Un tinaitai ginin i Lepblun Exodus
Måttu si Amalek ya gumera kontra iya Israhet. Intonsis ilek-ña si Moises as Joshua, “Fanatyik unus kuåntus lalåhi, ya agupa’ hånåo huyung ya un gera kontra si Amalek. Tumotohgi yu’ siempri gi hilu’ i eksu’ ya bai hu gogo’ti i bastun Yu’us.” Pues ha cho’gui si Joshua taimanu ha’ tinago’-ña si Moises: gumera gui’ yan si Amalek dispues di kahulu’ si Moises gi yahululu’ gi eksu’ yan si Aaron yan si Hur. Mientras ha kåkahat hulu’ i kannai-ña si Moises, manmanggåganna iya Israhet, låo anai ha na’diskånsa i kannai-ña, si Amalek manggåganna. Låo yumayas kannai-ña si Moises; pues mapo’lu guatu un åtchu’ para u fatå’chung. Mientras tåntu si Aaron yan si Hur magogo’ti i kannai-ña, i unu gi un bånda ya i ottru gi ottru bånda, pues taiguennao na kumetu kannai-ña astaki måtchum i atdao. Pues si Joshua ha gabbi påpa’ si Amalek yan i taotåo-ña siha ni sapbli.
I finu’ i Saina.
INEPPIN I SÅTMU Ps 121, 1-2. 3-4. 5-6. 7-8
R. I AYUDU-TA GININ I SAINA NI FUMA’TINAS I LANGIT YAN I TANU’.
Ngumaha’ yu’ hulu’ gi sabåna;
ginin manu nai para u fåttu mågi i ayudu-hu?
I ayudu-hu u fåttu ginin i Saina,
ni fuma’tinas i langit yan i tanu’.
INEPPI…..
Ti u sedi si Yu’us na u sulun i addeng-mu;
ti mamaigu’ i guatdiåm-mu.
Magåhit, i guåtdian Israhet
ti sumisikat ni ti mamaigu’ .
INEPPI…..
Guiya i Saina guatdiåm-mu;
i Saina humohomi Håo gi agapa’-mu.
Ti un nina’låmin nu i atdåo gi ha’åni,
patsino i pilan gi puengi.
INEPPI…..
I Saina Un pinilan ginin todu i tailayi,
siempri Ha guåtdia todu i tiempu i lina’lå’-mu.
I Saina u pinilan i finattom-mu yan i hinanåo-mu
parehu ha’ på’gu yan todu i tiempu.
INEPPI…..
SIGUNDU NA TINAITAI 2 Tm 3, 14–4, 2
Un tinaitai ginin i sigundu na Kattan San Pablo para si Timoteo
Ginifli’e’-hu:
Låo hågu, kuntinuha gi mafa’na’guem-mu na minagåhit ni un sen honggi. Un tungu’ ha’ i ma’estrom-mu siha, yan un hahassu na desdi i pinatgon-mu, esta un tungu’ i Sånta Eskritura, ni siña nina’i håo tinemtum ni para un nina’fåttu gi satbasion ginin i hinenggi ginin i Kristo Jesus. Todu i Eskritura manmåfattu ginin i ininan Yu’us ya siña inayuda håo para un fama’nå’gui ni minagåhit, para un lalåtdi i lachi, para un kurihi i isao, yan para mama’nå’gui lumå’la’ dinanchi, kosaki i taotåo ni ha sesetbi si Yu’us u sen kualifikåo yan u ma’åtmas kabålis para u cho’gui todu klåsin cho’chu’ ni manmåolik.
Gi me’nan Yu’us yan i Kristo Jesus, ni para u fåttu para u husga i manlåla’la’ yan i manmåtai, yan put i para u fåttu para u fanggubetna kumu Rai, guåhu hu sosohyu’ håo para un setmunñaihun i minsåhi, para un insisti prumuklåma maseha dinanchi pat ti dinanchi na tiempu, para un kumbensi, un lalåtdi, yan un fannåna’i ånimu, mientras mama’nåna’gui håo gi pinasensia.
I finu’ i Saina.
IBANGHELIU Lk 18, 1-8
ÅLELUIA (Heb 4, 12)
R. Åleluia. LÅLA’LA’ YAN KALALAMTIN I FINU’ I SAINA;
HA GUAGUAKLI I HINASSU YAN I MUTIBUN I
KURASON-TA. R. Åleluia.
+ Un tinaitai ginin i såntu Ibangheliu sigun i tinigi’ San Lucas
Dispues mansinangåni i manapostulis as Jesus ni esti na fina’akumparasion, put i para u famfina’nå’gui na u fanmanåyuyut todu i tiempu ya nungka nai u fandinisanima: “Iståba un hues gi un songsung ni ti ma’å’ñåo as Yu’us yan tåya’ ha rispepeta tåotåo. Gaigi lokkui’ guennåo un bi’uda gi mismu songsung ni sigi ha’ måttu ha atburorota i hues put i dirichon-ña, ‘Ayuda yu’ ginin i kuntrariu-hu!’ Åpmam na tiempu ti malagu’ i hues inayuda gui’, låo putlus uttimu ilek-ña entri guiya, ‘Maseha ti hu ma’a’ñågui si Yu’us yan tåya’ hu rispepeta tåotåo, bai hu ispiha empeñu ya bai hu nå’i esti na bi’uda ni dirichon-ña sa’ meggai atburotutu-ña nu guåhu; sa’ siempri sigi ha’ måttu mågi giya guåhu astaki ha na’o’sun yu’!’ ” Pues Ha kuntinuha i Saina ya ilek-ña, “Ekkunguk i sinangan atyu i tailayi na hues. Ya håfa mohun, kåo ti u faburesi si Yu’us i taotåo-ña yanggin manmåttu giya Guiya ha’åni yan puengi manmanespipiha ayudu? Kåo ti u na’lachaddik umayuda siha? Bai Hu sangåni hamyu, siempri mamfinaburesi yan siempri Ha na’chaddik. Låo yanggin måttu mågi i Lahin i Taotåo kåo u fañodda’ mohun hinenggi guini gi tanu’?”
I Ibangheliun i Saina.
