B
FINENI’NA NA TINAITAI Is 50, 4c-9a
Un tinaitai ginin i Lepblun i Prufeta as Isaiah
Si Yu’us i Saina bumaba i talanga-hu para bai hu fanhunguk.
Ya ti hu kontra, ni ti hu bira yu’ tåtti.
Hu nå’i ni tatalo’-hu atyu siha i umañña yu’,
i fasu-hu atyu siha i bumo’uk i batbås-su;
Ti hu tåmpi i matå-hu
anai mapatmåda yan mato’la’i yu’.
Si Yu’us i Saina ayudantek-ku,
pues put ennåo na ti mana’mamåhlåo yu’;
Hu fa’asga’ i matå-hu,
anai hu tungu’ na ti bai hu mana’mamåhlåo
Hihut Gui’ giya guåhu ni prumutehi i dirichok-ku;
yanggin guaha malagu’ kumontra yu’,
maila’ ya ta hita na dos.
Håyi kumuestiotiona i dirichok-ku?
Sotta ya u fåna’ yu’.
Atan ha’, sa’ i Saina i Yi’us ayudantek-ku;
håyi siña prumueba na lachi yu’?
I finu’ i Saina.
INEPPIN I SÅTMU Ps 116, 1-2. 3-4. 5-6. 8-9
R. BAI HU FAMOKKAT GI ME’NAN I SAINA, GI TANU’ I MANLÅLA’LA’.
Hu gofli’i’ i Saina, ni Ha e’ékkunguk
i bos-su gi ginagåo-hu,
Ni Ha na’talakmagi i talanga-ña
gi atyu na ha’åni anai umågang yu’.
INEPPI…..
Ha uriyåyayi yu’ i inagang i finatai;
ha afufuyut yu’ i inagang i finatai;
måttu giya guåhu un dångkulun linihan yan pininiti.
Pues hu ågang i na’an i Saina,
“O Asaina, na’libri i lina’lå’-hu!”
INEPPI…..
Kariñosu yan tunas i Saina;
magåhit na yo’asi’ i Yi’os-ta.
I Saina Ha adadahi i manai nina’siña;
tai nina’siña yu’, låo Ha såtba yu’ si Yu’us.
INEPPI…..
Sa’ Ha na’såfu i anti-hu ginin i finatai,
ti Ha na’tångis i atadok-ku, ya ti Ha na’matompu’ i addeng-hu.
Bai hu famokkat gi me’nan i Saina
gi tanu’ i manlåla’la’.
INEPPI…..
SIGUNDU NA TINAITAI Jas 2, 14-18
Un tinaitai ginin i Kattan Santiago
Hafañe’lus, håfa bali-ña un tåotåo para u sångan na gai hinenggi gui’ yanggin ti siña ha prueba gi aksion-ña? Kåo siña sinatba gui’ ni ennåo? Siakåsu na guaha mañe’lu numisisita magågu ya ti mannanahung nengkannu’, håfa bali-ña para u sangåni siha, “Si Yu’us en fambinendisi! Puedi ti en fanmanenghing yan en fañotchu måolik!”–yanggin ti en na’i siha ni nisisidåt para lumå’la’? Parehu ha’ yan esti i hinenggi: yanggin guiguiya ha’, ya tåya’ aksion, pues måtai.
Låo siempri guaha sumångan, “Un tåotåo gái hinenggi, i ottru gaigi i aksion.” Estigui’ inippek-ku, “Fa’nu’i yu taimanu un tåotåo para u gái hinenggi sin aksion. Guåhu bai hu fa’nu’i håo ni hininggek-ku ginin i aksion-hu.”
I finu’ i Saina.
IBANGHELIU Mk 8, 27-35
ÅLELUIA Gal 6, 14
R. Åleluia. UNU HA’ GLORIÅ-HU, I KILU’US I SAINA-TA AS JESUKRISTO,
NI HA KLÅBA I TANU’ GIYA GUÅHU YAN GUÅHU GI TANU’.
R. Åleluia.
+ Un tinaitai ginin i såntu Ibangheliu sigun i tinigi’ San Marcos
Humånåo si Jesus yan i mandisipulu-ña para i sengsung siha gi uriyan Caesarea Philippi. Mientras manhåhanåo Ha faisin i mandisipulu-ña ni esti na kuestion, “Håyi hinassun-ñiñiha i taotåo siha put Guåhu?” Manmanoppi i mandisipulu, “Guaha umå’aluk na Hågu si Juan Bautista, ottru siha umå’aluk na si Elias, på’gu i pumalu siha ilik-ñiñiha na unu Håo gi mamprufeta siha.” Sumigi Ha faisin siha, “Ya hamyu, håyi Yu’ hinassun-mimiyu put Guåhu? Manoppi si Pedro, “Hågu i Misihas!” Dispues maninetdin siha as Jesus para cha’-ñiha fane’esangani ni håyi put Guiya.
Pues Ha tutuhun si Jesus fuma’nå’gui siha na i Lahin i Taotåo debidi u famadesi atdit,
u marichåsa ni manåmku’, i manmågas mamåli’, yan i maniskribas, ya u mapunu’, ya tres dihas dispues u lå’la’ ta’lu. Ha sånganñaihun esti siha gi pupbliku. Pues kinenni’ Gui’ as Pedro para un ringkon ya ha tutuhun inaguaguåti. Pues Ha bira Gui’ si Jesus, Ha atan i mandisipulu-ña ya Guiya lumalåtdi si Pedro, “Ritira håo gi me’nå-hu, satanås! I hinassom-mu puru ha’ hinassun tåotåo, ti hinassun Yu’us!”
Ha ågang si Jesus i linahyan yan i mandisipulu-ña ya ilek-ña nu siha, “Yanggin guaha malagu’ tumattiyi Yu’ debidi u maleffa nu guiya mismu, ya u uma i kilu’os-ña, ya u dalalaki Yu’. Håyi muna’kekesåfu i lina’lå’-ña u falingu, låo håyi ni muna’falingu i lina’lå’-ña put Guåhu yan i ibangheliu siempri u såfu.”
I Ibangheliun i Saina.
